Dirava Ena Sivarai Namona! Buklet Gaukaralaia Dalana
Buklet Matamatana amo Lou Henia Ita Karaia Bona Baibel Stadi Ita Hamatamaia
1. Hebouhebou ai edena buklet idia halasia bona unai ese ita do ia durua lou henia ita karaia bona Baibel stadi ita hamatamaia totona?
1 “Emu Kudouna Oi Gimaia!” Distrik Hebouhebou ai buklet matamatana ta ita abia, unai ese ita do ia durua lou henia ita karaia bona Baibel stadi ita hamatamaia totona. Inai buklet matamatana ese buklet gunana ladana Dirava Ia Ura Dahaka Ita Karaia? ena gabu ia abia, to idia ruaosi be taina idia hegeregere. To buklet matamatana ena karoa ta ta edia paragraf be idia kwadogi dainai, iduara ai Baibel stadi oi hamatamaia diba. To, Dahaka Ita Karaia? buklet be Keristani taudia ese do idia badinaia gaudia ia herevalaia, unai gaudia haida be stadi taudia matamatadia ese idia abia dae be auka, to Sivarai Namona! buklet ai Baibel ena sivarai namodia idia noho.—Kara 15:35.
2. Dahaka dainai Sivarai Namona! buklet idia karaia?
2 Dahaka dainai buklet matamatana idia karaia? Tadikaka momo idia ura, auka lasi dalanai idia hahanaia bukadia amo taunimanima edia lalona idia veria hereva momokani idia abia dae bona gabeai Baibel Hadibaia bukana idia stadilaia totona. Haida idia ura lasi buka ta idia duahia, to idia ura buklet amo Baibel idia stadilaia. Danu, buklet be gado momo ai idia hahanaia diba.
3. Edena dala ai inai buklet be stadi pablikeisen haida amo ia idau?
3 Buklet Idia Karaia Dalana: Iseda stadi pablikeisen momo idia karaia, unai amo ta ese ia duahia bona hereva momokani ia lalopararalaia diba, herevana ta ese ia stadi henia o lasi. To Sivarai Namona! buklet be ia idau sisina. Idia karaia dalana be tisa ia durua stiuden ia hakaua namonamo totona. Unai dainai, unai buklet be ta dekenai oi hariharilaia neganai, namona be paragraf ta o rua oi duahia bona herevalaia. Buklet ena karoa ta ta edia paragraf be kwadogi dainai, ruma iduarana ai o bisinesi gabunai ta ida oi herevalaia diba. Ena be buklet ena karoa 1 amo stadi oi hamatamaia be namo, to karoa ma ta dekenai stadi oi hamatamaia diba danu.
4. Edena dala ai buklet ese ita ia durua Baibel ita gaukaralaia totona?
4 Iseda pablikeisen momo lalonai, henanadai edia haere be paragraf ai idia noho. To, Sivarai Namona! buklet ai henanadai edia haere be Baibel lalonai idia noho. Momo idia ura lasi iseda pablikeisen amo diba idia abia to idia ura Baibel amo diba idia abia. Unai dainai, siri momo edia hereva be buklet ai idia torea lasi. Anina be Baibel sibona amo do oi duahia. Unai amo stiuden do ia laloparara ia dibaia gaudia be Dirava amo idia mai.—Isa. 54:13.
5. Dahaka dainai stadi naria tauna be stadi negadia ta ta totona ia hegaegae namonamo be mai anina bada?
5 Sivarai Namona! buklet ese siri momo ia herevalaia lasi. Dahaka dainai? Unai ese stiuden ia hagoadaia henanadai ia henia totona, bona tisa ia durua stiuden ia hadibaia namonamo totona. Unai dainai, stadi totona ita hegaegae namonamo be mai anina bada. To naria namonamo: Namo lasi oi hereva momo. Ita ura Baibel ita herevalaia. To nega haida stiuden ita noia siri edia anina dekenai ena lalohadai ia herevalaia be namo. Bema henanadai maorodia ita gaukaralaia, stiuden do ita durua siri ta ta edia anina ia lalopararalaia totona.—Kara 17:2.
6. Edena dala ai buklet ita gaukaralaia diba: (a) ruma-ta-ruma-ta haroro gaukara ai? (b) maoromaoro Baibel stadi ita hamatamaia totona? (c) lou henia ita karaia neganai?
6 Stadi pablikeisen ma haida bamona, Sivarai Namona! buklet ita hariharilaia diba, herevana ia be hua ena henia gauna lasi. Ita ura maoromaoro iduara ai stadi ita hamatamaia. Danu, hebouhebou ena haheitalai lalonai, tadikaka ta ia gwau, “Inai buklet amo lou henia namona oi karaia diba!”—Rau 11-13 ena maua itaia.
7. Edena dala ai buklet amo Baibel stadi oi karaia diba?
7 Stadi Karaia Dalana: Matamanai, toretore koremadia (bold) ai idia torea henanadai ita duahia. Bena, paragraf ita duahia bona “duahia” siri ita duahia. Henanadai maorodia ita gaukaralaia amo ruma tauna ita durua siri ena anina ia lalopararalaia. Dokonai, paragraf ma ta ita do karaia lasi lalonai, ruma tauna ita nanadaia henanadai ia haerelaia totona, unai amo do ita diba ia laloparara eiava lasi. Stadi ginigunadia lalonai, henanadai tamona sibona ita herevalaia be namo. To stadi gabediai, reana eda herevahereva ita halataia diba, karoa ibounai ita herevalaia totona.
8. Edena dala ai siri oi herevalaia, bona dahaka dainai?
8 Paragraf ai idia noho “duahia” siri ese henanadai ia haerelaia. Unai dainai, siri ta oi duahia neganai, namo lasi oi gwau, “Aposetolo Paulo ia gwau” o, “Iniseniai Davida ia gwau” o, “Ieremia ena peroveta herevana oi itaia.” Namo lasi unai bamona herevadia dainai, ruma tauna ia laloa ita be ia dekenai taunimanima edia hereva ita duahia. To namona be inai bamona ita hereva, “Dirava ena peroveta herevana ia gwau” o, “Baibel ena hereva oi itaia.”
9. Stadi lalonai idia torea siri ibounai ita duahia be namo, a?
9 Idia torea siri ibounai ita duahia eiava “duahia” siri sibona ita duahia be namo, a? Oi sibona ese unai oi abia hidi diba. Paragraf ai idia torea siri ibounai be mai edia badina. Unai siri ta ta ai hereva namodia idia noho bona umui herevalaia be gau badana. To nega haida, stiuden be nega lasi, ia moale lasi, o ia duahiduahi namonamo lasi dainai reana “duahia” siri sibona umui itaia diba.
10. Edena negai Baibel Hadibaia bukana ita stadilaia?
10 Baibel Hadibaia Bukana Stadilaia Negana: Bema ruma tauna ida Sivarai Namona! buklet ita herevalaia hanaihanai o stadilaia, vadaeni buklet ita stadilaia noho ela bona ita haorea o Baibel Hadibaia bukana dekenai ita hanaia diba. Pablisa ese Baibel Hadibaia bukana stadilaia negana idia laloa namonamo. Anina be, Baibel Hadibaia bukana ena karoa ginigunana amo stadi ita hamatamaia be namo, a? Oi sibona ese unai oi abia hidi diba. Ta ta ena diba be idauidau. To, bema buklet ai umui herevalaia topik be Baibel Hadibaia bukana amo umui habadaia, unai ese stiuden do ia durua bada.
11. Dahaka dainai buklet matamatana ita gaukaralaia be namo?
11 Haida be sivarai namona idia diba lasi dainai, iseda maduna hereadaena be inai: Sivarai namona ita harorolaia ita gwau, Dirava ena Basileia ia lohia, bena kahirakahira tanobada matamata do ia mailaia, unuseniai kara maoromaoro do ia noho! (Mat. 24:14; 2 Pet. 3:13) Ita diba unai sivarai do idia kamonai taudia momo be inai hereva dekenai do idia lalotamona: “Ororo dekenai idia raka mai noho taudia, edia aena be mai hairaidia danu. Badina be sivarai namona idia mailaia noho, maino ena sivarai idia gwauraia noho. Kwalimu bona hamauria herevana danu idia gwauraia noho. Siona dekenai idia gwau, ‘Oiemu Dirava be ia King noho.’” (Isa. 52:7) Namona be buklet matamatana ita gaukaralaia Dirava ena sivarai namona be eda teritori ai idia noho taudia ita durua totona!
[Picture on page 4]
(orena be rau 11, kolom 1 ai )
[Picture on page 11]
(Rau 4 amo)
[Box on page 12]
Ruma-Ta-Ruma-Ta Haroro Gaukara Dekenai:
● “Lau vadivadi badina lau ura oi dekenai Dirava ena lalohadai ta lau hahedinaraia. Oi laloa nega ta Dirava ese iseda hisihisi do ia haorea bona iseda mauri do ia hanamoa, a? [Haere naria.] Inai buklet ai ia noho Baibel siri be unai henanadai ia haerelaia. [Buklet oi henia, bena karoa 1 ena paragraf ginigunana bona 1 Timoteo 6:19 oi duahia.] Inai siri amo oi itaia, Dirava ia ura vaira negana ai iseda mauri ia namo, ani? [Haere naria.] Bema oi ura, inai buklet lau rakatania diba. Gabeai lau mai neganai, paragraf iharuana ita herevalaia diba bona Baibel amo inai henanadai ena haere ita tahua, ‘Edena dala ai Dirava ese taunimanima idia hahisia gaudia do ia haorea?’” Bema vadivadi ginigunana ai ruma tauna ia ura paragraf iharuana umui herevalaia, vadaeni paragraf iharuana bona siri toi umui duahia bona herevalaia. Bena lou henia dalana oi karaia, karoa 1 ena henanadai iharuana umui herevalaia totona.
● “Momo be hekwakwanai idia davaria neganai, idia ura guriguri. Nega haida oi guriguri, a? [Haere naria.] Oi laloa Dirava ese guriguri ibounai ia kamonai, o haida ia kamonai lasi? [Haere naria.] Inai buklet ai ia noho Baibel siri be unai henanadai ia haerelaia. [Buklet oi henia, bona karoa 12 ena paragraf ginigunana bona “duahia” siri umui duahia.] Dirava ia ura iseda guriguri ia kamonai henia dainai ita moale, ani? To Dirava ese iseda guriguri ia haerelaia totona, namona be Ia ita diba namonamo. [Karoa 2 oi kehoa bona hereva kwaradia oi poinia.] Bema oi ura, inai buklet be oi dekenai lau rakatania bona gabeai lau giroa mai neganai, unai henanadai edia haere be Baibel amo ita duahia diba.”
● “Hari momo be tanobada ai idia vara gaudia idia laloa momo. Oi laloa inai tanobada do ia namo eiava? [Haere naria.] Momo be Baibel amo sivarai namona idia dibaia neganai idia moale. Baibel ese ia haerelaia henanadai haida mani oi itaia.” Ia dekenai buklet oi henia bona oi noia buklet ena rau 32 ai henanadai ia itaia, ia ura henia gauna ia abia hidi totona. Bena ia abia hidi karoa oi kehoa bona stadi karaia dalana oi hahedinaraia. Bena lou henia dalana oi karaia, unai karoa ena henanadai iharuana umui herevalaia totona.
[Box on page 11]
Maoromaoro Stadi Hamatamaia:
● “Lau ura oi dekenai Baibel stadi kosi ta lau herevalaia. Inai buklet ena karoa ibounai be 15—idia ese oi do idia durua emu Baibel amo mai anina bada henanadai oi haerelaia totona. [Buklet ena vairana bona murina hahedinaraia.] Oi ura Baibel ena hereva oi lalopararalaia, a? [Haere naria.] Inai buklet gaukaralaia dalana mani lau hadibaia. [Karoa 3 ena henanadai namba 3 ena paragraf ginigunana herevalaia, bona Apokalupo 21:4, 5 duahia. Bema hegeregere, paragraf iharuana bona “duahia” siri duahia.] Bema oi ura, inai buklet be oi dekenai lau rakatania diba. Ai laloa nega tamona lalonai Baibel stadilaia karana oi tohoa. Bema unai stadi kosi oi moalelaia, vadaeni unai stadi ita karaia noho. Gabeai lau mai neganai, karoa 1 ita herevalaia diba. Oi itaia, ia be kwadogi, ani?”
[Box on page 13]
Lou Henia Dekenai Buklet Gaukaralaia:
● “Lau moale oi lau davaria lou. Oi dekenai inai buklet lau abia mai, ia ese oi do ia durua Baibel amo mai anina bada henanadai oi haerelaia totona. [Buklet oi henia, bona oi noia buklet ena rau 32 ai henanadai ia itaia.] Edena topik oi ura henia? [Haere naria. Ia abia hidi karoa kehoa.] Baibel ena haere oi davaria dalana be buklet amo mani lau hahedinaraia.” Stadi karaia dalana oi hahedinaraia totona, paragraf ta o rua bona “duahia” siri oi duahia bona herevalaia. Oi be Baibel stadi ta oi hamatamaia unai! Ruma tauna dekenai buklet oi rakatania, bona gabeai oi lou henia. Karoa ta umui haorea neganai, ruma tauna ese ia abia hidi karoa ma ta umui herevalaia, o buklet ena karoa 1 amo umui hamatamaia diba.