Dirava Bona Iseda Dekena Taudia Lalokau Henia​—⁠Edena Bamona Unai Ita Hahedinaraia Diba

Ena be Keristani taudia be Mose ena taravatu henunai idia noho lasi, to taravatu hereadaedia rua​—⁠Dirava bona dekena taudia lalokau henia​—⁠karana ese Iehova ena ura ita dekenai ia hahedinaraia. (Mat 22:37-39) Unai bamona lalokau be do ia vara kava lasi. Namona be unai kara ita hahedinaraia. Edena dala ai? Dala namona ta be dina ta ta ai Baibel ita duahia. Baibel lalonai Dirava ena kara ma haida ita dibaia neganai, ‘[Iehova] ena kara namo do ita laloa.’ (Sal 27:4) Unai dala amo, iseda lalokau ia dekenai do ia bada bona iseda laloa dalana be iena hegeregerena. Unai ese ita ia hagoadaia Dirava ena taravatu ita badinaia bona haida lalokau henia karana do ita hahedinaraia. (Ioa 13:34, 35; 1 Ioa 5:3) Baibel duahiduahi moalelaia daladia toi be inai:

• Emu lalona ena matana amo idia vara noho gaudia oi piksaia. Mani oi laloa bema oi be unai gabu ai. Dahaka do oi itaia, kamonai bona bonaia? Bona unai sivarai lalonai idia noho taudia edia hemami be edena bamona?

  

• Oi ura henia kahana oi abia hidi diba. Dala haida be inai: Oi duahia badabada, o idia rekodia gadona oi kamonai bona oi badinaia. Baibel ese ia sivarailaia tauna ta ena kara oi duahia o Baibel ena hereva ta oi abia hidi oi duahia totona, namo lasi karoa ibounai oi duahia. Hegeregere, New World Translation of the Holy Scriptures ena Appendix A7 o B12 oi gaukaralaia diba Iesu ena sivarai oi duahia totona. Dina siri ese ia gwauraia Baibel buka ena karoa ibounai oi duahia. Baibel bukadia be lista ai idia noho bona unai oi duahia diba.

  

• Oi duahia gauna oi lalopararalaia. Dina ta ta ai, karoa tamona be mai laloparara bona laloa dobu ida oi duahia karana ese, karoa ibounai oi duahia haorea karana ia hereaia. Mani inai oi tohoa. Idia vara gaudia oi lalohadailaia. Mapu bona marginal reference oi gaukaralaia. Oi lalopararalaia lasi point ta dibaia totona, research oi karaia diba. Bema hegeregere, hora haida lalonai oi duahia gauna be mai laloa dobu ida oi duahia.