“Taunimanima Ibounai ida Maino ai Do Umui Noho”
1. Bema ruma taudia idia badu, edena Baibel sisibana ita badinaia be namo?
1 Iehova ena taunimanima be maino idia ura henia dainai, iseda haroro gaukara lalonai maino ita havaraia be namo. (Isa. 52:7) To, nega haida taunimanima haida idia badu badina edia ruma ai idia ita vadivadi henia. Unai bamona negadiai, dahaka ese ita do ia durua idia ida maino ai ita noho totona?—Roma 12:18.
2. Dahaka dainai lalohadai maorona ita abia be gau badana?
2 Lalohadai Maorona Abia: Haida be hereva momokani idia inai henia dainai idia badu, to ma haida be badina idauna ma ta dainai idia badu. Eiava ita be nega kererena ai ita vadivadi. Eiava ruma tauna be mai ena hekwakwanai dainai ia moale lasi. To bema sivarai namona dainai ia badu, namona be ita laloatao: Ia badu badina reana ena dubu ese ia hakaua kerere. (2 Kor. 4:4) Lalohadai maorona ita abia karana ese ita do ia durua ita haheauka bona ita badu haraga lasi.—Aon. 19:11, BHḡ.
3. Edena dala ai ita hahedinaraia ruma tauna ita matauraia?
3 Hemataurai Hahedinaraia: Eda teritori ai idia noho taudia momo be idia abia dae hahediba herevadia idia badinaia auka. (2 Kor. 10:4) Idia be mai edia maoro ita harorolaia sivaraina idia kamonai henia lasi o kamonai henia totona. Ita ura lasi ruma tauna ia abia dae hahediba herevadia ita gwauraia dika, o namo lasi ita hahedinaraia ita be Baibel ita diba momo bona ia be lasi. Bema ita ia noia ena ruma ita rakatania, namona be mai hemataurai ida ena ruma ita rakatania.
4. Mai gado namo ida ita hereva ena anina be dahaka?
4 Mai Gado Namo ida Hereva: Bema ruma tauna be ita ia hereva dika henia, namona be mai manau bona gado namo ida ita hereva. (Kol. 4:6; 1 Pet. 2:23) Ita hepapahuahu o heai lasi, to lalotamona ia havaraia herevadia ita gwauraia. Reana mai manau ida ruma tauna ita nanadaia dahaka dainai ita ia badu henia. To, ruma tauna ita habadua lasi totona, nega haida ruma ita rakatania haraga be namo.—Aon. 9:7; 17:14.
5. Bema haroro gaukara ai maino karana ita hahedinaraia, dahaka namo do ia vara?
5 Bema ruma tauna ida maino ai ita noho, reana iseda kara namona do ia laloatao bona nega ma ta ai pablisa ta be ia dekenai ia haroro neganai, do ia kamonai. (Roma 12:20, 21) Ena be nega haida ta be ita do ia dagedage henia, to reana nega ta ai, ia be eda tadikaka ai do ia lao. (Gal. 1:13, 14) Herevana ta be hereva momokani ia abia dae o lasi, to bema sibona ita biagua bona maino karana ita hahedinaraia, ita ese Iehova ena ladana do ita abia isi bona eda hadibaia herevana do ita hahairaia.—2 Kor. 6:3.