“Inai Bamona Do Umui Karaia Noho” April 5 be Iesu Ena Anibou
1 “Inai bamona do umui karaia noho lau umui laloatao totona.” (Luka 22:19) Iesu be unai hereva amo ena hahediba taudia ia oda henia, iena Anibou o Memorial idia karaia totona. Iesu ena mauri davalaia boubouna ese ia havaraia gaudia dainai, Keristani taudia ese lagani ta ta ai Memorial hebouna idia karaia be mai anina bada. Hari, April 5 ena Memorial negana ia kahirakahira dainai, edena dala ai eda tanikiu karana Iehova dekenai ita hahedinaraia diba?—Kol. 3:15.
2 Hegaegae: Memorial hebouna be mai anina bada. Unai dainai, namona be ita hegaegae guna, gabeai unai hebou dekenai ita lao. Hegeregere, iseda famili ida Iesu ena tanobada maurina dokonai idia vara gaudia ita stadilaia bona laloa dobu. (Esr. 7:10) Iesu ena Memorial ena Baibel duahiduahi oi davaria gabudia be inai: Iseda kalenda, Dina Iboudiai Buka Helaga Tahua buklet, bona Tau Hereadaena bukana ena karoa maorodia (unai be February 1, 2011, The Watchtower, rau 23-24 dekenai).
3 Haroro: Memorial ita laloa bada dalana ma ta be inai: Haroro gaukara ita habadaia. (Luka 6:45) Tanobada hegegemadai, Memorial invateisen pepana hariharilaia negana be Saturday, March 17 ai do ia matamaia. Emu sediual oi haidaua diba oi haroro totona, a? Heduru painia gaukara oi karaia diba, a? Namona be Ruma Bese ena Tomadiho neganai unai umui herevalaia hebou.
4 Lagani ta ta ai Iesu ena Memorial ita laloa bada karana be mai ena namo. Iehova ese ena Natuna korikorina ia bouboulaia karana ita laloa dobu neganai, eda moale bona lalokau Dirava dekenai ia bada daekau. (Ioa. 3:16; 1 Ioa. 4:9, 10) Danu, ita ura lasi ita sibona eda ura ita laloa bada. (2 Kor. 5:14, 15) Ma danu, ita ura taunimanima vairanai Iehova ita hanamoa. (Sal. 102:19-21) Momokani, Iehova ena hesiai taudia idia moale badina April 5 ena Memorial neganai ‘Lohiabada ena mase do idia gwauraia hedinarai.’—1 Kor. 11:26
[Study Questions]
1. Dahaka dainai Memorial hebouna ita karaia be gau badana?
2. Edena dala ai eda stadi bona laloa dobu karana amo ita hahedinaraia Memorial ita laloa bada?
3. Edena dala ai eda haroro gaukara habadaia karana amo ita hahedinaraia Memorial ita laloa bada?
4. Iesu ena Memorial ita laloa bada karana ena namo haida be dahaka?