Eda Haroro Gaukara Ita Karaia Namonamo Dalana—Taunimanima Edia Ekskius o Koua Herevadia Haerelaia
Dahaka Dainai mai Anina Bada? Mani oi laloa: Bema sunami o disasta ta be kahirakahira do ia ginidae, oi diba taunimanima be do idia mase bema gabu namona dekenai idia heau lao lasi. Bena emu neiba ta ena ruma dekenai oi lao, oi ura oi hadibaia, to emu hereva ia koua, ia gwau ia bisi. To, emu neiba oi rakatania haraga lasi badina oi ura ia oi durua noho ela bona ia roho mauri! Iseda teritori ai, momo idia ura lasi eda hereva idia kamonai, to ita be hahemauri sivaraina ita harorolaia. Reana idia bisi negadiai ita vadivadi. (Mat. 24:37-39) Eiava reana haida ese ita idia sivarailaia koikoi herevadia idia kamonai dainai, ita idia dadaraia. (Mat. 11:8, 9) Eiava reana idia gwau ita be huahua dikadia idia havaraia dubu ma haida hegeregeredia. (2 Pet. 2:1, 2) Bema ruma tauna ese ekskius o koua hereva ta ia gwauraia, namona be ita rakatania haraga lasi to ita haroro noho.
Karaia Dalana:
• Ruma-ta-ruma-ta haroro gaukara oi do lao lasi neganai, nega sisina lalonai oi laloa gauna be inai: ‘Taunimanima be dahaka ekskius herevadia do idia gwauraia, bona edena bamona do lau haere?’
• Bema ruma tauna be ekskius o koua hereva ta ia gwauraia, mai manau ida ia oi haroro henia toho be namo. Reana hanamoa herevana oi gwauraia diba. Hegeregere, bema ruma tauna ia gwau, ‘Lau be mai egu dubu,’ reana oi gwau, “Lau ura oi bamona taudia lau davaria, badina umui ese Baibel bona tomadiho umui laloa bada.” Nega haida ruma tauna ena lalohadai oi lalopararalaia be namo, unai ese oi do ia durua ia oi haroro henia noho totona. Hegeregere bema ia gwau, ‘Lau bisi,’ reana oi gwau: “Lau laloparara. To lau do lao lasi neganai, lau ura gau ta lau henia oi dekenai.” Eiava bema ruma tauna ia gwau, ‘Lau ura lasi,’ reana oi gwau, “Mani lau oi hamaoroa, dahaka oi ura lasi, Baibel ena hereva o tomadiho ibounai?”
• Laloa namonamo. Laloatao, Iehova be taunimanima ia doria lasi idia kamonai totona. (Deu. 30:19) Namona be ta ta ese sibona ena maduna Iehova ena vairanai do ia huaia. (Gal. 6:5) Bema ruma tauna ia badu, namona be ena ruma ita rakatania haraga. Ruma tauna ena hemami ita matauraia neganai, reana dala ita kehoa gabeai pablisa ma ta ese ia haroro henia totona.—1 Pet. 3:15.
Hari Hua Oi Tohoa Gauna be Inai:
• Bema ruma tauna ese ekskius o koua hereva ta ia gwauraia, ena ruma oi rakatania murinai, oi ia bamoa pablisa ida unai ekskius o koua herevana haerelaia dalana umui herevalaia.