Idia Manoka Taudia Laloaboio Lasi
1 Ia manoka pablisa ta oi diba, a? Reana kongrigeisen ida ia hebou noho lasi bona ia boio vadaeni. Reana ruma-ta-ruma-ta gaukarana lalonai unai bamona tauna ta oi davaria. Namona be ita laloaboio lasi, unai tauna be iseda tadikaka. Ita ura ita hamomokania ia ita lalokau henia bona ia ita durua kongrigeisen bona “Mamoe Naria Tauna” dekenai ia giroa lou totona.—1 Pet. 2:25.
2 Oi Hahedinaraia Idia Oi Laloa: Bema ia manoka pablisa ita ringi henia eiava ita vadivadi henia, do ia diba ita ese ia ita laloaboio lasi. Dahaka ita gwauraia diba ia dekenai? Namona be unai manoka tadikaka eiava taihu ita hamaoroa ia ita laloaboio lasi. Bona ia danu ita herevahereva neganai, lalona hagoadaia gaudia sibona ita herevalaia. (Fili. 4:8) Reana vanegai ena hebou ta dekenai ita moalelaia point ta, ita herevalaia diba. Eiava ia ita boiria kongrigeisen ena hebou ta eiava hebouhebou badana ta dekenai ia mai totona, bona ena helai gabuna ita abia hegaegae eiava iseda motuka amo ita abia lao.
3 Haroro gaukara lalonai, pablisa ta ese lagani 20 lalonai ia manoka taihu ta ia davaria. Ena be Baibel stadi ia abia dae lasi, to pablisa be ia giroa lou bona ia dekenai magasin matamata haida ia rakatania. Distrik hebouhebou murinai, unai pablisa ese hebouhebou ena hereva haida be ia manoka taihu ida ia herevalaia, bona gabeai unai taihu ia goada lou.
4 Ta Ia Giroa Lou Neganai: Bema ia manoka tadikaka ta be hebou ia lao henia matamaia, edena bamona ita kara henia be namo? Iesu ena hahediba taudia be nega sisina lalonai ia idia rakatania neganai, edena bamona idia ia kara henia? Iesu ia gwau idia be iena “varavara,” bona ia hahedinaraia idia ia tabekau henia. Danu, idia dekenai mai anina bada gaukarana ia henia. (Mat. 28:10, 18, 19) Unai murinai, sivarai namona idia harorolaia goadagoada bona idia “hadokoa lasi.”—Kara 5:42.
5 Bema ia ita ura stadi henia, eiava haroro gaukara totona ita do boiria lasi neganai, namona be elda taudia ita itaia guna. Bema iseda teritori lalonai manoka pablisa ta ita davaria, namona be elda taudia ita hadibadia, bena unai amo ia dekenai heduru idia henia diba.
6 Baibel ese ia hahedinaraia bamona, idia hesiku lasi taudia ese hahemauri do idia davaria. (Mat. 24:13) Unai dainai, namona be idia manoka eiava idia raka boio taudia ita lalodia be namo. Unai bamona taudia ita laloa bada neganai, ita be mai haheauka ida Iehova ena lalokau ita hahedinaraia noho, unai ese idia do ia durua edia hesiai gaukara helagana idia karaia lou totona.—Luka 15:4-10.
[Study Questions]
1. Dahaka dainai idia manoka pablisa ita durua be namo?
2. Edena dala ai idia manoka pablisa ita hagoadaia diba?
3. Ia manoka taihu ta be edena dala ai ia goada lou?
4. Bema ia manoka tadikaka ta be hebou ia lao henia matamaia, edena bamona ita kara henia be namo?
5. Ia totona dahaka gau rua ita do karaia lasi neganai, elda taudia ita itaia be namo?
6. Idia durua karana amo, edena dala ai moale ita davaria diba?