Vidio Ladana Jehovah’s Witnesses—Faith in Action, Part 1: Out of Darkness
Baibel ese diari be hereva momokani ida ia gwauraia hebou, bona dibura be hereva koikoi ida ia gwauraia hebou. (Sal. 43:3; Isa. 5:20) Satani ese Heva ia koia neganai, tanobada dekenai dibura ia vara, bona gabeai tanobada ibounai be dibura ese ia koua. (Apok. 12:9) Vidio ladana Jehovah’s Witnesses—Faith in Action, Part 1: Out of Darkness ese diari be dibura amo ia hedinarai matamaia dalana ia hahedinaraia. (Isa. 60:1, 2) Unai vidio oi itaia murinai, inai henanadai oi haerelaidia diba, a?
(1) Aposetolo taudia idia mase murinai, edena dala ai dibura ia bada ia lao? (2) Lagani 1100 bamona ai, dahaka ese taunimanima ia durua dainai, idia diba dubu idauidau be hereva momokani idia hadibaia lasi? (3) Henry Grew bona George Storrs be daidia? (4) Charles Russell ena mauri lalonai dahaka ese ena lalona idia senisia? (5) Edena dala ai Tadikaka Russell, ena tamana, bona edia bamodia ma haida ese Baibel idia stadilaia, bona dahaka idia dibaia? (6) Dahaka dainai Baibel idia stadilaia grup be Nelson Barbour ena grup ida idia gaukara hebou? Dahaka dainai Tadikaka Russell be unai grup ia rakatania? (7) July 1879 ai dahaka ia vara bena hereva momokani ena diari negana ia matamaia? (8) Unai murinai, Baibel Student taudia be dahaka idia karaia sivarai namona idia halasia totona? (9) Lagani momo lalonai, Baibel Student taudia idia laloa lagani 1914 ai dahaka do ia vara? (10) Tadikaka Russell ia mase murinai, Baibel Student taudia be dahaka hekwakwanai idia davaria? (11) Tadikaka Rutherford bona ena bamodia be dibura amo idia ruhaia murinai, Baibel Student taudia be dahaka idia karaia? (12) Edena dala ai vidio ese oi ia durua, Iehova ena orea dekenai emu laloparara bona tanikiu karana oi habadaia totona? (13) Edena dala ai vidio ese oi ia hagoadaia hekwakwanai idauidau lalonai oi haroro noho totona? (14) Edena dala ai vidio ita gaukaralaia eda varavara, stadi taudia, bona ma haida ita durua totona?
Baibel Student taudia ginigunadia ese ita dekenai hereva momokani idia hahedinaraia! Inai tanobada diburana lalonai, idia be mai gari lasi ida hereva momokani ena diari idia halasia. Namona be idia ita tohotohoa bona ‘diari natudia bamona do ita raka noho.’—Efe. 5:8.