Kamonai Taudia Ibounai Lou Henia
1 Hari, ita momo be hereva momokani lalonai ita noho, badina Basileia ena sivarai ita ura henia karana be ta ese ia itaia bona mai haheauka ida ita ia lou henia, unai ura ia habadaia totona. Unai dainai, kamonai taudia ibounai ita laloa bada bona ita lou henidia be namo. Oibe, kamonai taudia ita lou henidia be ‘diba tahua taudia ai idia do ita halaoa’ gaukarana ena kahana ta.—Mat. 28:19, 20.
2 Kamonai Tauna Dibaia Dalana: Ena be ta be buka o magasin ia abia lasi, to ena vairana ena toana, gadona ena regena, eiava ena hereva amo ia hahedinaraia diba, ia be Basileia ena Sivarai namona ia ura kamonai. Unai bamona tauna ita lou henia be namo. Tadikaka ta be wiki 5 lalonai kamonai tauna ta ia lou henia, to unai tauna be buka eiava magasin ta ia abia lasi. Lou henia namba 6 ia karaia neganai, kamonai tauna ese buka ta ia abia bona Baibel stadi idia hamatamaia.
3 Bema, oi itaia ta be ia ura kamonai, dina haida sibona murinai oi lou henia haraga be namo. Nega oi henia lasi Satani ese kamonai tauna ena kudouna dekenai oi hadoa gauna ia kokia totona. (Mat. 13:19) Bema oi gwauhamata do oi lou henia, namona be unai dina ai oi giroa lou be namo.—Mat. 5:37.
4 Dala Gaukara: Dala dekenai magasin gaukara oi karaia eiava ma gabu haida dekenai oi haroro neganai, idia kamonai taudia oi lou henia, a? Reana emui herevahereva dokona ai, inai bamona oi hereva diba: “Lau moale bada ita ruaosi ita herevahereva dainai. Dala ta ia noho oi lau hereva henia lou totona, a?” Bema ia hegeregere, pablisa haida ese kamonai tauna dekenai edia telefon namba idia henia, eiava kamonai tauna idia nanadaia bema ia hegeregere ena telefon namba do idia abia. Bema, taunimanima ese nega ibounai oi idia itaia gabu tamona dekenai magasin gaukara oi karaia, reana do idia gari lasi edia telefon namba idia henia totona. To, bema idia ura lasi, ma nega ta oi itaia lou neganai, edia ura oi habadaia totona, oi haroro henidia lou diba.
5 Uma dekenai ita hadoa gaudia ita dairia bona ita itaia idia tubu neganai, ita moale bada. Unai hegeregerena, kamonai taudia ita lou henidia bona ita durua Dirava kahirakahira ai idia lao neganai, do ita moale bada. (1 Kor. 3:6) Mani emu kara idia kamonai taudia ibounai oi lou henia be namo.