Peroveta Taudia Tohotohoa—Nahumu
1. Nahumu bukana amo dahaka ita dibaia?
1 Idaunegai idia hadikaia Nineva hanua ena momoru ese Nahumu ena peroveta herevana ia hamomokania, Iehova be ena inai taudia edia davana ia henia. Danu, ena be idia be dagedage bada taudia, to Dirava vairanai idia hegeregere lasi. (Nah. 1:2, 6) Nahumu ena peroveta herevana ita stadilaia neganai, iseda haroro gaukara hanamoa daladia do ita diba.
2. Edena dala ai eda haroro herevana amo taunimanima ita hagoadaia diba?
2 Lalogoada Bona Helaro Ia Henia: Nega ginigunana Nahumu bukana ita itaia neganai, do ita laloa ia be Nineva, idaunegai Asuria ena siti badana ena hahemaoro herevana sibona. (Nah. 1:1; 3:7) To, Iehova ena taunimanima dekenai unai hahemaoro herevana be sivarai namona. Nahumu, anina be “Goada Henia Tauna,” ese Iuda taudia ia hagoadaia edia inai taudia be kahirakahira do idia ore! Nahumu ia hamomokania Iehova be ‘iena bese taudia edia hekwarahi bona hisihisi dinanai ia durua noho.’ (Nah. 1:7) Sivarai namona ita harorolaia lalonai, ma haida ita hagoadaia Iehova be edia komu gabuna ai idia halaoa totona.—Nah. 1:15.
3. Nahumu bamona, edena dala ai haheitalai ita gaukaralaia?
3 Haheitalai Gaukaralaia: Iehova ena lauma helaga amo Nahumu ese Nineva ena dika be Aigupito ena siti Tebe (No-amono) ida ia hahegeregerea—unai siti be guna Asuria besena ese ia hadikaia. (Nah. 3:8-10) Inai nega dikana ena dokona ita harorolaia neganai, Baibel ena peroveta herevadia amo ita hahedinaraia, Iehova be ia perovetalaia gaudia ibounai ia hagugurua. Hegeregere, lagani 632 B.C.E. ai, Babulonia bona Mede taudia ese Nineva hanua idia tuari henia neganai, medu bada dainai Taigarisi Sinavaina ia abata, bona hanua ena magu goadana ia hamorua. Bena karaharaga Nineva hanua idia abia, Iehova ia peroveta hegeregerena.—Nah. 1:8; 2:6.
4. Haroro gaukara ai, edena dala ai eda hereva ena anina do ia hedinarai bona idia laloparara diba?
4 Anina Hahedinaraia Idia Laloparara Totona: Nahumu ena toretore sitaelo ese sivarai ia hahedinaraia namonamo bona idia vara gaudia ia gwauraia maoromaoro. Ena hereva edia anina ia hedinarai goevagoeva. (Nah. 1:14; 3:1) Unai hegeregerena, ita ura taunimanima ese idia lalopararalaia herevadia ita gaukaralaia. (1 Kor. 14:9) Vadivadi ginigunana ai, oi vadivadi ena badina oi gwauraia hedinarai. Taunimanima ida Baibel oi stadilaia neganai, namona be oi durudia Iehova bona iena Hereva idia abidadama henia, bona do idia badinaia gaudia idia laloa bada totona.—Roma 10:14.
5. Nahumu ena peroveta herevana ai, dahaka hagoadaia herevana ita davaria?
5 Nahumu ese Iehova ena peroveta herevadia edia guguru karana ia abia dae momokani, bona Nahumu bukana ese unai ia hahedinaraia. Satani ena tanobada ena ore negana ia kahirakahira lalonai, inai siri ese ita ia hagoadaia: “Lohiabada idia dagedage henia taudia ese, nega iharuana do idia karaia diba lasi.”—Nah. 1:9.