Taunimanima Durua Dirava Idia Kamonai Henia
1. ‘Dirava Ena Basileia Do Ia Mai!’ Distrik Hebouhebou ai edena buklet rua idia halasia? Dahaka dainai idia be buklet namodia?
1 ‘Dirava Ena Basileia Do Ia Mai!’ Distrik Hebouhebou ai buklet matamatadia rua idia halasia: Buklet namba 1 be Dirava Oi Kamonai Henia, bona buklet namba 2 be Dirava Oi Kamonai Henia Bena Oi Mauri Hanaihanai. Unai buklet rua edia hereva be momo lasi dainai, gado ma haida ai idia hahanaia haraga diba. Buklet namba 2 be English gado ai idia halasia neganai, ita idia hadibaia Hakaua Oreana be gwaumaoro ia henia vadaeni unai buklet be gado 431 ai do idia hahanaia.
2. Daika be unai buklet rua amo heduru do ia abia?
2 Unai buklet rua ese daika do ia durua? Mani tanobada ibounai dekenai idia vara haheitalai haida ita herevalaia:
• Pablisa ta be ruma tauna ida ia herevahereva (reana unai be nega ginigunana o lou henia), bona ia itaia ruma tauna be duahiduahi bona toretore ia diba lasi.
• Pablisa ta be haida ia haroro henidia. Iseda buka o magasin be edia gado ai ita hahanaia lasi eiava haida sibona ita hahanaia. Eiava teritori ai momo be edia gado ai idia hahanaia bukadia idia duahia be auka.
• Pablisa ta be saini gado ia gaukaralaia ena teritori ai idia noho taia kudima taudia ia haroro henidia.
• Tama ta o sina ta ia ura ena natuna dekenai hereva momokani ia hadibaia. Unai natuna be duahiduahi ia do diba lasi.
3. Buklet namba 1 be edena bamona idia karaia?
3 Buklet Rua Idia Karaia Dalana: Buklet namba 1, Dirava Oi Kamonai Henia ena hereva be momo lasi—rau ta ta ena henunai sentens ta bona siri idia noho. Dahaka dainai? Mani oi laloa: Ta ese buklet ta oi ia henia, to oi diba lasi gadona ai idia torea, bona laulau namodia momo idia noho. Do oi ura unai buklet oi duahia, a? Reana lasi. Unai hegeregerena, bema duahiduahi ia diba lasi tauna dekenai buklet ta oi henia to unai buklet dekenai hereva momo idia noho, do ia ura lasi abia, ani? Unai dainai, Dirava Oi Kamonai Henia buklet ena rau ta ta be mai ena laulau namodia, bona laulau ia hapararaia laini mai ena arrow ese oi do ia hadibaia laulau ta murinai edena laulau oi herevalaia be namo.
4. Buklet namba 2 be edena bamona idia karaia?
4 Buklet namba 2, Dirava Oi Kamonai Henia Bena Oi Mauri Hanaihanai be mai ena laulau, buklet namba 1 hegeregerena. Buklet namba 2 amo duahiduahi idia diba namonamo lasi o duahiduahi idia dibaia noho taudia ita stadi henia diba. Danu, bema stiuden be buklet namba 1 (Dirava Oi Kamonai Henia) ia gaukaralaia, stadi naria tauna be buklet namba 2 ia gaukaralaia diba. Buklet namba 2 ena rau ta ta ai henanadai badana ta ia noho, bona haere danu unuseniai idia noho. Danu, rau ta ta be mai edia laulau, hereva haida bona siri. Rau haida edia kona dekenai be maua ta ia noho—unuseniai idia noho point bona siri umui herevalaia diba, stiuden ena diba hegeregerena.
5. Edena negai bona edena dala ai buklet ita hariharilaia diba?
5 Buklet Rua Gaukaralaia Daladia: Ruma-ta-ruma-ta haroro gaukara ai unai buklet ta ita hariharilaia diba, herevana ia be hua ena henia gauna o lasi. (Maua ladana “Buklet Rua Hariharilaia Daladia” itaia.) Bema kamonai tauna ta oi lou henia, ia oi hadibaia oi ura buklet ta oi hahedinaraia, bena buklet oi henia diba.
6. Edena dala ai buklet rua amo stadi ita karaia diba?
6 Buklet namba 1 lalonai henanadai be lasi. Unai dainai unai buklet amo stadi oi karaia neganai, namo lasi Baibel Hadibaia bukana ena stadi hegeregerena oi karaia. Gabu momo ai taunimanima idia ura sivarai sibona idia kamonai. Unai dainai, buklet ena laulau amo Baibel ena sivarai oi herevalaidia. Mai ura bada ida buklet ena laulau ta ta edia anina oi herevalaia namonamo. Stiuden oi noia laulau ai dahaka ia itaia bona laloa. Siri oi duahidia bona edia anina oi herevalaia namonamo. Henanadai oi henia ena lalohadai ia herevalaia totona, unai amo do oi diba ia laloparara eiava lasi. Bema stiuden ida buklet namba 2 umui stadilaia, vadaeni laulau ta ta umui herevalaia neganai, idia torea herevadia bona siri umui duahia hebou.
7. Edena dala ai stiuden ita durua ia goada totona?
7 Stiuden Durua Ia Goada Totona: Stiuden ida unai buklet umui herevalaia karana ese ia do ia durua, bena do ia ura duahiduahi ia dibaia, unai amo ia sibona ese Iehova do ia dibaia. (Mat. 5:3; Ioa. 17:3) Unai dainai, bema stiuden ida buklet namba 1 umui stadilaia, bona oi itaia ena diba ia bada ia lao, reana oi hamaoroa duahiduahi dalana do oi hadibaia, bena buklet namba 2 umui stadilaia. Ena be unai buklet umui stadilaia haorea, to unai ese ia hahedinaraia lasi stiuden ia hegeregere bapatiso ia abia totona. Namona be Baibel Hadibaia bukana o buka ma ta umui stadilaia, unai amo stiuden be Baibel ai ena diba do ia habadaia.
8. Dahaka dainai inai buklet rua oi moalelaia?
8 Bema taunimanima idia ura idia mauri hanaihanai, namona be guba bona tanobada ia lohiaia Diravana idia kamonai henia. (Isa. 55:3) Iehova ia ura “taunimanima idauidau,” duahiduahi idia diba lasi taudia danu, ese ia idia kamonai henia dalana idia dibaia. (1 Tim. 2:3, 4) Ita moale bada badina inai buklet rua amo taunimanima ita durua diba Dirava idia kamonai henia totona!
[Box on page 3]
Buklet Rua Hariharilaia Daladia
Ruma tauna dekenai buklet ena rau 2 bona 3 oi hahedinaraia bona oi gwau: “Oi ura inai bamona tanobada ai oi noho, a? [Haere naria.] Baibel ia gwauhamata [o buka helaga ia gwauhamata] kahirakahira Dirava ese tanobada be gabu hairaina ai do ia halaoa, bona taunimanima be maino ai do idia noho, ta do ia ogogami o gorere lasi. Unuseniai ita noho totona do ita karaia gauna be inai siri ese ia herevalaia. [Isaia 55:3 duahia, ia be buklet ena rau 3 ai ia noho.] Unai siri ese ia hahedinaraia, namona be Dirava dekenai do ita lao bona ia do ita ‘kamonai’ henia. To edena dala ai Dirava do ita kamonai henia?” Rau 4 bona 5 kehoa bona haere herevalaia. Bema ruma tauna ia bisi, vadaeni buklet oi rakatania, bona dala oi karaia oi lou henia haere umui herevalaia totona.