‘Hadibaia Bona Haroro’ Gaukara Goadalaia
1 Paulo be Iesu bona guna idia noho abidadama hesiai taudia bamona, ia be sivarai namona ia harorolaia goadagoada tauna, herevana ena noho dalana ia auka, to ‘ia hadibaia bona ia haroro.’ Ruma ta ai idia hadiburaia neganai danu, ia idia “vadivadi taudia ibounai ia abia dae. Dirava ena Basileia ia harorolaia, bona Lohiabada Iesu Keriso ena sivarai ia hadibaia. Ia hereva mai goada danu.”—Kara 28:16-31.
2 Ita danu nega ibounai ‘hadibaia bona haroro’ gaukara ita goadalaia diba. Dala ta be sekit bona distrik hebouhebou dekenai ita lao bona ita mai neganai, ita hedavari taudia ita haroro henidia.—Kara 28:23; Sal. 145:10-13.
3 Nega Bona Gabu Idauidau ai Haroro be Dahaka? Nega bona dala idauidau ai ita haroro be ia vara kava gauna lasi eiava ita ura karaia gauna lasi, hegeregere ia be ita palanilaia lasi eiava laloa bada gauna bamona lasi. Unai ese iseda haroro gaukara ia hahedinaraia lasi. Paulo bamona, ita dekenai iseda haroro gaukara amo Dirava ita hanamoa be mai anina bada, bona namona be iseda lalona ita hadaia dala ia kehoa bona taunimanima ita hedavari henia neganai ita haroro totona. To, taunimanima ita haroro henia dalana ita gwauraia diba nega bona gabu idauidau ai haroro—unai be, hereva haraga lasi, hetura dalanai, bona vaia ita karaia bamona. Unai haroro dalana ese anina namona ia havaraia diba.
4 Haroro Totona Oi Hegaegae: Roma ai, Paulo be ruma ai idia hadiburaia neganai, dala ia karaia ia haroro totona. Iena noho gabuna amo, dala ia karaia Iuda gunalaia taudia be iena ruma dekenai ia boiridia mai totona. (Kara 28:17) Ena be Roma ai Keristani kongregesen ta ia noho, to Paulo ia diba unai siti ai idia noho Iuda taudia be Keristani abidadama idia diba namonamo lasi. (Kara 28:22; Roma 1:7) Iesu Keriso bona Dirava ena Basileia “ia hadibaia bona ia harorolaia” karana ia hadokoa lasi.
5 Gabu ta oi lao neganai, reana oi hereva henia taudia ibounai be Iehova ena Witnes taudia idia diba namonamo lasi mani oi laloa guna. Reana idia diba lasi ita ese davana lasi Baibel stadi ita karaia. Peleini amo, PMV amo, bouti amo, eiava ma dala haida amo oi loaloa neganai, oi davaria taudia haroro henia totona, oi hegaegae be namo. Palani oi karaia guna dahaka do oi gwauraia, hereva oi hamatamaia bona nega sisina lalonai oi haroro totona. Oiemu dekena taudia, varavara taudia, gaukara turadia, bona turadia dekenai nega bona dala idauidau ai oi haroro henidia toho.
6 Nega bona dala idauidau ai oi haroro neganai, namona be buka bona magasin momo oi abia. Edena gaudia? Reana Oi Ura Baibel Do Oi Diba Namonamo, A? pepapepana oi gaukaralaia diba. Paragraf ginigunadia faiv oi hahedinaraia, unuseniai Baibel duahia karana ena badina idauidau ia herevalaia. Davana lasi Baibel stadi noia totona murina ia noho mauana hahedinaraia. Kamonai tauna ta oi davaria neganai, Dahaka Ita Karaia? buklet oi hariharilaia. Gado idauna idia hereva taudia do oi davaria dainai, unai gado dekenai pepapepa haida oi abia lao. Iniseni Papua New Guinea dekenai, English, Hiri Motu, New Guinea Pidgin, bona China gado pepapepa be mai anina bada ita hedavari henia taudia idauidau ita haroro henia totona. Unai pepapepa be kongregesen amo oi oda diba. Danu, tano ta amo ia mai bona English gado ia diba lasi tauna oi davaria neganai, Good News for All Nations buklet ese reana oi ia durua diba. Rau 2 ai, haroro totona gaukaralaia dalana ia herevalaia.
7 Oiemu Toana Bona Kara Oi Laloa: Namo lasi iseda kara bona toana ese haida dekenai lalohadai kererena ia henia eiava Iehova ena orea idia ‘hereva dika’ henia. (Kara 28:22) Hebouhebou ta ita lao henia negana sibona ai ita hahedinaraia lasi to ita loaloa bona laga-ani neganai danu. August 1, 2002, Gima Kohorona, rau 30, paragraf 14, ia gwau: “Herahera gaudia mai sitaelo, dabua idaudia, lebulebu toana, tauanina ena kahana idia hahedinaraia dabua, eiava hari idia karaia dabua ena toana ita hahedinaraia lasi. To namona be iseda dabua toana amo ita hahedinaraia ‘Dirava ita matauraia.’ Unai ita lalohadailaia be namo, ani? Do ita gwau lasi unai ena anina be kongregesen heboudia [eiava hebouhebou] ita lao henidia neganai dabua namona ita atoa, to hebou lasi negadiai ita laloa lasi edena bamona dabua ita atoa. Lasi. Namona be nega ibounai iseda dabua amo Dirava matauraia bona hanamoa toana ita hahedinaraia, badina dina ena hora ibounai 24 lalonai ita be Keristani taudia bona hesiai taudia.”—1 Tim. 2:9, 10.
8 Namona be mai manau bona hemataurai ida dabua ita atoa. Bema iseda dabua bona kara amo nega ibounai iseda abidadama Dirava dekenai ita hahedinaraia, nega bona dala idauidau ai do ita haroro diba badina iseda dabua ena toana dainai do ita hemarai lasi.—1 Pet. 3:15.
9 Nega Bona Dala Idauidau ai Haroro ese Anina Ia Havaraia: Roma ai, lagani rua Paulo be ruma ta ai idia hadiburaia neganai, ena haroro goadagoada ena anina namona ia itaia. Luka ia gwau: “Haida be Paulo ena hereva idia abia dae.” (Kara 28:24) Paulo ese sibona ena ‘hadibaia bona haroro’ gaukara ia laloa, inai ia torea neganai, ia gwau: “Lau dekenai idia vara gaudia ese Sivarai Namona idia koua lasi. Lasi, inai lauegu hisihisi ese Sivarai Namona ia durua bona ia hatubua noho. Badina be Kaisara ena ruma idia gimaia tuari taudia ibounai, bona iniseni idia noho taudia ibounai danu idia diba vadaeni, Keriso ena hesiai gaukara dainai lau be dibura ruma dekenai lau noho. Bona Keristani varavara taudia momo ese lau idia laloa, Keriso dainai dibura lalonai lau noho. Vadaeni inai idia laloa noho dainai, edia lalona ese goada idia davaria. Edia gari idia laloa lasi, bona Sivarai Namona idia harorolaia goada noho.”—Fili. 1:12-14.
10 Lagani gunanai, headava tau bona hahine be distrik hebouhebou idia abia murinai, anina ia havaraia ekspiriens ta idia abia, aniani gabunai ia gaukara hahine ta ese edia lapel kadi totona ia nanadaia neganai, idia haroro henia. Hebouhebou totona idia hadibaia bona taunimanima edia vaira negana totona Baibel ese ia henia helaro namona idia herevalaia danu. Ia dekenai Oi Ura Baibel Do Oi Diba Namonamo, A? pepapepa idia henia bona davana lasi Baibel stadi karaia dalana idia hadibaia. Unai hahine ia gwau ia ura ta ese ia vadivadi henia, pepapepa ena murinai iena ladana bona adres ia torea, bona unai hahine bona tau ia noia dala idia karaia totona. Unai hegeregerena, ‘hadibaia bona haroro’ gaukara oi goadalaia amo dahaka namo do oi davaria?
11 Sivarai Namona Harorolaia Goadagoada: Paulo ia kamonai Keristani tadikaka haida be iena haheitalai namona idia badinaia noho neganai, mani ena moale oi laloa! Ita hekwarahi ita abia dae Baibel herevadia be nega bona dala idauidau ai ita harorolaia amo sivarai namona ita halasia.
[Study Questions]
1, 2. Edena bamona Paulo ese sivarai namona harorolaia gaukarana ia laloa dalana ese emu lalona ia hagoadaia, bona edena dala ai ena ‘hadibaia bona haroro’ dalana ita tohotohoa diba?
3. Edena dala ai iseda nega bona dala idauidau ai haroro karana be ia vara kava karana ta ai ita halaoa diba?
4. Dahaka ese Paulo ia hagoadaia ia noho gabuna dekenai ia haroro totona?
5, 6. Edena bamona gabudia dekenai reana nega bona dala idauidau ai ita haroro, bona edena dala ai ita hegaegae diba unai ita karaia namonamo totona?
7, 8. Ita loaloa bona laga-ani neganai, iseda toana bona kara dekenai dahaka sisiba ita badinaia be namo?
9. Roma ai, Paulo be haroro gaukara ai dahaka anina namona ia davaria?
10. Headava tau bona hahine edia haroro ai dahaka namo idia davaria?
11. Dahaka ita karaia be namo ‘hadibaia bona haroro’ gaukara amo sivarai namona ita habadaia totona?
[Box on page 3]
Nega Bona Dala Idauidau ai Haroro Totona Ita Gaukaralaia Gaudia
■ Oi Ura Baibel Oi Diba Namonamo, A? (pepapepa)
■ Dirava Ia Ura Dahaka Ita Karaia? (buklet)
■ Good News for All Nations (buklet)
■ Buka bona magasin ma haida
[Box on page 4]
Idia Umui Laloaboio Lasi!
Daidia do ita laloaboio lasi? Keriso ena mase ena Memorial hebouna eiava pablik tok badana idia kamonai taudia ibounai. Ia mai sekit hebouhebou bona inai lagani ena distrik hebouhebou dekenai idia ita boiria mai diba. Bema idia momo be mai hebogahisi ida ita hagoadaia, do idia mai. Iseda sekit bona distrik hebouhebou ai hebamo namona bona hagoadaia lauma program idia moalelaia lalonai, idia be Iehova bona iena orea kahirakahira dekenai do idia mai. Idia ita boiria bona ita itaia dahaka do ia vara, ani? Do idia diba gaudia ibounai oi hadibaia, sekit bona distrik hebouhebou ena deit, sekit bona distrik hebouhebou gabudia dekenai lao dalana, ena matamaia bona ore negana. June 8, 2003, Awake! ena murinai distrik hebouhebou ena program ia herevalaia kahana ita herevalaia. Unai kahana ita hahedinaraia diba kamonai taudia edia ura ita habadaia totona.