KERISTANI TAUDIA EDIA MAURI DALANA
Sivarai Namona Harorolaia Gaukarana Moalelaia
Nega haida oi davaria haroro gaukara be ia auka, a? Unai henanadai dekenai ita momo iseda haere be oibe. Dahaka dainai? Reana nega momo iseda teritori ai taunimanima idia kamonai lasi o idia dagedage o ita gari idau taudia ita hereva henidia totona. Momokani unai bamona gaudia ese iseda moale ia hamaragia diba. To moale Diravana ita tomadiho henia dainai, ia ura ia ita hesiai henia mai moale ida. (Sa 100:2; 1Ti 1:11) Dahaka badina toi dainai iseda haroro gaukara ita moalelaia?
Gau ginigunana, ita be helaro namona ita harorolaia. Ena be hari helaro be lasi, to ita be taunimanima ia hamoalea “sivarai namona” ita gwauraia noho. (Is 52:7) Dirava ena Basileia ena sivarai namona ese ita ia hamoalea diba danu. Haroro gaukara totona ita do lao lasi neganai, namona be Dirava ena Basileia ese inai tanobada ai do ia mailaia hahenamodia ita lalodia guna.
Gau iharuana, ita harorolaia sivarai namona ese taunimanima edia mauri ia hanamoa bona ia durudia Dirava idia diba totona. Unai amo idia ia hadikaia karadia idia rakatania bona dala ia kehoa mauri hanaihanai idia abia totona. (Is 48:17, 18; Ro 1:16) Unai be hegeregere idia boio taudia ita tahua gaukara ita karaia bamona. Ena be haida idia ura lasi ita durudia, to ita hekwarahi noho heduru idia ura taudia ita durua totona.—Mt 10:11-14.
Gau ihatoina bona mai anina bada gauna be inai, iseda haroro gaukara amo Iehova ita hanamoa. Ia ese iseda haroro gaukara ia laloa bada. (Is 43:10; He 6:10) Danu, ia ese ena lauma helaga ia henia iseda gaukara ita hagugurua totona. Unai dainai, Iehova ita noia lauma helaga ena huahua, moale, ia henia totona. (Ga 5:22) Iena heduru amo, iseda lalohekwarahi gaudia ita hanaia bona mai gari lasi ida ita haroro diba. (Kara 4:31) Herevana iseda teritori ai taunimanima idia kamonai eiava lasi, ita be mai moale ida haroro gaukara ita karaia noho diba.—Ese 3:3.
Haroro gaukara ai edena bamona toana oi hahedinaraia be namo?Edena dala ai moale oi hahedinaraia diba?
VIDEO LADANA STADI BONA LALOA DOBU KARANA AMO MOALE OI DAVARIA LOU, OI ITAIA MURINAI INAI HENANADAI OI HAERELAIA:
Ena be hua ta ta ai hora momo ita halusia haroro gaukara ai, to dahaka dainai ia be mai anina bada Dirava ena hereva stadilaia karana ita atoa guna?
Edena dala ai Mary ita tohotohoa diba?
Dirava ena Hereva stadilaia bona laloa dobu totona, edena nega oi abia hidi?
Sivarai namona harorolaia gaukarana dekenai, dahaka ese oi ia hamoalea?