Henanadai Mauana
◼ Pablisa ese Intanet amo tano ma ta ai ia noho tauna ia haroro o stadi henia be maoro, a?
Pablisa haida be Intanet amo pablisa be momo lasi tanodia o eda gaukara idia taravatua tanodia ai idia noho taudia ida Baibel idia stadilaia. Nega haida anina namona ia vara. To, bema pablisa be edia e-mail adres be ma haida idia henia o Intanet amo idia diba lasi taudia idia hereva henia, unai ese dika ia havaraia diba. (July 2007 Iseda Basileia Gaukara, rau 7 itaia.) Ita ura kudou-maoro taudia ida Basileia ena sivarai ita herevalaia. To, Intanet amo unai bamona herevahereva karana ese tadikaka ta o taihu ta ia hakaua kerere, bona hebamo dikadia eiava aposteit taudia ia hereva henia diba. (1 Kor. 1:19-25; Kol. 2:8) Danu, Basileia ena gaukara idia koua o taravatua tanodia ai, gavamani ese Intanet gaukaralaia dalana idia sekea. Unai dainai unai bamona herevahereva karana ese tadikaka taihu edia noho dalana ia hadikaia diba. Unai dainai, namo lasi pablisa be Intanet amo tano ma ta ai idia noho taudia idia tahua, bena idia ida sivarai namona idia herevalaia.
Bema tano ma ta amo ia mai vadivadi tauna ta ita haroro henia, ena ura ita habadaia toho lasi. To, jw.org gaukaralaia dalana ita hahedinaraia bona diba ma haida totona ena gabu ai ia noho brens ofesi ia vadivadi henia diba. Danu, ita hagoadaia iena tano ai ia noho Kingdom Hall ia lao diba. To, tano haida ai Kingdom Hall be lasi. To, bema ia ura Iehova ena Witnes tauna ta ese ia vadivadi henia, vadaeni inai fom Mani Lou Henia (S-43) ita hahonua bona seketere ita henia. Bena ia ese unai fom be jw.org dekenai do ia siaia. Bema kamonai tauna ena tano ai brens ofesi ta ia noho, vadaeni brens ofesi ese dala do ia karaia unai kamonai tauna ia durua totona.—June 2014 Iseda Basileia Gaukara, rau 5 bona November 2011 Iseda Basileia Gaukara, rau 2 itaia.
Bema vanegai ita vadivadi henia tauna be tano ma ta dekenai ia lao, o bema ta be Intanet amo ita stadi henia noho, namona be ataiai ia noho hadibaia herevadia ita badinaia. To, kamonai tauna ena ura ita habadaia noho ela bona ena tano ai ia noho pablisa ta ese ia vadivadi henia. To, bema ia noho tanona ai eda gaukara idia taravatua o koua bona bema Baibel topik idauidau be leta, telefon, o elektronik gaudia ma haida amo ita herevalaia, namona be ita naria namonamo.—Mat. 10:16.