Gima Kohorona! Idia Haidaua
1 Hari inai lagani lalonai, kongrigeisen ibounai idia kamonai hadibaia herevana be inai: January 2008 ai, Watchtower halasia dalana do idia haidaua sisina, ta be taunimanima dekenai do ita hariharilaia bona ma ta be iseda Keristani tadikaka bona taihu totona! Reana oi laloa noho: ‘Edena dala ai inai magasin rua be do idia idau? Bema unai dala rua dekenai ita abia, ena namo be dahaka? Unai magasin ai kahana matamata haida idia noho, a?’
2 Ena Idau: Hua ta ena Watchtower ginigunana (1st gauna) be taunimanima dekenai ita hariharilaia totona. Inai magasin idia hegaegaelaia neganai, taunimanima edia laloparara hegergerena do idia torea. Watchtower iharuana (15th gauna) be stadi gauna bona haroro gaukara dekenai do ita hariharilaia lasi. Unai magasin lalonai be hua ta ena stadi herevadia ibounai bona Keristani gwauhamata hesiai taudia durua herevadia ma haida do idia noho. Taunimanima dekenai do ita hariharilaia Watchtower ese Iehova ena Witnes taudia bona Witnes lasi taudia—Baibel idia abia dae taudia unai—ese do idia moalelaia. To, Awake! magasin be Iehova ena Witnnes taudia, Witnes lasi taudia, bona Baibel ena hereva daradaralaia taudia totona.
3 Ena Namo: Stadi magasin lalonai, inai bamona herevadia—hegeregere “painia”—ita lalopararalaia totona ena anina do idia gwauraia hedinarai lasi, badina unai magasin be ita totona. Bona inai magasin lalonai do idia noho herevadia be mai edia heduru bada Iehova ena Witnes taudia bona Baibel stiuden totona. Taunimanima dekenai do ita hariharilaia magasin be edena bamona? Unai magasin be taunimanima ibounai ese do idia lalopararalaia dalanai idia torea dainai, Witnes lasi tauna do ita durua unai magasin ibounai ia duahia haorea totona. Witnes taudia danu be unai magasin do idia duahia neganai, idia do ia durua. Hua ta ta lalonai, ita ese Watchtower tamona bona Awake! tamona do ita hariharilaia. Unai dainai hua tamona lalonai, nega bada do ia noho lalona veria kiki herevadia ita manadalaia totona.
4 Kahana Matamatadia: Do ita hariharilaia Watchtower lalonai kahana matamatadia haida idia noho. Ena kahana ta be auka lasi dalanai Baibel ena hadibaia herevadia do ia hahedinaraia. Ma kahana ta be Baibel ese edena bamona ruma bese ia durua dalana do ia herevalaia. Matamata taudia be Baibel idia stadilaia totona projek haida do idia noho. Watchtower ta ta ena kahana ta lalonai Iehova ena kara haida ia herevalaia Baibel siridia idia noho, Iehova ena kara ita dibaia totona.
5 Ai guriguri, Iehova ese Watchtower ena halasia dalana matamatana do ia hanamoa. Inai Watchtower bona Awake! ese kudou maoro taudia momo edia lalona do ia veria sivarai namona idia abia dae totona.—Mat. 10:11.