Henanadai Mauana

◼ Pablisa ta be bapatiso ena gwaumaoro ia do abia lasi neganai, nega ibounai ia be kongrigeisen heboudia ia lao bona haroro gaukara ia karaia, a?

Bapatiso abia karana be abia hidi o disisen badana. Unai dainai, pablisa ta be bapatiso ia do abia lasi neganai, namona be Dirava ena taravatu ia lalopararalaia namonamo guna, bona ena mauri lalonai ia hahedinaraia unai taravatu ia badinaia noho.

Baibel ese Keristani taudia ia hagania hebou karana idia rakatania lasi. Unai dainai, namona be bapatiso lasi pablisa be nega ibounai ia hahedinaraia, ia be kongrigeisen heboudia ia laloa bada. (Heb. 10:24, 25) Danu, hebou lalonai haere ia henia. Reana Tiokratik Haroro Sikuli ai ia vareai, ena be unai gauna dekenai taravatu ta be lasi.

Danu, Iesu ese Keristani taudia ia hagania sivarai namona idia harorolaia bona hahediba taudia halaoa gaukarana idia karaia be namo. Unai dainai, bapatiso lasi pablisa ia haroro hanaihanai be namo. (Mat. 24:14; 28:19, 20) To hua hida lalonai do ia haroro ela bona ia bapatiso? Namona be elda idia naria o nega idia henia, unai amo do idia itaia pablisa be hua ta ta ai ia haroro. (Sal. 78:37) To, namona be ia haroro matamaia negana amo ela bona bapatiso do ia abia negana be ia daudau lasi, reana hua haida be hegeregere. Haroro gaukara ai hora hida ia ripotilaia be namo? Unai gauna dekenai taravatu ta be lasi. Elda ese pablisa ta ta edia noho dalana idia laloa namonamo be namo.—Luka 21:1-4.

Elda (o hesiai taudia, bema elda be momo lasi) be bapatiso ia abia gwauraia pablisa ida bapatiso ena henanadai idia herevalaia hebou neganai, namona be idia laloatao: Pablisa ta ta edia mauri be idauidau dainai, idia tahua namonamo pablisa ia hegeregere ia bapatiso totona eiava lasi. Idia itaia gauna be, pablisa ia ura bada Iehova ena Witnes ta ai ia lao, bona ia diba Iehova ena orea ia bamoa bona haroro gaukara ia karaia be hahenamo badana. Elda idia diba, bapatiso lasi pablisa be ia do goada momokani lasi o haroro daladia ia do diba namonamo lasi. Bema elda idia laloa pablisa ta ia hegeregere lasi ia bapatiso totona, namona be edia disisen ena badina be Baibel amo idia hahedinaraia, bona dala idia karaia pablisa ese heduru maorona ia abia totona.