Haroro Dekenai jw.org Gaukaralaia

Eda Web sait ese ita ia durua “tanobada ena daudau momokani gabudia dekenai” sivarai namona ita harorolaia totona. (Kara 1:8) Ruma taudia momo be jw.org idia diba lasi. To, pablisa ta ese idia ia hadibaia murinai, unai idia dibaia.

Sekit naria tauna ta ese Dahaka Dainai Baibel Oi Stadilaia? vidio be ena fon ai ia daonloud, bona ia davaria taudia dekenai ia hahedinaraia. Hegeregere, ruma-ta-ruma-ta ia lao neganai, ia gwau: “Lau be taunimanima lau vadivadi henia bona inai henanadai badadia toi lau haerelaia: Dahaka dainai tanobada ai hekwakwanai be momo? Edena dala ai Dirava ese unai do ia hanamoa? Bona hari edena bamona ita haheauka diba? Inai vidio ese unai henanadai ia haerelaia.” Bena sekit tauna be vidio ia gadaralaia, bona ruma tauna ena toana ia itaia danu. Momo be unai vidio idia ura henia dainai, idia itaia ela bona ia ore. Bena sekit tauna ia gwau: “Vidio ai oi kamonai vadaeni, jw.org amo Baibel stadi oi noia diba. To hari lau noho dainai, lau ese Baibel stadi karaia dalana lau haheitalaia diba.” Bema ruma tauna ia ura, vadaeni sekit tauna ese Sivarai Namona! buklet amo stadi karaia dalana ia haheitalaia. Bema ruma tauna ia bisi, vadaeni sekit tauna be dala ia karaia gabeai lou henia negana ai unai ia hahedinaraia. Unai sekit tauna be laga-ani totona kofi idia hoihoilaia stoa ta ia lao neganai, ia badinai ia helai tauna ida ia herevahereva murinai, unai haroro dalana tamona ia badinaia. Emu haroro dekenai jw.org oi gaukaralaia, a?