Vidio Ladana Jehovah’s Witnesses—Faith in Action, Part 2: Let the Light Shine
Lagani 1919 ai, Tadikaka Rutherford bona ena bamodia be dibura rumana amo idia ruhaia murinai, Bible Student taudia be gaukara badana ta do idia karaia. Vidio ladana Jehovah’s Witnesses—Faith in Action, Part 2: Let the Light Shine ese ia hahedinaraia hegeregerena, Bible Student taudia edia inai taudia do idia momo, Baibel dekenai edia diba do ia bada ia lao noho, bona edia abidadama do idia hanamoa. (Aon. 4:18; Mal. 3:1-3; Ioa. 15:20) Unai vidio oi itaia murinai, inai henanadai oi haerelaia diba, a?
(1) Bible Student taudia be dahaka tulu idauidau idia gaukaralaia sivarai namona idia halasia totona? (2) Lagani 1931 bona 1935 edia hebouhebou dekenai, dahaka hadibaia hereva badana idia halasia? (3) November 1, 1939, The Watchtower ese dahaka hereva badana ia herevalaia? (4) Madison Square Garden ai, Tadikaka Rutherford ese tok ladana “Government and Peace” (“Gavamani bona Maino”) ia henia lalonai, dahaka ia vara? (5) Dahaka dainai Tadikaka Knorr ena tok ladana “Peace—Can It Last?” (“Maino—Do Ia Noho Daudau Diba, A?”) be idau momokani? (6) Lagani 1942 ai, Iehova ena Witnes taudia be dahaka palani idia karaia haroro gaukara idia habadaia totona? (7) United States, Canada, bona Greece ai idia karaia kota haida edia sivarai mani oi herevalaia. (8) Edena dala ai Gilead sikuli ese haroro gaukara habadaia karana ia durua? (9) Lagani 1946 ai dahaka gaukara badana ia hamatamaia, bona dahaka dainai? (10) Iehova ena Witnes taudia be Baibel ena taravatu idia badinaia totona, dahaka idia karaia? (11) Lagani 1970 lalodiai tadikaka be senisi haida idia karaia, badina idia ura orea lalonai idia badinaia dalana be Baibel ese ia gwauraia dalana hegeregerena; mani unai senisi haida oi gwauraia hedinarai. (12) Edena dala ai vidio ese oi ia durua oi laloparara Iehova be inai orea ia biagua bona hakaua? (13) Edena dala ai vidio ese oi ia hagoadaia hekwakwanai idauidau lalonai oi haroro noho totona? (14) Edena dala ai vidio ita gaukaralaia eda varavara, stadi taudia, bona ma haida ita durua totona?
Iehova ena Witnes taudia edia histori ese ia hahedinaraia idia be gau momo idia karaia vadaeni, bona hari unai bamona idia do karaia noho. Umui be edena bamona, emui hesiai gaukara umui goadalaia noho, a? Guna eda tadikaka taihu idia karaia bamona, ita gaukara goadagoada “diari do ia hedinarai” noho totona.—2 Kor. 4:6.