Inai Memorial Negana ai, Iehova Bona Iesu Do Oi Tohotohoa, A?
1. Memorial negadiai, Iehova ena Witnes taudia idia gaukara goada dahaka idia karaia totona?
1 Iehova be hanaihanai ena palani ia hagugurudia. Isaia 9:7 ai, Dirava ena Basileia ese do ia havaraia hahenamo ia herevalaia neganai, ia gwau, “Inai kara be Siahu Ibounai Lohiabada ese do ia karaia momokani.” Unai hegeregerena, Iesu be tanobada ai haroro gaukara ia karaia neganai, tomadiho momokani laloa bada karana ia hahedinaraia. (Ioa. 2:13-17; 4:34) Tanobada hegegemadai, pablisa milioni momo be lagani ta ta ena Memorial negadiai, edia haroro gaukara idia habadaia, unai amo Iehova bona Iesu idia tohotohoa. Oi danu be unai pablisa milioni huanai, a?
2. March 7 ai dahaka gaukara do ita karaia matamaia?
2 Memorial Pepapepa Hariharilaia: Inai lagani ena Memorial invateisen be Saturday, March 7 ai do ita hariharilaia matamaia. Palani karaia mai ura ida haroro gaukara karaia totona. Kongrigeisen ibounai be mai moale ida do idia gaukara hebou teritori ibounai idia karaia totona. Eda Baibel stiuden, lou henia, gaukara turadia, bona sikuli turadia dekenai memorial invateisen ita henia o jw.org amo idia ita boiria.
3. Edena dala ai March bona April lalonai eda haroro gaukara ita habadaia diba?
3 Heduru Painia: Ita ura dikadika ma haida ita durua dainai, eda haroro gaukara do ita habadaia. Unai dainai, momo be March bona April lalodiai heduru painia do idia karaia, bona hora 30 idia ripotilaia diba. Ruma bese ena tomadiho, o sibona emu stadi oi karaia neganai, unai umui gurigurilaia. (Aon. 15:22) Mai ura ida invateisen pepana hariharilaia karana ese haida do ia hagoadaia unai gaukara idia durua totona. Bema emu sediual oi haidaua bona haroro gaukara oi habadaia, vadaeni oi be Iesu oi tohotohoa unai.—Mar. 6:31-34.
4. Iehova bona Iesu ita tohotohoa neganai, dahaka hahenamo do ita abia
4 Memorial negana ai, Iehova bona Iesu ita tohotohoa neganai, hahenamo momo do ita moalelaia. Taunimanima momo do ita haroro henidia. Iehova bona ma haida hesiai henia karana amo moale korikori do ita davaria. (Kara 20:35) To hereadaena be, Dirava bona ena Natuna do ita hamoalea.