Sivarai Namona Ita “Gwauraia Hedinarai Namonamo”
1. Paulo ese ena hesiai gaukara be edena bamona ia karaia dainai, ia be haheitalai namona?
1 Emu hesiai gaukara do “oi karaia namonamo.” (2 Tim. 4:5, Buka Helaga) Aposetolo Paulo be ena hesiai gaukara ia karaia namonamo dainai, Timoteo ia hagoadaia unai bamona ia karaia totona. Hegeregere, lagani 47 C.E. ela bona lagani 56 C.E. lalodiai, Paulo ese ena misinari loaloa toiosi ia hagugurua. Baibel bukana Kara ia gwau loulou, Paulo ese sivarai namona “ia gwauraia guguru.” (Kara 28:23) Edena dala ai Paulo ita tohotohoa diba?
2. Edena dala ai ruma-ta-ruma-ta haroro gaukara ita karaia namonamo diba?
2 Ruma-ta-Ruma-ta Ai: Bema ruma tauna ta be sivarai namona ia do kamonaia lasi, reana dina idauna ma ta ai ita vadivadi henia be namo. Reana ia be adorahi kahanai o wikeni ai ruma ai do ita davaria. Namona be ita hekwarahi ruma-ta-ruma-ta ai ita haroro totona, ena be ta ia noho lasi, to ita vadivadi loulou ela bona ita davaria. To bema ta ita davaria lasi be edena bamona? Reana leta o telefon amo ita haroro henia diba.
3. Edena nega bona gabu idauidau ai sivarai namona oi gwauraia hedinarai?
3 Nega Bona Gabu Idauidau Ai: Hari, Iehova ena hesiai taudia ese “aonega” be kamonai taudia dekenai idia harorolaia. Nega haida “hanua” o “hoihoi gabudia dekenai” unai bamona idia karaia. (Aon. 1:20, 21) Dina ta ta ai eda gaukara idauidau ita karaia neganai, haida haroro henia daladia ita laloa noho, a? Eda ‘nega bada ita gaukaralaia Dirava ena hereva ita harorolaia totona,’ a? (Kara 18:5) Bema unai bamona ita karaia, sivarai namona ita “gwauraia hedinarai namonamo” unai.—Kara 10:42; 17:17; 20:20, 21, 24.
4. Edena dala ai guriguri bona laloa dobu karana ese ita ia durua sivarai namona ita gwauraia namonamo totona?
4 To nega haida, reana ita hemarai o eda manoka gauna ma ta dainai ita haroro be ia auka. Laloatao: Iehova be eda goada ena hetoana ia lalopararalaia. (Sal. 103:14) Unai dainai, herevana ita hemarai o dahaka, to guriguri amo Iehova ita noia diba, bena goada do ia henia ita haroro totona. (Kara 4:29, 31) Danu, ita sibona be Dirava ena Hereva ita stadilaia o laloa dobu neganai, namona be sivarai namona ena namo ita laloa bada. (Fili. 3:8) Unai ese ita do ia doria mai eda ura ida sivarai namona ita harorolaia totona!
5. Edena dala ai Ioela ena peroveta herevana ita durua diba?
5 Ioela ia peroveta, Iehova ena dina badana mai garina ia do ginidae lasi lalonai, Dirava ena taunimanima ese haroro gaukara do idia karaia noho bona gau ta ese edia dala do “ia koua lasi.” (Ioe. 2:2, 7-9) Namona be mai eda ura ibounai ida gabeai do ita karaia lou diba lasi gaukarana be hari ita karaia!