Ia Manoka Tadikaka o Taihu Oi Hagoadaia Diba

Lagani ta ta ai, idia manoka tadikaka taihu momo be Memorial dekenai idia mai. Mauri hanaihanai ena heau helulu lalonai idia heau matamaia, to badina idauidau dainai unai bamona idia karaia noho lasi. Unai badina haida be Iehova Dekenai Oi Giroa Lou buklet ese ia herevalaia. (Heb. 12:1) To Iehova be manoka tadikaka taihu ia laloa bada, badina Iena Natuna ena rara amo idia ia hoia vadaeni. (Kara 20:28; 1 Pet. 1:18, 19) Edena dala ai idia ita durua diba kongrigeisen dekenai idia giroa lou totona?

Mamoe naria taudia be edia mamoe oreana amo idia boio mamoe idia tahua namonamo, unai hegeregerena kongrigeisen ena elda taudia be manoka tadikaka taihu idia tahua bona durua be namo. (Luka 15:4-7) Unai ese Iehova ena lalokau karana ia hahedinaraia. (Ier. 23:3, 4) Elda taudia sibona lasi, to ita ibounai ese manoka tadikaka taihu ita hagoadaia diba. Iehova ese iseda hebogahisi karana bona ma haida laloa bada karana ia moalelaia bada bona unai kara ese ita dekenai moale ia henia. (Aon. 19:17; Kara 20:35) Unai dainai do oi hagoadaia diba taudia oi laloa, bona namona be unai oi karaia haraga!

VIDIO LADANA, IDIA MANOKA TADIKAKA TAIHU HAGOADAIA, ITAIA BENA INAI HENANADAI HEREVALAIA:

• Abbey be nega ginigunana ia diba lasi Witnes taihu ta ida ia hedavari neganai, dahaka ia karaia?

• Bema ita ura manoka tadikaka o taihu ta ita durua, dahaka dainai elda taudia ita itaia be namo?

• Abbey be nega iharuana Laura ia vadivadi henia totona, edena dala ai ia hegaegae?

• Abbey be Laura ia hagoadaia noho lalonai, edena dala ai haheauka bona lalokau karana ia hahedinaraia?

• Luka 15:8-10 ai, Iesu ena haheitalai ese ita dekenai dahaka ia hadibaia?

• Abbey bona ma haida ese Laura idia durua dainai, dahaka hahenamo idia abia?