Iehova ese Lau be Edena Bamona Ia Laloa?
1. Edena dala ai Baibel be hevarivari ida ia hahegeregerea?
1 Nega hida hevarivari dekenai sibona oi itaia? Ita be dina ta ta ai unai ita karaia, eda toana ita sekea bona hamaoromaoroa totona. Baibel be hevarivari ida ia hahegeregerea. Baibel duahia karana ese ita ia durua eda kudouna—Iehova ese ia itaia gauna—ai ia noho gaudia ita dibaia totona. (1 Sam. 16:7; Iam. 1:22-24) Baibel ese “kudouna ai idia noho lalohadai bona ura ibounai ia tahua diba.” (Heb. 4:12) Edena dala ai dina ta ta ai Baibel duahia bona laloa dobu karana ese ita ia durua eda kara o lalohadai ita hamaoromaoroa, bena haroro tauna namona ai ita lao?—Sal. 1:1-3.
2. Edena dala ai Baibel ese ita ia durua eda kara ita tahua totona?
2 Baibel Gaukaralaia Hevarivari Bamona: Baibel ai Iehova ena abidadama hesiai taudia edia sivarai amo Dirava ia ura henia kara namodia ita dibaia. Hegeregere, Davida be mai gari lasi ida Dirava ena ladana ia hahedinaraia. (1 Sam. 17:45, 46) Isaia be mai lalogoada ida sibona ia henia teritori aukadia ai ia haroro totona. (Isa. 6:8, 9) Iesu be ena guba Tamana ia lalokau henia bada dainai, ia laloa haroro gaukara be hagoadaia bona moale gauna, to metau gauna lasi. (Ioa. 4:34) Keristani ginigunadia be idia haroro goadagoada, Iehova dekenai idia tabekau, bona idia hesiku lasi. (Kara 5:41, 42; 2 Kor. 4:1; 2 Tim. 4:17) Edia sivarai ita laloa dobu karana ese ita ia durua eda hesiai gaukara ita hanamoa totona.
3. Dahaka dainai eda kara ita haidaua haraga be namo?
3 Kara Haidaua: Bema hevarivari ai ita hamaoromaoroa gauna ta ita itaia, to kara ta ita karaia lasi, namo do ia vara lasi. Iehova ita noia mai momokani ida eda kara ita tahua bona ita ia durua ita hamaoromaoroa. (Sal. 139:23, 24; Luka 11:13) Nega be kwadogi bona mauri be gau badana dainai, eda kara ita haidaua haraga be namo.—1 Kor. 7:29; 1 Tim. 4:16.
4. Dirava ena Hereva ia itaia bona badinaia tauna dekenai dahaka ia vara?
4 Iehova ese toana ia laloa lasi, to ta ena kudouna ai ia noho gauna ia laloa bada. (1 Pet. 3:3, 4) Dirava ena Hereva ia itaia bona badinaia tauna dekenai dahaka ia vara? Ia be “do ia moale, badina ia be hereva ia kamonai sibona lasi, to karana ia karaia danu.” (Iam. 1:25) Oibe, do ita moale bona haroro taudia namodia ai ita lao, badina ita be “hevarivari bamona Iehova ena hairai ita hahedinaraia.”—2 Kor. 3:18.