Pepapepa Amo Herevahereva Hamatamaia Daladia

January 2018 amo, Haroro Bona Mauri Dalana​—⁠Hebou Pepana ena rau 1 ai haroro herevadia idia atoa. Ita idia hagoadaia, namona be taunimanima dekenai pablikeisen ita henia sibona lasi, to idia ida ita herevahereva be mai anina bada. Pablisa ese unai idia karaia totona, haroro herevadia edia vidio ai Baibel amo herevahereva hamatamaia dalana idia hahedinaraia. To ita gwau lasi ruma-ta-ruma-ta haroro gaukarana ai pablikeisen do ita hariharilaia lasi. Ita hariharilaia diba! Hegeregere, pepapepa amo herevahereva ita hamatamaia diba. Henunai idia noho dala ita badinaia diba pepapepa idauidau ita gaukaralaia totona:

1. Pepapepa ena vaira kahanai idia noho henanadai duahia.

2. Pepapepa ena rau 2 ena atai kahanai idia noho siridia amo Baibel ena haere oi hahedinaraia. Bema nega ia hegeregere, pepapepa lalonai idia noho hereva ma haida oi herevalaia.

3. Ruma tauna dekenai pepapepa oi rakatania, bona ia oi hagoadaia ena laga-ani negana ai ia duahia diba.

4. Ruma tauna oi do rakatania lasi neganai, inai kahana “Mani Oi Laloa” ena henanadai be ia dekenai oi hahedinaraia. Bena palani oi karaia nega ma ta do oi giroa lou bona Baibel amo unai henanadai ena haere do umui herevalaia.

Oi giroa lou neganai, haere umui herevalaia bona henanadai ma ta oi rakatania nega ma ta ai umui herevalaia totona. Reana iseda websait ai eiava pepapepa ena rau ginigabena ai ia noho pablikeisen amo henanadai ta oi abia hidi diba. Bena nega maorona ai, buklet ladana Dirava Ena Sivarai Namona! eiava iseda Hadibaia Gaukara Ena Tulu Idauidau ai idia noho stadi pablikeisen ta oi hariharilaia diba.