Haroro Gaukara Ita Karaia Goadagoada Noho
1 Ema bona hari, sivarai namona oi harorolaia noho nega ena daudau be dahaka? Lagani ima, lagani 10, eiava unai nega ia hanaia? Tadikaka bona taihu haida edia haroro negana be lagani 20, 30, eiava unai nega ia hanaia, bona idia do haroro goadagoada noho. Dahaka dainai unai gaukara idia hesikulaia lasi? Edena bamona Iehova ena orea danu ita gaukara noho diba, bona Iehova ese unai gaukara be ‘nega korikori dekenai ia ha-haragaia’ dainai, edena bamona ita karaia noho diba?—Isa. 60:22.
IEHOVA ENA GAUKARA GOADAGOADA KARANA ITA TOHOTOHOA
2 Ia maoro bema Basileia ena gaukara idia karaia taudia be sibodia idia gwauraia idia be Dirava danu idia gaukara taudia. (1 Kor. 3:9) Idia itaia ia be kara maoromaoro totona ia gaukara goadagoada, unai dainai iena kara idia tohotohoa. Lagani tausen momo gunanai Iehova ese sivarai namona ia gwauraia hamatamaia, bona ema bona hari ia gaukara goadagoada iena taunimanima ese unai sivarai idia harorolaia totona. (Gal. 3:8) Ena be taunimanima idia vara hamatamaia amo ema bona hari nega bada ia hanaia vadaeni, to Iehova ena ura Basileia dekenai ia hesikulaia lasi. To, ia gwauhamata hegeregerena, “Iehova ena siahu” amo ena ura do ia havaraia, bona ia gwauraia guna Basileia harorolaia gaukarana tanobada ibounai dekenai danu.—Isa. 9:7; Mat. 24:14.
3 Ena be ita haroro ena nega be ia daudau eiava ia daudau lasi, to Dirava bamona Basileia ena hereva momokani be iseda lalona dekenai ita lalohadailaia hanaihanai diba, bona ita haroro goadagoada noho diba. Baibel ita stadilaia neganai, ena siahu ita davaria, unai be Iehova ena lauma siahuna. Unai lauma siahuna ese ita ia hagoadaia iena sivarai ita harorolaia goadagoada noho totona.—Roma 12:11, 12; Ef. 5:1.
ESU ENA KARA TAHUA NAMONAMO
4 Iehova ese iena Natuna, Iesu Keriso, ita ia henia neganai, haroro goadagoada tauna ena haheitalai namona ia henia ita tohotohoa totona. Iesu ia haroro goadagoada ela bona ia kwalimu bona mai hisihisi danu ena tanobada maurina ia ore. Heberu 12:2, 3 ese ia hahedinaraia dahaka ese Iesu ia durua ia gini goada noho totona. Ia durua gauna ta be gabeai do ia davaria davana namona ia laloa noho. Iehova ese oi dekenai helaro namona ia henia, bona unai helaro oi laloa neganai oi ia hagoadaia, ani? Inai ita laloatao, ita haroro goadagoada noho ena daudau be gau badana lasi, to ita haheauka noho ela bona dokona be gau badana, badina unai neganai mauri hanaihanai ena davana namona do ita abia.—Mat. 24:13.
5 Iehova ena gaukara ita karaia neganai, unai ese ita ia hasiahua ita karaia goadagoada totona. Namona be Ioane karoa 4 dekenai Iesu ena haheitalai namona ita laloa. Iena tauanina ia hesiku. Ia laga-ani, ia aniani, bona inua gaudia ia abidia be gau badana. Iena hahediba taudia be hanua lalonai idia vareai aniani idia hoia totona, to idia giroa mai neganai, edia biaguna ena toana be ia hitolo lasi bona ia ura lasi ia laga-ani. Dahaka ese ia hagoadaia? Dirava ena hesiai gaukara dekenai ekspiriens namona ta ia davaria dainai. Samaria hahine be karaharaga Iesu ena haroro herevana ia abia dae, bona iena hereva dainai, iena hanua amo taunimanima haida idia mai Iesu ena hereva idia kamonai henia totona. Unai taunimanima ia gogodia diba mauri hanaihanai do idia abia totona! Mai ena ura danu Iesu ese unai taudia ia durudia. Iena haheitalai namona ese ita ia hagoadaia ita haroro goadagoada noho totona. Ita diba taunimanima be sivarai namona idia kamonai bona hereva idia badinaia neganai, mauri namona do idia abia diba.
HARI HUA ENA HENIA GAUNA
6 November lalonai, ita be New World Translation Baibel bona Buka Helaga—Dirava Ena Hereva Eiava Taunimanima Edia? bukana do ita hariharilaia, davana be K5.00. Ena be nega momo ita davaria taudia be idia dagedage, idia kamonai haraga lasi, eiava Dirava bona Baibel sivaraidia idia ura lasi kamonai, to namo lasi ita lalo-manoka. Bema mai moale bona goada danu unai buka ita hariharilaidia, reana taunimanima haida do idia lalo-parara Dirava ena Hereva be mai ena siahu idia abia dae taudia dekenai. (Heb. 4:12) Namona be taunimanima ita hadibaia Dirava ena Hereva be idia ia hagoadaia bona ita ura idia danu do ita stadilaia, bona idia danu be do idia “mauri noho” bona “Iehova ena kara do idia gwauraia.”—Sal. 118:15-17.
7 Ita diba momokani, bema haroro gaukara ita karaia goadagoada noho, Iehova, gaukara goadagoada ena badina, be November lalonai iseda lalo-tamona gaukarana do ia hanamoa bada.
[Questions]
1. Hari inai negai, haroro gaukara dekenai, ta ta sibona dekenai dahaka henanadai ia henia diba?
2. Iehova ese sivarai namona idia harorolaia gaukarana be edena bamona ia naria?
3. Ita haroro goadagoada noho totona, edena bamona Dirava ena kara ita tohotohoa diba?
4. Ela bona ia mase dahaka ese Iesu ia durua ia haroro goadagoada noho totona?
5. Haroro gaukara ita karaia neganai, unai ese ita edena bamona ia hagoadaia ita haroro goadagoada noho totona?
6. (a) November lalonai edena buka do ita hariharilaidia? (b) Sivarai namona be edena dala amo do ita harorolaia be namo?