Mama Dekenai Inai Oi Diba be Namo

MAMA be dahaka? Mama be lalona ena mamina ta, ia dainai ta ia lalo-hekwarahi, ia lalohisihisi, eiava ia badu. Bema toana be ta ese kara ta ai ia kwalimu momokani to ita be ia hegeregerena lasi, reana do ita mama. Eiava bema haida ese iseda turana ta idia hanamoa bada to ita idia hanamoa maragi, reana do ita mama. To ita mama negadia iboudiai be ita kerere, a?

Mama taudia bema idia laloa ta ese idia do ia hereaia, do idia lalo-namo henia lasi. King Saulo, idaunegai Israela tauna, ena kara be unai bamona. Matamanai, ena kesi huaia tauna, Davida, ia lalokau henia bada bona ena tuari oreana ena biaguna ta ai ia halaoa. (1 Samuela 16:21; 18:5) Bena dina ta King Saulo ia kamonai hahine ese Davida idia hanamoa, idia gwau: “Saulo ese iena 1000, 1000 ia alaia ore, to Davida ese iena 10,000, 10,000 ia alaia vadaeni.” (1 Samuela 18:7) Edia hereva dainai Saulo ese ia bona Davida edia hetura karana namona ia hadikaia be namo lasi. To, edia hereva dainai ia badu. “Unai dina dekena amo, Saulo ese Davida dekenai ia mama.”​—1 Samuela 18:9.

Mama tauna be reana ia ura lasi ma ta ese dika do ia davaria. To reana ia ese ena bamona ta ena kwalimu ia badulaia bona ia ura dikadika ia hegeregerena do ia kwalimu eiava ena kara be iena hegeregerena. To, bema ta be mai ena mama dikana, reana ia mama henia tauna ena amo namo do ia koua hehuni, eiava do ia ura unai tau dekenai dika ta do ia vara. Nega haida, mama tauna ese ena mamina ia hunia diba lasi. Reana ena mama ese ia doria ma ta do ia hadikaia, King Saulo ia ura Davida ia alaia mase hegeregerena. Saulo ese nega tamona sibona lasi io ia negea, ‘Davida be haba dekenai do ia gwadaia mase’ totona.​—1 Samuela 18:11; 19:10.

Reana do oi gwau, ‘To lau be mama tauna ta lasi.’ Momokani, reana mama ese emu mauri ia biagua lasi. To, mama​—siboda eda eiava ma haida edia​—ese ita ibounai ia hadikaia sisina eiava ia hadikaia bada. Ena be ma haida edia mama ita itaia haraga, to reana ita siboda eda mama ita itaia haraga lasi.

“Mai Ena Hegahusi”

Taunimanima edia kara dika sivaraidia momo Dirava ena Hereva, Baibel, lalonai, be edia hegahusi dainai idia vara gaudia. Kaino bona Abela edia sivarai oi laloatao, a? Idia ruaosi, Adamu bona Heva edia natudia, ese boubou gaudia be Dirava idia henia. Abela be abidadama tauna dainai iena ia henia. (Heberu 11:4) Ia ese Dirava ena siahu, Iena palani badana tanobada totona do ia hagugurua siahuna, ia abidadama henia. (Genese 1:28; 3:15; Heberu 11:1) Abela ia abia dae Dirava ese davana namona, mauri, be abidadama taudia do ia henidia, ia mai noho tanobada Paradaisona lalonai. (Heberu 11:6) Unai dainai, Dirava ese Abela ena boubou gauna ia moalelaia. Bema Kaino ese ena tadina ia lalokau henia momokani, Dirava ese Abela ia hanamoa dainai do ia moale. To, Kaino “ia badu maragi lasi.”​—Genese 4:5.

Dirava ese Kaino ia hamaoroa namona be kara namo do ia karaia, bena ia danu ese hahenamo do ia abia. Bena Dirava ese ia sisiba henia, ia gwau: “Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona. Kara dika be ia ura biagua oi, to oi ese do oi halusia be namo.” (Genese 4:7) Madi, Kaino ese ena badu bona ena mama ia biagua lasi. Ena badu ese ia doria ena tadina, kara maoromaoro tauna, ia alaia mase totona. (1 Ioane 3:12) Unai nega amo ema bona hari, heatu bona tuari lalodiai taunimanima milioni momo herea idia mase. The World Book Encyclopedia bukana ia gwau: “Tuari ena badina haida be reana tano ma haida idia ura henia, kohu bona moni ma haida idia ura henia, siahu ma haida idia ura henia, eiava noho namo idia ura henia.”

Keristani korikori taudia be tanobada ena tuari lalodiai idia vareai lasi. (Ioane 17:16) To, madi, nega haida Keristani taudia haida be hepapahuahu lalodiai idia vareai. Bema kongregesen taudia ma haida be edia hepapahuahu lalodiai idia vareai, unai hepapahuahu ese haida idia hadikaia diba. Baibel torea tauna Iamesi ese Keristani taudia ia nanadaia, ia gwau: “Heatu bona heai be edena bamona umui emui huanai idia vara noho?” (Iamesi 4:1) Edia kara, kohu ura henia dikadika karana, ia gwauraia hedinarai, unai amo unai henanadai ia haerelaia, ma ia gwau, “Mai mama danu gau haida umui ura abia.” (Iamesi 4:2) Oibe, ta ese kohu ia ura henia dikadika dainai, reana ma ta ena kohu do ia ura henia, bona haida do ia mama henia, badina toana be edia noho ese iena noho ia hereaia. Unai dainai, Iamesi ese “hegahusi” ia sisibalaia.​—Iamesi 4:5, NW.

Mama ena badina idauidau ita tahua ena namo be dahaka? Unai ese ita ia durua, do ita kara maoromaoro bona taunimanima ida do ita noho namonamo. Bona ita ia durua, taunimanima do ita hebogahisi henidia, do ita haheauka henidia, bona edia dika do ita gwauatao. Gau badana be, ia hahedinaraia Dirava ese taunimanima be edia dika amo ia hamauridia dalana do idia abia dae be namo.​—Roma 7:​24, 25.

Mama Dikana Lasi Tanobadana

Reana taunimanima idia laloa, mama dikana lasi tanobadana ia vara diba lasi. Buka torea tauna ladana Rom Landau, ia gwau: “Uru momo ese idia abia aonegana, bona tanobada ena aonega tahua taudia . . . bona darana idia tahua doketa taudia, ena be [mama] idia herevalaia momo, to mama ese ia hadikaia tauna idia durua lasi. . . . Doketa ta ese mama tauna ta ia hanamoa, a?”

To Dirava ena Hereva ia gwauhamata, taunimanima be mai edia dala mauri goevadaena be tanobada matamatana lalonai do idia abia; unuseniai mama dikana ese ta do ia hadikaia lasi. Ma danu, mama taudia do idia noho lasi, unai dainai unai tanobada matamatana ena maino do idia hadikaia diba lasi.​—Galatia 5:​19-21; 2 Petero 3:13.

To, mama ibounai be dika lasi. Baibel ia gwau Iehova be “mama Diravana.” (Esodo 34:​14, NW) Unai ena anina be dahaka? Bona Baibel ese mama namona be edena bamona ia gwauraia? Bona, ta ese mama dikana be edena bamona ia hadarerea diba? Hereva gabedia mani oi itaia.