Tano Idauna ai Hesiai Gaukara Oi Karaia Diba, A?

“HANAIHANAI lau ura misinari gaukara lau karaia. Lau do headava lasi neganai, Texas, U.S.A. dekenai, haroro taudia be momo lasi gabunai hesiai gaukara lau karaia. Ai headava murinai egu adavana ese unuseniai lau ia bamoa. Aiemai kekeni ia vara neganai, lau laloa, ‘Vadaeni, misinari gaukara do lau karaia diba lasi.’ To Iehova ese taunimanima edia ura gaudia ia hagugurua diba, bema idia be ena ura hegeregerena.”​—Jesse, hari Ecuador dekenai hesiai gaukara ia karaia ena adavana bona natuna toi danu.

“Lau laloa lasi lau ese unai bamona gaukara do lau karaia diba, Gilead misinari sikuli dekenai lau lao lasi dainai. Bema egu Baibel stiuden taudia ta lau itaia hereva ia henia eiava ia haroro neganai, unai dainai lau moale bada, bona Iehova lau tanikiu henia inai hahenamo be lau ia henia dainai.”​—Karen, headava lasi hahine ta, South America dekenai lagani 8 ia painia.

“United States dekenai lagani 13 ful-taim haroro gaukara ai karaia murinai, lau bona egu adavana ai laloa gaukara matamatana ma ta ai abia be namo. Hari emai moale ese emai moale gunana ia hanaia; ia be momokani mauri dalana hereana.”​—Tom, ena adavana, Linda, ida Amazon kahanai idia painia.

Unai moale herevadia be edia noho dalana dainai Watchtower Bible School of Gilead dekenai misinari treinini idia abia lasi taudia amo. To, idia ese tano idauna dekenai hesiai gaukara ena moale bona ena hekwarahi idia mamia. Unai be edena bamona ia vara? Unai bamona hesiai gaukara be oi totona, a?

Lalohadai Maorodia Oi Abia be Namo

Tano idauna ai hesiai gaukara karaia namonamo totona, gabu matamata itaia urana sibona be hegeregere lasi. Unai bamona gabudia ai idia haheauka taudia be idia haheauka diba badina lalohadai maorodia idia abia. Aposetolo Paulo bamona, idia laloa idia be abitorehai taudia, Dirava dekenai sibona lasi to taunimanima dekenai danu. (Roma 1:​14) Idia ese Dirava ena hahegani haroro gaukara dekenai, be edia tano ena teritori dekenai idia hagugurua diba. (Mataio 24:14) To idia mamia idia be mai edia abitorehai bona idia ura idia hekwarahi sivarai namona be idia kamonaia momo lasi taudia dekenai idia harorolaia totona.

Nega momo idia ura anina idia havaraia gabudia ai gaukara idia karaia be doria gauna ma ta​—bona unai be maoro. Bema ita itaia haoda tauna ma ta ese gwarume momo ia abia, do ita lao ia haoda gabuna kahirakahira ai do ita haoda danu, ani? Unai hegeregerena, ma tano idauna dekenai hesiai gaukara ia tubu ena sivarai idia kamonai ese momo ia hagoadaia “gwarume momo herea” idia abia gabuna dekenai idia lao totona.​—Luka 5:​4-10.

Laloa Namonamo

Tano momo edia gavamani idia ura lasi, tano idauna amo idia mai tomadiho volantia taudia dekenai moni gaukara idia henia. Unai dainai tano idauna ta ai idia ura hesiai gaukara idia karaia taudia be hanaihanai moni dalanai sibodia idia naria be namo. Unai bamona hekwakwanai moni dalana ai be edena bamona idia hanaia? Momo ese moni idia abia totona edia ruma idia hoihoilaia eiava taunimanima haida dekenai idia rentaia. Ma haida be edia bisinesi idia hoihoilaia. Haida ese moni idia haboua unai idia karaia totona. To danu, haida be tano idauna ai hesiai gaukara be lagani ta eiava rua idia karaia, bena idia giroa edia tano dekenai moni gaukara idia karaia bona moni idia haboua, bona ma idia giroa lou bona hesiai gaukara idia karaia lou.

Ogogami tanona dekenai gau namona ta be, nega momo aniani bona kohu edia davana be maragi, to taga tanona dekenai aniani bona kohu edia davana be bada. Unai dainai haida be moni gaukara amo idia ritaea dainai gavamani ena heduru monina sisina idia abia bona edia mauri durua gaudia idia abia diba. To momokani, ta ese moni hida do ia negea be ia abia hidi noho dalana hegeregerena. Ogogami tanodia ai danu noho gabudia namodia oi davaria diba, to edia davana be bada herea.

Vadaeni, oi do lao lasi neganai, do oi negea monina oi duahia be namo. To, do oi negea monina sibona oi laloa namonamo be hegeregere lasi. Reana South America ai hesiai gaukara idia karaia taudia edia hereva ese oi idia durua diba.

Hekwarahi Gauna Badana

Markku, Finland amo, be ia gwau: “Spanish gado lau dibaia be hekwarahi bada gauna ta lau dekenai. Lau laloa gado lau diba lasi dainai, nega bada do ia ore bena hesiai tauna ena maduna do lau abia. To lau hoa bada herea, badina hua rua sibona murinai lau idia noia buka stadi ta lau naria totona! Momokani, nega momo lau hemarai. Ladana dekenai lau kerere momo. Nega ta lau ese Tadikaka Sancho lau gwauraia ‘Tadikaka Chancho (boroma),’ bona do lau laloaboio diba lasi lau ese Taihu Salamea lau gwauraia ‘Malasea (kara dika).’ To, tadikaka bona taihu be ai dekenai idia haheauka.” Markku be unai tano dekenai lagani 8 lalonai ena adavana, Celine, danu loaloa naria gaukara ia karaia.

Chris, guna ai gwauraia tauna, Jesse, ena adavana ia gwau: “Lau ese emai sekit naria tauna ena vadivadi negana ginigunana lau laloatao, ia be hua toi sibona unuseniai ai noho murinai ai abia. Lau diba unai tadikaka ese aiemai kudouna ia veria totona, haheitalai namona ia gwauraia bona mai ena hairai gauna ta ia kikilaia, to ia gwauraia gauna lau lalo-pararalaia diba lasi. Unai hebou gabuna lalonai lau tai. Egu matana ranu sibona ia diho lasi; to lau tai badabada. Hebou murinai, sekit naria tauna dekenai egu kara ena badina lau gwauraia hedinarai toho. Ia be tau namona bona taunimanima iboudiai ese lau dekenai idia gwauraia herevana ia gwauraia, ‘Ten paciencia, hermana’ (‘Taihu, oi boga auka’). Lagani rua o toi murinai, ai hedavari lou bona miniti 45 lalodiai ai herevahereva, ia danu ai herevahereva diba dainai ai moale bada.”

Tadikaka ma ta ia gwau: “Gado dibaia be mai anina bada gauna. Ita hekwarahi bada edia gado ita dibaia totona neganai, eda herevahereva dalana ita hanamoa diba.”

Idia ibounai idia gwau unai bamona hekwarahi karana ese namo momo ia havaraia. Ta ese gado matamatana ta ia dibaia neganai, lalo-manau, haheauka, bona gaukara goada karana ia habadaia diba. Unai ese ma haida haroro henia dalana ena iduara ia kehoa. Hegeregere, Spanish gado ia dibaia tauna be tanobada hegegemadai taunimanima 400 milioni ese idia gaukaralaia gadona ai ia herevahereva diba. Gabeai edia hanua dekenai idia giroa taudia momo ese idia dibaia gadona idia gaukaralaia diba Spanish gado taudia idia durudia totona.

Hanua Laloa Momo Karana be Edena Bamona?

Deborah, ena adavana Gary danu Amazon kahanai hesiai gaukara ia karaia taihuna, ia gwau: “Lagani 1989 ai, Ecuador dekenai ai mai neganai, lau ese egu hanua lau laloa momo. Lau ese kongregesen dekenai idia noho tadikaka bona taihu dekenai tabekau karana lau dibaia. Idia be egu ruma bese bamona ai idia lao.”

Karen, guna ita herevalaia taihuna, ia gwau: “Lau ese egu hanua laloa momo karana be dina iboudiai haroro gaukara lau karaia karana amo lau haorea toho. Unai dala amo lau ese egu gabu lau laloa momo lasi. Danu, lau laloatao egu gabu dekenai, lauegu tama sina be tano idauna ai lau gaukara dainai idia moale. Sinagu ese hanaihanai inai hereva amo lau ia hagoadaia: ‘Iehova ese oi ia naria namonamo diba to lau ese oi do lau naria namonamo diba lasi.’ ”

Makiko, Japan amo, be mai hevaseha danu, ia gwau: “Dina ibounai haroro gaukara lau karaia murinai lau hesiku bada. Unai dainai, ruma dekenai lau giroa bona egu hanua lau laloa momo matamaia neganai, nega momo lau mahuta haraga. Unai dainai unai hemami ia noho daudau lasi.”

Natudia be Edena Bamona?

Bema natudia idia noho danu, namona be idia abia diba gaudia oi laloa danu be namo, hegeregere edukeisen. Unai totona haida ese ruma dekenai sikuli idia karaia bona haida be unai gabu edia sikuli dekenai edia natudia idia atoa.

Al be ena adavana, natuna rua, bona ena sinana danu idia lao South America dekenai. Ia gwau: “Ai davaria natudia be sikuli dekenai ai atodia dainai, idia ese gado idia dibaia haraga. Hua toi lalonai, gado idia herevalaia goevagoeva diba.” To, Mike bona Carrie edia mauri lagani 13 ia lao 19 memerodia ese ruma dekenai revareva amo kosi idia karaia. Edia tama sina idia gwau: “Ai davaria natudia sibona dekenai maduna ai rakatania diba lasi idia stadi totona. Unai kosi idia karaia lalonai ai danu ai vareai bona ai itaia idia ese edia sikuli gaukara be edia deit korikori ai idia karaia.”

David bona Janita, Australia amo, ese edia hemami edia natuna memero rua dekenai idia gwauraia. “Ai ura emai memero ese edia matana korikori amo ma haida edia mauri dalana idia itaia. Haraga herea ita laloa diba ita tubu daekau maurina be maoro, to momo ese unai bamona mauri idia diba lasi. Danu idia ese tanobada hegegemadai tiokratik hakaua herevadia idia gaukara dalana idia itaia, herevana edena tano eiava kastom lalonai idia noho.”

Ken ia laloatao, ia gwau: “Lauegu mauri lagani be hani neganai, aiemai ruma bese be England idia rakatania, unai be lagani 1969 lalonai. Ena be lau laloa hegeregerena kopukopu rumana mai ena rei guhina dekenai ai noho lasi dainai lau lalohisihisi, to lau mamia lau tubu negana lalonai lau idia naria dalana be namo herea momokani. Lau ese maragidia ma haida dekenai lau hebogahisi badina lau abia hahenamona idia abia lasi! Misinari taudia bona spesel painia taudia lau bamoa dainai, egu mauri lagani be 9 neganai, heduru painia gaukara lau hamatamaia.” Hari Ken be loaloa naria tauna.

Gabriella, Jesse ena natuna kekeni, ia gwau: “Momokani, hari Ecuador be aiemai hanua. Lau moale bada egu tama sina ese edia lalona idia hadaia iniseni idia mai totona.”

To danu, natudia haida be badina idauidau dainai edia mauri idia haidaua diba lasi bona edia ruma bese be edia tano korikori dekenai idia giroa lou. Unai dainai do oi lao henia tanona oi vadivadi henia guna be namo. Unai dala amo oi ura karaia gauna be oi itaia gaudia hegeregerena oi abia hidi diba.

Idia Lao Dainai Idia Abia Hahenamo

Momokani, tano ma ta dekenai hesiai gaukara karaia be mai ena hekwarahi bona gau momo do oi dadaraia. Tano idauna dekenai idia lao taudia ese hahenamo idia davaria, a? Mani idia ese ita idia hadibaia.

Jesse: “Lagani 10 Ambato ena siti dekenai ai noho neganai, ai ese kongregesen edia namba be rua amo ia daekau 11 dekenai be ai itaia. Ai ese heduru ai henia unai kongregesen ima idia hamatamaia totona, bona Kingdom Hall rua haginia gaukarana dekenai ai gaukara. Bona ai moale diba, badina lagani ta ta ai, ai ese taunimanima rua hegeregerena ai durudia idia bapatiso totona. Lau be mai egu lalo-hisihisi gauna tamona sibona​—lagani 20 gunanai lau mai be namo.”

Linda: “Taunimanima ese hereva momokani bona emai hekwarahi idia laloa bada ese ai ia hagoadaia bada. Hegeregere, uda lalonai ia noho taoni maragina ta lalonai, Baibel stiuden tauna ta ladana Alfonso ia lalo-parara ena gabu dekenai pablik tok idia karaia be mai ena namo. Ia ese ena ruma matamatana, au amo ia karaia gauna, lalonai ia noho matamaia, bona iena hanua lalonai unai bamona ruma be momo lasi. Ia laloa unai taoni dekenai iena ruma sibona be hegeregere Iehova dekenai idia hahelagaia totona, bona ia ese ena kalaga, rei amo ia karaia gauna, dekenai ia giroa bona ena ruma be ia henia tadikaka ese Kingdom Hall ai idia halaoa totona.”

Jim: “Hesiai gaukara lalonai taunimanima ida ai herevahereva ena hora ese nega 10 United States dekenai ai haorea negana ia hanaia. Danu, iniseniai mauri dalana be hekwarahi lasi. Nega be bada herea, stadi bona haroro gaukara totona.”

Sandra: “Lau itaia Baibel ena hereva momokani ese taunimanima edia mauri ia haidaua bena mauri namona idia abia ese lau ia hamoalea bada. Guna lau ese Amada, mauri lagani 69 hahinena bona aniani hoihoilaia sitoa maragina ta ena biaguna, danu Baibel lau stadilaia. Guna ia be hanaihanai miliki ena kahana 10 dekenai ranu kahana rua ia atoa kau. Ia ese ma ena hoihoi taudia ia koia bona unai miliki manokana be ena hetoa korikori amo ia hoihoilaia lasi. To Diba ese Mauri Dekenai Ita Ia Hakaua Lao bukana ena karoa 13 ena hereva kwarana ‘Kara Momokani Dainai Moale Ia Vara’ ai stadilaia murinai, Amada ese unai koikoi karana ia hadokoa. Nega sisina unai ia vara murinai, bapatiso ia abia ese moale bada ia havaraia!”

Karen: “Guna Iehova dekenai lau tabekau momo lasi eiava guna lau ia gaukaralaia momo lasi, iniseniai ia vara bamona. Lauegu hetura karana Iehova ida be ia dobu bona ia goada.”

Oi be Edena Bamona?

Lagani momo lalonai, Witness taudia tausen momo be tano idaudia dekenai hesiai gaukara idia karaia. Haida be lagani ta eiava rua sibona idia noho, to haida be idia noho ela bona hanaihanai. Idia ese edia diba, edia goada lauma dalanai, bona edia moni idia mailaia, badina idia ura dikadika Basileia ena gaukara be tano idauna ta ai idia habadaia. Moni gaukara be momo lasi dainai unai tano ena Basileia pablisa taudia be hesiai gaukara idia karaia diba lasi gabudiai idia noho. Idia momo ese four-wheel-drive motuka idia hoia, motuka maragidia amo idia lao diba lasi gabudia dekenai idia gaukara totona. Ma haida be, siti dekenai idia ura noho dainai, elda be momo lasi kongregesen badadia dekenai heduru idia henia. To, idia ibounai idia gwau idia henia heduruna lauma dalanai be maragi, to idia abia hahenamodia be bada herea.

Oi ese tano idauna dekenai hesiai gaukara ena hahenamo oi abia diba, a? Bema emu noho dalana ia hegeregere, namona be do oi lao diba daladia oi tahua, ani? Dala ginigunana bona mai anina bada be, Society ena brens opesi, oi ura lao tanona dekenai oi tore henia be namo. Oi abia herevadia ese oi do ia durua bena anina do oi havaraia dalana oi abia hidi diba. Danu, The Watchtower, August 15, 1988 gauna dekenai ia noho herevana “Go Out From Your Land and From Your Relatives” lalonai be heduru hereva namodia momo oi davaria diba. Hegaegae namonamo karana bona Iehova ena heduru amo, reana oi danu ese tano idauna ai hesiai gaukara oi karaia ena moale oi abia diba.

[Picture on page 24]

TOM BONA LINDA, SHUAR INDIAN TAUDIA IDIA NOHO GABUNA DEKENAI IA LAO DALA MARAGINA TA DEKENAI

[Picture on page 25]

MOMO BE ECUADOR ENA SITI BADANA, QUITO, DEKENAI HESIAI GAUKARA IDIA KARAIA

[Picture on page 25]

MAKIKO, ANDES ORORODIA DEKENAI IA HARORO

[Picture on page 26]

HILBIG RUMA BESENA BE ECUADOR DEKENAI LAGANI IMA HESIAI GAUKARA IDIA KARAIA VADAENI