Magasin Gunadia Gaukaralaia Namonamo

Magasin gunadia ese ta do ia durua lasi bema ruma ai ita haboua o negea kava​—unai dainai, ita hariharilaidia be namo. Magasin tamona sibona ese ta ena lalona ia veria diba, hereva momokani ia ura henia bona Iehova ena ladana dekenai ia boiboi totona. (Roma 10:13, 14) Magasin gunadia ita gaukaralaia namonamo daladia haida be henunai idia noho.

• Oi haroro momo lasi teritori ai oi haroro neganai, taunimanima oi davaria lasi rumadia dekenai unai magasin ta oi rakatania diba, reana raka hanai taudia ese idia itaia lasi gabunai magasin oi atoa.

• Pablik gabudiai oi haroro neganai, hegeregere basi stopu ai momo idia naria lalonai oi nanadaia, bema idia ura magasin ta idia duahia, bena magasin gunadia haida oi hahedinaraia, bena idia sibona ese edia ura gauna idia abia hidi diba.

• Dabua huria gabudia, hospital, kliniki o unai bamona gabuna ta oi lao neganai, magasin gunadia haida be taunimanima idia naria gabudiai oi atoa hedinarai diba. Bema unai gabu be mai edia naria taudia, vadaeni gwaumaoro oi abia guna be namo. Bema unuseniai magasin haida idia noho vadaeni, namona be ma haida oi atoa lasi.

• Lou henia totona oi hegaegae neganai, idia ta ta ena noho dalana oi laloa. Ia be mai ena famili, a? Ia ura loaloa, a? Ia ura uma ia karaia, a? Bema oi davaria magasin gunana ta ena atikol be unai lou henia do ia durua, vadaeni oi vadivadi lou neganai, unai oi hahedinaraia.

• Bema guna ta oi vadivadi henia loulou bona oi davaria lasi to hari oi davaria lou, vadaeni ia reaia o ia do abia lasi magasin gunadia oi hahedinaraia.