Baibel Stadi ai Oi Karaia Bona Oi Karaia Lasi Gaudia

Hereva Momo Lasi: Namo lasi oi laloa gau ibounai do oi herevalaia. Iesu be henanadai ia gaukaralaia, unai amo taunimanima ia durua idia laloa namonamo bona lalohadai maorona idia abia totona. (Mt 17:24-27) Henanadai karana ese stadi ia hamauria bona unai dala amo stiuden ia lalopararalaia bona abia dae gaudia oi dibaia diba. (be 253 par. 3-4) Bema henanadai oi henia, namona be mai haheauka ida haere oi naria. Bema stiuden be haere kererena ia henia, maoromaoro haere oi gwauraia lasi, to henanadai ma haida oi gaukaralaia unai amo haere maorona ia davaria totona. (be 238 par. 1-2) Stiuden dekenai diba matamatadia oi hadibaia neganai, namona be emu hereva ena haraga be iena diba hegeregerena.​—be 230 par. 4.

Stadi Ia Auka Lasi be Namo: Namo lasi topik ta dekenai oi dibaia gaudia ibounai oi gwauraia. (Ioa 16:12) Paragraf ena point badana sibona oi herevalaia. (be 226 par. 4-5) Gau momo herevalaia karana ese mai anina bada point ia haboioa diba, herevana idia be gau namodia. (be 235 par. 3) Bema stiuden be point badana ia lalopararalaia, vadaeni paragraf ma ta dekenai umui hanaia lao be namo.

Stadi Bukana Herevalaia Kava Lasi: Iseda tahua gauna be stiuden ena kudouna ita hamarerea, to stadi bukana ita haorea totona lasi. (Lu 24:32) Baibel ena siahu oi gaukaralaia totona, stadi ia durua siri badadia oi hahedinaraia. (2Ko 10:4; Heb 4:12; be 144 par. 1-3) Idia diba namonamo haheitalai oi gaukaralaia. (be 245 par. 2-4) Stiuden ena hekwakwanai bona ia abia dae gaudia oi laloa, bona ia oi durua dalana ai stadi oi karaia. Inai bamona henanadai oi henia: “Hari oi dibaia gaudia dainai emu hemami be edena bamona?” “Inai gaudia dainai Iehova dekenai dahaka ita dibaia?” “Bema emu mauri ai unai sisiba oi badinaia dahaka namo do oi davaria?”​—be 238 par. 3-5; 259 par. 1.