Iseda Magasin be Taunimanima Idauidau Totona Idia Karaia
1. Edena dala ai igui hesiai tauna mai ena kamonai bona kara maoromaoro oreana ese aposetolo Paulo ia tohotohoa?
1 Aposetolo Paulo be sivarai namona harorolaia daladia ia haidaua, “taunimanima idauidau ibounai” ia durua totona. Unai hegeregerena, igui hesiai tauna mai ena kamonai bona kara maoromaoro oreana ese iseda magasin ia karaia, mauri bona abidadama idauidau taudia durua totona. (1 Kor. 9:22, 23) Unai dainai Gima Kohorona bona Awake! ita gaukaralaia namonamo totona, namona be ita laloatao unai magasin be daidia totona idia karaia.
2. Awake! be daidia totona idia karaia?
2 Awake!: Inai magasin ese ia durua taudia be aposetolo Paulo ese ia hereva henia “Atena taudia” bamona. (Kara 17:22) Unai taudia be Keristani mauri dalana idia diba lasi, bona edia laloparara Baibel dekenai be bada lasi. Unai hegeregerena, Awake! be Baibel idia diba sisina o diba lasi taudia totona idia karaia. Reana idia be Keristani hahediba herevadia idia diba lasi, o reana tomadiho idia abidadama henia lasi, o reana idia diba lasi Baibel ena hereva be mai ena heduru bada. Awake! idia karaia ena badina badana be duahia taudia ia hadibaia Dirava momokanina be ia noho. Danu, inai magasin ese duahia tauna ena abidadama Baibel ai ia hagoadaia bona ia durua, unai amo ia laloparara Iehova ena Witnes taudia be tomadiho ma haida amo idia idau.
3. Gima Kohorona ena pablik bona stadi gauna be daidia totona idia karaia?
3 Gima Kohorona: Inai magasin ena pablik gauna be Dirava bona Baibel idia matauraia taudia totona idia karaia. Idia be mai edia diba sisina Baibel dekenai, to ena hahediba herevadia idia lalopararalaia namonamo lasi. Idia be Paulo ese ia gwauraia “Dirava gari henia taudia” bamona. (Kara 13:14-16) Gima Kohorona stadi gauna be Iehova ena Witnes taudia totona idia karaia. Paulo ia laloparara ena revareva idia duahia taudia be Baibel idia diba namonamo bona hereva momokani ena diba maoromaoro idia abia. (1 Kor. 1:1, 2) Unai hegeregerena, Gima Kohorona stadi gauna be hebou idia lao bona Witnes taudia edia hereva bona lalohadai idia diba taudia totona.
4. Dahaka dainai magasin edia kahana ta ta ita dibaia namonamo?
4 Ena be Gima Kohorona bona Awake! be nega tamona ita hariharilaia, to nega momo idia ta be iseda hamatamaia hereva lalonai ita gaukaralaia. Unai dainai, namona be magasin ena kahana ta ta ita dibaia namonamo. Bena do ita diba edena kahana be ita davaria taudia edia lalona do ia veria.