Tama Sina E, Emui Natudia Umui Hadibaia

Tanobada taudia ese dika idia gwauraia namo, bona namo idia gwauraia dika. (Isa 5:20) Madi, taunimanima momo be Iehova ese ia inai henia gaudia idia karaia hegeregere, tatau be tatau bona hahine be hahine ida idia sihari heheni. Sikuli gabuna ai, iseda matamata taudia be edia turadia ese idia doria diba edia ura idia badinaia totona. Edena dala ai emu natudia oi hegaegaelaia mai haheauka ida unai bamona hahetoho idia hanaia totona?

Emu natudia dekenai Iehova ena taravatu oi hadibaia. (Le 18:3) Edia mauri lagani hegeregerena Baibel ese mahuta hebou karana ia herevalaia dalana oi hadibaia. (De 6:7) Sibona oi nanadaia: ‘Egu natudia dekenai lalokau be dala maorona ai do idia hahedinaraia karana lau hadibaia, a? Egu natudia dekenai hemataurai dalanai dabua hahedokilaia karana ena badina lau herevalaia, a? Egu natudia dekenai ma haida ese idia dekenai do idia karaia lasi karadia lau gwauraia, a? Egu natudia be dahaka do idia karaia bema ta ese idia dekenai ponografi laulau ia hahedinaraia o ta ese idia ia doria Iehova ese ia taravatua karana ta idia karaia totona?’ Hekwakwanai idia dadaraia diba bema idia oi hadibaia guna. (Ao 27:12; Had 7:12) Emu natudia oi hadibaia karana amo oi hahedinaraia, Iehova ese oi dekenai ia henia harihari gauna oi laloa bada. —Sa 127:3.

VIDIO LADANA IA HAHEAUKA DIBA RUMA BESENA HAGINIA​—EMU NATUNA GIMAIA, “DIKA” IA DAVARIA GARINA ITAIA, BENA INAI HENANADAI HAERELAIA:

• 

  Dahaka dainai ia auka tama sina haida be edia natudia dekenai mahuta hebou karana idia herevalaia totona?

• 

  Dahaka dainai tama sina ese edia natudia dekenai ‘Iehova ena matahakani bona sisiba idia hadibaia be namo’?​—Ef 6:4

• 

  Iehova ena orea ese dahaka tulu haida ia henia, unai amo tama sina ese edia natudia dekenai mahuta hebou karana idia herevalaia diba?​—w19.05 12, maua

• Hekwakwanai idia do vara lasi neganai, dahaka dainai nega ibounai emu natudia ida oi herevahereva?