Dirava Ena Hairai Idia Hahedinaraia Gaudia

Momo be Dirava ia havaraia gaudia idia itaia neganai idia moale. To haida idia laloparara unai gaudia be Iehova ena lalohadai bona hemami idia hahedinaraia. (Roma 1:20) Idaunegai, Davida be Buka Helaga ia duahia karana amo Iehova ia dibaia. To danu, ia ese Dirava ia havaraia gaudia, hegeregere hua bona hisiu ia “itaia” karana amo Dirava kahirakahira ia lao. (Sal. 8:3, 4) Vidio ladana, The Wonders of Creation Reveal God’s Glory ese ita, eda natudia bona stadi taudia do ia durua Iehova ia havaraia gaudia bona Iena kara namodia ita laloa dobu bena Ia kahirakahira ita lao. Vidio oi itaia murinai, henunai henanadai oi haerelaia toho.

(1) Edena dala ai iunives ena sais bona heau namonamo dalana ese ita ia durua Iehova ita laloa bada totona? (Isa. 40:26) (2) Ranu ita stadilaia neganai, Dirava dekenai dahaka ita dibaia? (Apok. 14:7) (3) Edena dala ai tanobada ena sais bona ia be dina kahirakahira ia noho lasi karana ese Iehova ena aonega ia hahedinaraia? (4) Hua ena gaukara be dahaka? (Sal. 89:37) (5) Edena dala ai Iehova ese taunimanima ia karaia mauri idia moalelaia totona? (6) DNA be dahaka? (Sal. 139:16) (7) Edena bamona Iehova ese taunimanima ia karaia dalana be idau? (Gen. 1:26) (8) Tanobada matamata lalonai oi ura dahaka oi moalelaia?

Henanadai ma haida (Extra Features): (9) Kala idauidau be dahaka ese ia havaraia? (10) Edena dala ai ranu be graviti ia veria dainai, au henuna amo ia daekau ela bona au ena ataiai? (11) Eda tauanina lalonai ranu ena gaukara be dahaka? (12) Mauri gaudia idia gaukara hebou namonamo ena haheitalai haida mani oi gwauraia. (13) Edena dala ai animal haida be ma haida ida idia hetura namonamo? (14) Inai hereva “golden angle” be dahaka? Unai be edena dala ai Dirava ia havaraia gaudia dekenai ia hedinarai?

Iehova ia havaraia gaudia “itaia namonamo”: Iesu ese ita ia hamaoroa, “guba manudia umui itaia namonamo” bona “tano ena flaoaflaoa edia tubu dalana mani umui itaia.” (Mat. 6:26, 28) Unai ese ita ia durua Iehova ita abidadama henia bona Iena aonega, siahu bona lalokau ita laloa bada totona. Inai tanobada ena anina lasi gaudia ese eda matana idia veria be namo lasi. To, nega ita atoa Iehova ia havaraia gaudia ita itaia namonamo, bona Dirava ena kara ita laloa dobu.​—Sal. 19:1.