Henanadai Mauana—1

◼ Keristani heboudia bona haroro gaukara ai mobael fon gaukaralaia karana dekenai, edena hakaua herevadia Baibel ai ita badinaia?

‘Gau Ibounai be mai Edia Nega Korikori.’ (Had. 3:1): Nega momo taunimanima be mobael fon amo teks mesiji idia siaia o herevahereva. To, nega haida Keristani taudia idia ura lasi edia mobael fon ese edia gaukara ia hadikaia. Hegeregere, iseda hebou negadiai Iehova ita tomadiho henia, Baibel amo hadibaia herevadia ita abia, bona ita hagoadaia heheni. (Deu. 31:12; Sal. 22:22; Roma 1:11, 12) Hebou gabunai ita ginidae neganai, reana eda mobael fon ita koua bena hebou murinai eda teks mesiji ita sekea diba, ani? Bema gau haida dainai ita ura lasi eda fon ita koua, vadaeni volium ita koua, unai amo haida edia kamonai karana ia hadikaia lasi.

“Sivarai Namona Totona Gau Ibounai Lau Karaia.” (1 Kor. 9:23): Nega haida badina haida dainai haroro gaukara ai mobael fon ita gaukaralaia. Hegeregere, grup naria tadikaka ese teritori ai pablisa haida ia sekea totona, reana ena mobael fon amo ia rini henidia diba. Pablisa haida edia lou henia o Baibel stadi be gabu daudau ai idia noho dainai, mobael fon amo idia rini henia guna bena idia vadivadi. Bema mobael fon ita abia loaloa, namona be ena volium ita koua, unai amo ruma tauna ida eda herevahereva karana ia hadikaia lasi. (2 Kor. 6:3) Pablisa ma haida ita naria noho lalonai, namo lasi mobael fon amo turana ta ita rini henia o teks mesiji ita siaia, unai amo haroro gaukara bona ita bamoa pablisa ita laloa bada, ani?

Ma Haida Edia Namo Ita Laloa. (1 Kor. 10:24; Fili. 2:4): Ita ura lasi haroro grup ena hebou dekenai ita leiti momo, badina reana ita laloa fon amo pablisa ta ita rini henia o teks mesiji ita siaia grup ia haroro gabuna ita diba totona. Ita ginidae leiti neganai, nega momo grup idia haria lou. Momokani, reana gau haida dainai nega haida do ita leiti. To, bema hanaihanai nega korikori ai ita ginidae, ita hahedinaraia Iehova ese ita ia hakaua dalana, grup ia naria tadikaka, bona pablisa ma haida ita matauraia.