Sivarai Namona Buklet amo Stadi Hamatamaia
1. Sivarai Namona buklet be edena bamona idia karaia?
1 July ai Iseda Basileia Gaukara pepana ese ia hahedinaraia, iseda hadibaia gaukara lalonai ita gaukaralaia tulu namona ta be Dirava Ena Sivarai Namona buklet! Buklet ai idia torea Baibel siri edia hereva be buklet lalonai idia noho lasi, to ruma tauna ese unai siri ta ta be ena Baibel amo ia duahia diba. Iseda pablikeisen momo idia karaia dalana be duahia tauna sibona ese Baibel ena hereva ia dibaia, to Dirava Ena Sivarai Namona buklet idia karaia dalana be hadibaia tauna ta ia noho be namo bena ia ida unai do idia herevalaia hebou. Unai dainai, bema ruma tauna dekenai buklet ita hariharilaia, namona be stadi karaia dalana ita hahedinaraia, unai amo ruma tauna ese Baibel amo sivarai namona dibaia dalana do ia moalelaia bada.—Mat. 13:44.
2. Vadivadi ginigunana ai Sivarai Namona buklet be edena dala ai oi gaukaralaia diba?
2 Vadivadi Ginigunana: Reana oi gwau: “Lau mai ena badina be, taunimanima be vaira negana ai do idia vara gaudia idia laloa momo. Oi laloa mauri be do ia namo eiava? [Haere naria.] Baibel lalonai sivarai namona ia noho bona ita dekenai helaro ia henia. Baibel ese ia haerelaia henanadai haida mani ita itaia.” Ruma tauna dekenai buklet oi henia bona oi hamaoroa rau 32 ai ia noho henanadai ta ia abia hidi. Bena ia abia hidi henanadai ena paragraf ginigunana amo stadi karaia dalana oi hahedinaraia. Dala ma ta be, ruma tauna ena lalona oi veria totona oi abia hidi henanadai ta oi henia bena buklet oi hahedinaraia, Baibel ena haere ia tahua totona. Bema unai stadi kahana be jw.org ai ia noho vidio ta ese ia herevalaia, pablisa haida ese unai vidio idia gaukaralaia diba.
3. Edena dala ai Sivarai Namona buklet amo stadi oi karaia diba?
3 Stadi Oi Karaia Dalana: (1) Namba badinai ia noho toretore koremadia ai idia torea henanadai oi duahia guna, ruma tauna ese point badana ia laloa totona. (2) Bena paragraf oi duahia. (3) “Duahia” siri umui duahia, bona henanadai maorodia oi gaukaralaia, unai amo ruma tauna do ia laloparara idia torea henanadai be Baibel ese ia haerelaia. (4) Bema henanadai henunai paragraf ma ta ia noho, kahana 2 bona 3 oi badinaia. Bema unai henanadai be vidio ta ese ia haerelaia bona ruma tauna dekenai oi do hahedinaraia lasi, oi hahedinaraia diba. (5) Dokonai, oi noia idia torea henanadai ia haerelaia unai amo do oi diba ruma tauna ia laloparara eiava lasi.
4. Sivarai Namona buklet gaukaralaia namonamo totona dahaka ita karaia be namo?
4 Sivarai Namona buklet gaukaralaia dalana oi diba be namo. Ruma taudia idia kamonai namonamo neganai buklet oi gaukaralaia. Stadi oi do hamatamaia lasi neganai, stiuden do oi durua dalana oi laloa guna, bona paragraf ai ia noho siridia oi gaukaralaia diba. (Aon. 15:28; Kara 17:2, 3) Haroro daladia idauidau oi manadalaia neganai, reana inai buklet sibona do oi gaukaralaia taunimanima dekenai hereva momokani oi hadibaia totona.