Mama Karana Oi Dadaraia Bona Maino ai Oi Noho

1. Mama karana ese edena dala ai Iosepa ena ruma bese edia mauri ia hadikaia?

IAKOBO be ena natuna memero ibounai ia lalokau henidia, to mauri lagani 17 merona Iosepa ia lalokau henia bada. Iosepa ena kakadia be dahaka idia karaia? Idia be Iosepa dekenai idia mama dainai ia idia inai henia. Iosepa be kerere ta ia karaia lasi to ena kakadia ese ia idia badu henia. Unai dainai, Iosepa be hesiai tauna bamona idia hoihoilaia bona edia tamana idia koia, idia gwau dagedage animal ta ese iena lalokau natuna ia hamasea. Mama karana ese edia ruma bese ena maino ia hadikaia bona edia tamana dekenai lalohisihisi bada ia havaraia.​—⁠Gen. 37:3, 4, 27-34.

2. Galatia 5:19-21 ena hereva bamona, dahaka dainai mama karana be dika?

² Baibel ese ia hahedinaraia, mamab karana ese mase ia havaraia diba, bona unai kara be “tauanina ena kara dikadia” haida ida ia gwauraia, bona unai kara idia karaia taudia be Dirava ena Basileia lalonai do idia vareai lasi. (Galatia 5:19-21 duahia.) Mama karana ese nega momo inai bamona karadia ia havaraia inai heheni karana, heai, bona badu momo karana.

3. Inai atikol ai dahaka do ita herevalaia?

³ Iosepa ena kakadia edia haheitalai ese ia hahedinaraia, mama karana ese ruma bese lalonai ia noho maino bona hetura karana ia hadikaia diba. Ena be Iosepa ena kakadia edia kara bamona do ita karaia lasi, to ita ibounai be goevadae lasi bona iseda kudouna ese ita ia koia diba. (Ier. 17:9) Unai dainai, nega haida ita hekwarahi mama karana ita biagua totona. Mani Baibel ai idia noho haheitalai haida ita itaia, unai ese ita do ia durua mama karana ia vara ena badina haida ita dibaia totona. Danu maino ai do ita noho bona mama karana ita dadaraia diba daladia do ita herevalaia.

DAHAKA ESE MAMA KARANA IA HAVARAIA DIBA?

4. Dahaka dainai Pilistia taudia be Isako dekenai idia mama?

⁴ Taga maurina. Isako be kohu momo tauna, bona Pilistia taudia be ena kohu dainai ia dekenai idia mama. (Gen. 26:12-14) Danu ranu guri be tano dekenai idia koua unai amo Isako be ena mamoe bona boromakau dekenai ranu do ia henia lasi. (Gen. 26:15, 16, 27) Unai Pilistia taudia bamona, hari taunimanima momo be haida edia taga maurina dainai idia mama. Danu ma haida edia kohu do idia ura henia bona gau idauidau do idia karaia edia kohu abia dalana idia koua totona.

5. Dahaka dainai Iuda dubu gunalaia taudia be Iesu dekenai idia mama?

⁵ Ta laloa bada karana. Iuda dubu gunalaia taudia be Iesu dekenai idia mama badina taunimanima momo ese Iesu idia laloa bada. (Mat. 7:28, 29) Iesu be Dirava ese ia siaia, bona ia be hereva momokani ia hadibaia noho. Unai dainai, dubu gunalaia taudia be Iesu ena ladana namona idia hadikaia totona hereva koikoi idia halasia. (Mar. 15:10; Ioa. 11:47, 48; 12:12, 13, 19) Unai sivarai amo dahaka ita dibaia? Namona be ita hekwarahi kongrigeisen lalonai edia kara namodia dainai haida ese idia laloa bada taudia, ita mama henidia lasi. To, namona be ita hekwarahi edia kara namodia ita tohotohoa totona.​—⁠1 Kor. 11:1; 3 Ioa. 11.

6. Edena dala ai Diotrepe ese mama karana ia hahedinaraia?

⁶ Ta be tiokratik maduna haida ia abia neganai. Aposetolo taudia edia negai, Diotrepe be Keristani kongrigeisen lalonai maduna idia huaia taudia dekenai ia mama. Diotrepe ia ura kongrigeisen taudia “huanai ia bada,” unai dainai aposetolo Ioane bona maduna idia huaia tadikaka edia ladana namona ia hadikaia totona hereva koikoi ia gwauraia. (3 Ioa. 9, 10) Ena be Diotrepe bamona do ita kara lasi, to iseda Keristani tadikaka ta be ita ura henia asainmen ta ia abia neganai ita mama diba​—bema ita laloa ita danu be hegeregere unai asainmen ita karaia diba.

7. Mama karana ese dahaka ia havaraia diba?

⁷ Mama karana be ava ta mai ena poisini bamona. Bema mama karana be ava dikana bamona iseda kudouna ai ia tubu matamaia, do ia auka ita kokia totona. Mama karana ia havaraia hemami dikadia haida be, mama kererena, hekokoroku, bona sibona laloa bada karana. Danu mama karana ese kara namodia, hegeregere lalokau, hebogahisi, bona haida laloa bada karana ia koua diba. Edena dala ai mama karana ita dadaraia diba?

MANAU BONA LALOA MAOROMAORO KARANA HAHEDINARAIA

8. Edena kara namodia ese ita do ia durua mama karana ita dadaraia totona?

⁸ Mama karana ita dadaraia diba bema ita manau bona laloa maoromaoro karana ita hahedinaraia. Unai kara namodia ita hahedinaraia neganai, do ita mama lasi. Manau karana ese ita do ia durua ita sibona ita laloa bada lasi totona. Manau tauna ia laloa lasi ia ese ma haida ia hereaia. (Gal. 6:3, 4) Ia laloa maoromaoro tauna be ia laloa ia dekenai idia noho gaudia be hegeregere bona haida ida ia sibona ia hahegeregerea lasi. (1 Tim. 6:7, 8) Ia manau bona laloa maoromaoro tauna ia itaia tau ta be gau namona ta ia abia neganai, ia be unai tauna dainai ia moale.

9. Galatia 5:16 bona Filipi 2:3, 4 edia hereva bamona, lauma helaga ese ita ia durua dahaka ita karaia totona?

⁹ Mama karana ita dadaraia totona Dirava ena lauma helaga ese ita do ia durua, bona ita ia durua diba manau bona lalomaoromaoro karana ita hahedinaraia totona. (Galatia 5:16; Filipi 2:3, 4 duahia.) Iehova ena lauma helaga ese ita ia durua iseda lalohadai bona ura gaudia ita diba totona. Dirava ena heduru amo, iseda lalohadai bona hemami dikadia ita kokia bona ita hagoadaia heheni diba. (Sal. 26:2; 51:10) Mani Mose bona Paulo edia haheitalai ita itaia, unai tatau be mama karana idia dadaraia.

10. Dahaka ese Mose ia tohoa diba? (Rau 1 ena laulau itaia.)

¹⁰ Mose be mai ena maoro Dirava ena taunimanima ia gunalaia totona, to mai mama ida ena gaukara ia karaia lasi. Hegeregere, dina ta Israela ena elda taudia be palai dubu badinai idia gini noho bona Iehova ese ena lauma helaga amo Mose dekenai ia henia siahu haida ia kokia bona unai tatau dekenai ia henia. Nega sisina murinai, Mose ia kamonai palai dubu dekenai idia mai lasi elda taudia rua danu be lauma helaga ena siahu idia abia bona peroveta taudia bamona idia kara matamaia. Iosua ese Mose ia hamaoroa unai tatau rua ia koua neganai Mose be dahaka ia karaia? Mose be Iehova ese unai tatau rua dekenai ia henia hahenamo dainai ia mama lasi. To, ia manau bona idia ida ia moale hebou. (Num. 11:24-29) Mose ena sivarai amo dahaka ita dibaia?

11. Edena dala ai elda taudia ese Mose idia tohotohoa diba?

¹¹ Bema oi be elda ta, nega ta oi idia hamaoroa ta dekenai treinini oi henia unai amo kongrigeisen ai oi ura henia bada maduna do ia karaia totona, a? Hegeregere, oi be wiki ta ta ena Gima Kohorona Stadi naria karana oi moalelaia. To bema Mose bamona oi manau, sibona do oi laloa maragi lasi bema oi idia hamaoroa tadikaka ma ta dekenai treinini oi henia, unai amo vaira negai unai gaukara do ia karaia. To, mai moale ida emu tadikaka do oi durua.

12. Edena dala ai hari Keristani taudia momo ese manau bona laloa maoromaoro karana idia hahedinaraia?

¹² Buruka elda taudia momo ese idia davaria noho hekwakwanai ta mani ita herevalaia. Lagani momo lalonai, idia haida be elda oreana edia kodineita gaukarana idia karaia. To edia mauri lagani be 80 neganai, mai ura ida unai asainmen idia rakatania. Sekit gaukara idia karaia tadikaka be mauri lagani 70 idia abia neganai, mai manau ida unai gaukara idia rakatania bona idia henia hesiai gaukara ena asainmen matamata idia abia dae. Vanegai lagani lalonai, tanobada ibounai ai Betele ai idia gaukara taudia momo be asainmen matamata idia abia. Unai abidadama tadikaka bona taihu ese guna idia karaia asainmen be hari ma haida ese idia karaia dainai idia lalohisihisi lasi.

13. Dahaka dainai Paulo be aposetolo taudia 12 dekenai ia mama diba?

¹³ Aposetolo Paulo danu be laloa maoromaoro bona manau karana dekenai haheitalai namona ia hahedinaraia. Paulo be mama karana ia dadaraia. Haroro gaukara ia goadalaia, to mai manau ida ia gwau: “Aposetolo taudia ibounai huanai lau be maragi herea, bona lau be hegeregere lasi do idia gwauraia aposetolo tauna.” (1 Kor. 15:9, 10) Iesu be tanobada ai haroro gaukara ia karaia neganai, aposetolo taudia 12 ese ia idia badinaia, to Paulo be Iesu ia mase bona ia toreisi lou murinai Keristani tauna ai ia lao. Ena be ia idia abia hidi “idau bese taudia edia aposetolo tauna” ai ia lao, to Paulo be Iesu ena aposetolo 12 ese idia abia hahenamo ia abia lasi. (Roma 11:13; Kara 1:21-26) Unai aposetolo taudia 12 be Iesu ida idia gaukara hebou dainai Paulo be idia dekenai ia mama lasi, to laloa maoromaoro karana ia hahedinaraia.

14. Dahaka ita karaia diba bema laloa maoromaoro bona manau karana ita hahedinaraia?

¹⁴ Bema Paulo bamona laloa maoromaoro bona manau karana ita hahedinaraia, Iehova amo hahenamo idia abia taudia do ita matauraia. (Kara 21:20-26) Iehova ese Keristani kongrigeisen do idia hakaua taudia ia abia hidi. Ena be idia goevadae lasi, to Iehova ese idia be “harihari gaudia bamona” taunimanima dekenai ia henia. Bema mai manau ida unai hakaua taudia ita matauraia bona idia henia hadibaia herevadia ita badinaia, Iehova kahirakahira do ita lao bona iseda Keristani tadikaka ida maino ai do ita noho.

‘MAINO IDIA HAVARAIA GAUDIA TAHUA’

15. Dahaka ita karaia be namo?

¹⁵ Bema mama karana ia noho maino do ia noho lasi. Namona be mama karana be iseda kudouna amo ita kokia bona haida mama henia karana ita dadaraia. Iehova ita badinaia totona gau badana be inai hakaua herevana ita badinaia, “maino idia havaraia gaudia bona ma haida idia hagoadaia gaudia ita tahua noho.” (Roma 14:19) Dahaka ita karaia diba haida ita durua mama karana idia dadaraia totona, bona edena dala ai maino ai ita noho diba?

16. Edena dala ai haida ita durua diba mama karana idia dadaraia totona?

¹⁶ Iseda hereva bona kara ese ma haida ia durua eiava hahisia diba. Inai tanobada ena kara ta be ‘kohu heagilaia karana.’ (1 Ioa. 2:16) To unai bamona kara ese mama karana ia havaraia. Unai dainai haida ese mama karana idia hahedinaraia lasi totona, ita dekenai idia noho gaudia eiava ita ura hoia gaudia totona ita karaia palani ita herevalaia lasi. Mama karana ita dadaraia dalana ta be mai manau ida kongrigeisen ai ita abia maduna ita karaia. Bema ita abia maduna ita herevalaia momo, mama karana ita hahedinaraia diba. To, bema haida laloa bada karana ita hahedinaraia bona edia kara namodia dainai ita tanikiu henidia, do ita durudia laloa maoromaoro karana idia hahedinaraia bona kongrigeisen ai lalotamona bona maino do ia noho.

17. Iosepa ena kakadia be dahaka idia karaia diba, bona dahaka dainai?

¹⁷ Mama karana ita dadaraia diba! Mani Iosepa ena kakadia edia haheitalai ita laloa lou. Iosepa idia kara auka henia bona lagani momo murinai, Aigupito dekenai ia ida idia hedavari. Iosepa be ena kakadia dekenai ia sibona ia do gwauraia hedinarai lasi neganai, idia ia tohoa unai amo do ia diba edia kara idia haidaua eiava lasi. Idia totona aniani ia hegaegaelaia, to iena tadina Beniamina dekenai aniani momo ia henia. (Gen. 43:33, 34) Iena kakadia be Beniamina dekenai idia mama lasi. To, idia hahedinaraia edia tadina bona tamana, Iakobo, idia laloa bada. (Gen. 44:30-34) Iosepa ena kakadia be mama karana idia dadaraia dainai, edia ruma bese lalonai maino ia noho. (Gen. 45:4, 15) Unai hegeregerena, bema mama karana ita dadaraia, iseda ruma bese bona kongrigeisen do ita durua maino ai idia noho totona.

18. Iamesi 3:17, 18 ena hereva bamona, dahaka do ia vara bema maino havaraia karadia ita karaia?

¹⁸ Iehova ia ura mama karana ita dadaraia bona maino ai ita noho. Namona be ita hekwarahi unai bamona ita karaia totona. Inai atikol ai ita herevalaia bamona, mama lalohadaina ita abia diba. (Iam. 4:5) Bona ita be mama karana idia hahedinaraia taudia huanai ita noho. To, bema manau karana, laloa maoromaoro karana, bona haida laloa bada karana ita hahedinaraia, do ita mama lasi. Danu, maino do ia noho, bona kara namodia ma haida ita hahedinaraia diba.​—Iamesi 3:17, 18 duahia.