Dirava ese Ia Havaraia Gaudia amo Iena Kara Idauidau Oi Dibaia

Flaoa mai ena kala idauidau, hisiu momo, eiava waterfall oi itaia neganai, Havaraia Tauna ese unai gaudia ia karaia dalana oi laloa, a? Ita badinai idia noho mauri gaudia ibounai ese Iehova ena kara idauidau idia hahedinaraia. (Ro 1:20) Bema nega ita atoa bona ita itaia gaudia ita laloa dobu, Dirava ena siahu, aonega, bona hahemaoro goeva do ita diba.​—Sa 104:24.

Iehova ese ia havaraia gaudia amo dina ta ta ai oi dibaia kara namodia haida be dahaka? Ena be taoni ai oi noho, to au bona manu idauidau oi itaia diba. Iehova ese ia havaraia gaudia ita laloa dobu karana ese ita ia durua lalohekwarahi ia hamaragia, mai anina bada gaudia ita laloa bada, bona iseda abidadama Iehova ena naria karana dekenai ia habadaia. (Mt 6:25-32) Bema oi be mai emu natudia, namona be idia oi durua Iehova ena kara namodia idia dibaia totona. Ita badinai idia noho mauri gaudia ibounai ita laloa bada neganai, iseda Havaraia Tauna kahirakahira do ita lao.​—Sa 8:3, 4.

VIDIO LADANA, DIRAVA ENA HAVARAIA GAUDIA ESE IENA HAIRAI IA HAHEDINARAIA​—DIARI BONA KALA ITAIA, BENA INAI HENANADAI HAERELAIA:

• Dahaka dainai kala idauidau ita itaia diba?

• Dahaka dainai ita gini dalana hegeregerena gau ta ita itaia neganai, ena kala ia idau?

• Dahaka dainai guba dekenai kala idauidau ita itaia diba?

• Emu ruma badinai Dirava ese ia havaraia gaudia amo dahaka kala haida oi itaia?

• Dahaka dainai nega ita atoa iseda badinai idia noho mauri gaudia ita itaia bona laloa dobu totona?