Baibel Stadi ta Davaria Daladia Faiv
1. Bema Baibel stadi ta davaria totona ita hekwarahi, dahaka do ita karaia, bona dahaka dainai?
1 Baibel stadi ta davaria totona oi hekwarahi, a? Namona be oi hesiku lasi. Iehova ena ura karaia totona idia hesiku lasi taudia be ia ese ia hanamodia. (Gal. 6:9) Inai dala faiv ese oi ia durua diba.
2. Edena dala ai maoromaoro stadi ta ita hamatamaia diba?
2 Maoromaoro Stadi Hamatamaia: Momo idia diba ita be Watchtower bona Awake! ita hariharilaia, to reana idia diba lasi ita be Baibel stadi ita hamatamaia. Ruma-ta-ruma-ta ai oi haroro neganai, maoromaoro stadi oi hamatamaia toho. Danu, kamonai taudia oi lou henia neganai, oi nanadaia bema idia ura Baibel idia stadilaia. Bema idia ura lasi, vadaeni buka o magasin oi abia lao loulou bona edia ura oi habadaia. Lagani momo lalonai tadikaka ta be headava tau bona hahine dekenai magasin rut ia karaia. Nega ta tadikaka be idia dekenai magasin matamatadia ia henia, bena ia raka gwauraia neganai ia giroa bona ia henanadai: “Umui ura Baibel umui stadilaia, a?” Ia hoa badina idia ura idia stadi. Hari unai tau bona hahine be idia bapatiso vadaeni.
3. Dahaka dainai ita gwau lasi hebou idia mai kamonai taudia be ta ese ia stadi henidia? Herevalaia.
3 Hebou Mai Taudia Nanadaia: Namo lasi oi laloa kongrigeisen hebou ai oi itaia kamonai taudia be ta ese ia stadi henidia. Tadikaka ta ia gwau: “Lau stadi henia taudia haida be hebou dekenai idia mai kamonai taudia.” Kongrigeisen ta ai bapatiso kekeni rua edia sinana be hemarai momo hahinena, bona taihu ta be ena lalona ia hadaia unai hahine ia hereva henia totona. Unai hahine be lagani 15 lalonai hebou ia lao, to nega momo hebou ia matamaia gwauraia neganai ia ginidae bona hebou ia ore neganai maoromaoro Kingdom Hall ia rakatania. Gabeai unai hahine be Baibel stadi ia abia dae bona taihu ta ai ia lao. Unai hahine ia stadi henia taihu ia gwau: “Lau sori badina lau naria ela bona lagani 15 murinai ia lau nanadaia bema ia ura ia stadi!”
4. Edena bamona do ita diba bema ta ia ura stadi?
4 Henanadai Bema Ta Ia Ura Stadi: Taihu ta be pablisa ma haida ia bamoa edia Baibel stadi itaia totona. Unai taihu be pablisa amo gwaumaoro ia abia bena stadi murinai stiuden ia nanadaia bema ta ia ura stadi. Lou henia ta dekenai Baibel Hadibaia bukana oi henia neganai, reana oi nanadaia: “Inai buka do ia moalelaia tauna ta oi diba, a?” Nega haida pablisa bona painia taudia be edia noho daladia dainai idia hegeregere lasi teritori ai idia davaria taudia idia stadi henia totona. Unai dainai namona be ma haida oi hadibaia, oi ura ta oi stadi henia.
5. Dahaka dainai kongrigeisen ai pablisa ta ena Witnes lasi adavana ita nanadaia bema ia ura stadi?
5 Witnes Lasi Adavana Nanadaia: Emu kongrigeisen ai pablisa haida edia adavadia be Witnes lasi taudia, a? Witnes lasi tau o hahine haida idia ura lasi edia adavana ida Baibel idia herevalaia, to reana do idia ura ma haida ese idia stadi henia. Bema oi ura pablisa ta ena Witnes lasi adavana oi stadi henia, namona be pablisa oi nanadaia guna.
6. Dahaka dainai stadi ta davaria totona guriguri karana be mai anina bada?
6 Guriguri: Guriguri karana be mai ena siahu. (Iam. 5:16) Iehova ia gwauhamata bema ita noia gauna be iena ura hegeregerena, do ia kamonai. (1 Ioa. 5:14) Tadikaka ta be Baibel stadi ta davaria totona ia guriguri, herevana ia bisi bada. Iena adavana ia laloa, bema stiuden be mai ena hekwakwanai tadikaka be mai ena nega unai stiuden do ia durua eiava. Unai dainai ena lalohekwarahi gauna ia gurigurilaia, bona Iehova ia noia ena adavana do ia durua stadi ta ia davaria totona. Iehova ese edia guriguri ia haerelaia. Wiki rua murinai, painia ta be tau ta ia davaria bona unai tau ia ura stadi dainai tadikaka dekenai ia henia. Tadikaka ena adavana ia gwau: “Bema oi laloa Baibel stadi karaia be mai ena hekwarahi, namona be Iehova oi noia oi ia durua, bona guriguri karana oi hadokoa lasi. Ai be unai ai karaia dainai, ai moale bada.” Guriguri hanaihanai karana amo Baibel stadi ta oi davaria diba bona “mauri ia lao henia dalana” dekenai ta oi durua karana do oi moalelaia.—Mat. 7:13, 14.