Eda Haroro Gaukara Ita Karaia Namonamo Dalana—Ia Badu Ruma Tauna Haere Henia Dalana

Dahaka Dainai mai Anina Bada? Haroro gaukara ai ita davaria taudia momo idia hemataurai. To, Iesu ia peroveta haida ese ita do idia inai henia. (Ioa. 17:14) Unai dainai, ita hoa lasi bema ruma tauna ia badu. Unai ia vara neganai, ita ura unai tauna ita haere henia dalana amo Iehova ita hamoalea. (Roma 12:17-21; 1 Pet. 3:15) Unai bamona ita karaia neganai, hekwakwanai do ia hamaragia. Danu, eda kara namo ese ruma tauna bona ma haida dekenai haroro namona do ia henia, bona reana Iehova ena Witnes taudia idia vadivadi lou neganai, do ia kamonai.—2 Kor. 6:3.

Karaia Dalana:

Namona be ita manau. Badina unai kara ese hekwakwanai ia hamaragia. Ruma tauna ia badu dainai, ita badu haraga lasi. (Had. 7:9) Reana hekwakwanai haida ia davaria eiava nega kererena ai ita vadivadi dainai ia badu. Danu, reana haida ese ia idia hakaua kerere dainai ita gwauraia hereva dekenai ia badu.—2 Kor. 4:4.
Mai manau bona gado namo ida oi haere. (Aon. 15:1) Reana ruma tauna ena mahuta oi hadikaia, a? Eda gaukara dainai sori herevana ita gwauraia lasi, to reana nega kererena ai ita lao dainai, mai manau ida ita sori. Haida amo ita idia sivarailaia koikoi herevadia ia kamonai dainai ia badu, a? Bema oibe, reana oi gwau: “Lau laloparara dahaka dainai oi badu. To, oi kamonai sivaraidia be momokani lasi. Ia namo unai lau herevalaia?” Reana ia be ita abia dae herevadia, ta atoa siri karana o rara abia lasi karana, ia hepapahuahulaia, a? Reana oi gwau diba: “Lau laloparara. Haida be unai idia daradaralaia danu. Ia namo Baibel amo unai lau hahedinaraia?”
Bema ruma tauna ia badu dikadika, namona be oi haere lasi bona ia oi rakatania. Bema ia gwau, ia ura lasi Iehova ena Witnes taudia ese ia idia vadivadi henia, vadaeni ia ita rakatania.

Hari Hua Oi Tohoa Gauna be Inai:

Ruma bese ena tomadiho negana ai haheitalai haida umui karaia.
Ia badu ruma tauna umui rakatania murinai, oi ia bamoa pablisa ida ruma tauna umui haere henia dalana umui herevalaia.