Not Kahana amo Do Ia Mai Tuari!

1. Tadikaka Russell bona ena bamodia be edena stadi dalana idia badinaia, bona dahaka dainai ia be mai ena namo?

LAGANI 100 gunanai, Tadikaka C. T. Russell bona ena bamodia, Dirava ena Hereva idia stadilaia orea maragina ta, be idia hebou matamaia. Idia ura Baibel amo Iehova Dirava, Iesu Keriso, mase taudia dekenai ia vara gauna, bona mauri davalaia boubouna edia anina idia diba. Edia stadi dalana be ia auka lasi. Ta be henanadai ta do ia henia, bona unai grup lalonai idia noho taudia be unai topik ia herevalaia siri ibounai do idia tahua. Dokonai, tahua gaukara amo idia dibaia gaudia be lista ta dekenai do idia torea. Iehova ena heduru dainai unai Keristani tatau ese Baibel ena hahediba hereva badadia momo idia davaria, bona hari inai negai unai hereva be mai anina bada.

2. Dahaka dainai nega haida Baibel ena peroveta herevana ta ita lalopararalaia kerere diba?

² To, gabeai unai Bible Student taudia idia davaria Baibel ena peroveta herevana ta idia lalopararalaia totona be ia auka, to Baibel ena hahediba herevana ta idia lalopararalaia totona be auka lasi. Dahaka dainai? Badina ta be, nega momo Baibel ena peroveta herevadia be idia guguru matamaia eiava idia guguru neganai ita lalopararalaia diba. To badina ma ta ia noho danu. Peroveta herevana ta ita lalopararalaia namonamo totona, unai peroveta herevana ibounai ena anina ita tahua be namo. Bema peroveta herevana ta ena kahana sibona ita laloa bona kahana ma haida ita laloa lasi, reana unai hereva ena anina ita lalopararalaia kerere diba. Toana be Ioela bukana ena peroveta herevana ta dekenai unai ia vara. Mani unai peroveta herevana ita riviulaia, bona do itaia dahaka dainai hari unai peroveta herevana ita lalopararalaia dalana ita haidaua be namo.

3-4. Idaunega amo ema bona hari, edena dala ai Ioela 2:7-9 ena peroveta herevana ita laloa?

³ Ioela 2:7-9 duahia. Ioela ia peroveta kwadi momo herea be Israela tanona do idia hadikaia. Edia isena bona aukina be laiona ena bamona, unai kwadi be idia itaia gaudia ibounai do idia ania ore! (Ioe. 1:4, 6) Lagani momo lalonai, ita ese unai peroveta herevana be laulau dalanai, Iehova ena taunimanima be idia koua diba lasi kwadi momo herea bamona haroro gaukara idia karaia karana ida ita hahegeregerea. Ita laloparara unai gaukara ese “tano” eiava tomadiho gunalaia taudia ese idia biagua taudia dekenai dika bada ia havaraia.b

⁴ Bema Ioela 2:7-9 sibona ita duahia, reana do ita laloa unai be peroveta herevana ena anina maorona. To, bema unai peroveta herevana ena kahana ibounai ita laloa namonamo, do ita davaria iseda laloparara dalana ita haidaua be namo. Mani unai ena badina foa ita herevalaia.

GAU HAIDA IDIA IDAU ENA BADINA FOA

5-6. Dahaka henanadai do ita laloa bema inai siri ita duahia (a) Ioela 2:20? (b) Ioela 2:25?

⁵ Ginigunana, Iehova ena gwauhamata kwadi momo herea totona mani oi laloa, ia gwau: “Mirigini kahana dekena amo idia mai, ena kwadi orea be do lau lulua lao.” (Ioe. 2:20) Bema kwadi oreana ese Iesu ena hahegani haroro bona hahediba taudia halaoa gaukarana idia badinaia Iehova ena Witnes taudia ia laulaulaia, dahaka dainai Iehova ese idia do ia lulua? (Ese. 33:7-9; Mat. 28:19, 20) Ia hahedinaraia goevagoeva, Iehova be ena abidadama hesiai taudia ia lulua lasi, to gau ta eiava iena taunimanima ia dagedage henia tauna ta ia lulua noho.

⁶ Badina iharuana be Ioela 2:25 (NWT) ese ia hahedinaraia. Unai siri ai Iehova ia gwau: “Guna laganidia ai umui dekenai egu tuari orea badana lau siaia kwadi orea badana, apena lasi kwadi, aniani haragaharaga kwadi bona hitolo bada kwadi ese emui uma aniani idia hadikaia. Lau ese idia ania ore aniani ena davana do lau henia.” Ita itaia Iehova ia gwauhamata kwadi oreana ese idia hadikaia gaudia totona ‘davana do ia henia.’ Bema kwadi ese Basileia evanelia taudia ia laulaulaia, anina be idia harorolaia sivaraina ese dika do ia havaraia. To, unai hahemauri sivaraina ese kara dika taudia haida ia durua diba idia helalo-kerehai totona. (Ese. 33:8, 19) Idia dekenai unai be hahenamo badana!

7. Ioela 2:28, 29 ai, inai hereva “unai murinai” ena anina be dahaka?

⁷ Ioela 2:28, 29 duahia. Mani badina ihatoina ita laloa​—peroveta herevana lalonai idia vara gaudia ena nega ta ta. Ioela 2:28 ena kahana ginigunana be inai bamona ita gwauraia diba: “Unai murinai lau ese egu lauma helaga . . . do lau bubua.” (NWT) Oi itaia Iehova ia gwau, kwadi oreana ese edia gaukara idia haorea murinai iena lauma helaga do ia henia, a? Bema kwadi oreana be Dirava ena Basileia idia harorolaia taudia idia laulaulaia, dahaka dainai edia haroro gaukara idia haorea murinai Iehova ese idia dekenai iena lauma helaga do ia bubua diho? Momokani, bema Dirava ena lauma helaga ena heduru be lasi, idia be lagani momo lalonai do idia haroro lasi herevana dagedage idia vara bona edia gaukara idia taravatua.

8. Apokalupo 9:1-11 ese ia herevalaia kwadi momo be daidia ia laulaulaia? (Rau 1 ena laulau itaia.)

⁸ Apokalupo 9:1-11 duahia. Mani badina namba foa ita itaia. Guna ita ese Ioela ia herevalaia kwadi oreana be iseda haroro gaukara ida ita hahegeregerea, badina unai bamona peroveta herevana ta be Apokalupo bukana dekenai ia noho. Inai peroveta herevana ese kwadi momo ia herevalaia, edia vairana ena toana be taunimanima bamona bona “edia kwarana ai, toana be golo bamona korona idia noho.” (Apok. 9:7) Idia ese “edia baguna ai Dirava ena maka idia abia lasi taudia [Dirava ena inai taudia]” be hua faiv lalonai idia hahisia, unai be kwadi ta ena mauri ena daudau hegeregerena. (Apok. 9:4, 5) Unai be Iehova ena horoa hesiai taudia ia herevalaia. Idia be mai gari lasi ida Dirava ese inai nega oromana dikana do ia hahemaoro henia sivaraina idia harorolaia noho, unai dainai inai tanobada idia ura henia taudia idia moale lasi.

9. Ioela bona Ioane ese idia itaia kwadi oreana amo dahaka mai anina bada gaudia haida idia idau?

⁹ Momokani, Apokalupo bukana bona Ioela bukana ai ia noho peroveta herevana ai gau haida idia hegeregere. To, mai anina bada gaudia haida be idia idau. Mani inai oi laloa: Ioela ena peroveta herevana ai, kwadi ese uma ena aniani do idia hadikaia ore. (Ioe. 1:4, 6, 7) Ioane ena matahanai ai, kwadi oreana be “oda idia abia tanobada ena tubutubu gaudia” idia hadikaia lasi totona. (Apok. 9:4) Ioela ese ia itaia kwadi oreana be mirigini eiava not kahana amo idia mai. (Ioe. 2:20) Bona, Ioane ese ia itaia kwadi oreana be guri dobu masemase amo idia raka-lasi. (Apok. 9:2, 3) Ioela ese ia herevalaia kwadi oreana be Dirava ese ia luludia. Apokalupo bukana ese ia herevalaia kwadi oreana be Dirava ese ia lulua lasi, to ia rakatania edia gaukara idia hagugurua totona. Baibel ia hahedinaraia lasi Dirava ese idia ia lalonamo henia lasi.​—Maua ladana “Kwadi Oreana Ena Peroveta Herevadia​—Idia Hegeregere To Gau Haida Idia Idau” itaia.

10. (a) Ioela bona Apokalupo bukana ese idia herevalaia kwadi edia anina be tamona, a? (b) Haheitalai ta amo oi hahedinaraia, Baibel ai laulau herevana ta ena anina be dala idauna ai idia herevalaia diba.

¹⁰ Unai peroveta herevadia rua amo ita laloparara idia be mai edia idau. Unai ena anina be Ioela ese ia itaia kwadi be Apokalupo bukana ese ia herevalaia kwadi amo ia idau, a? Oibe. Baibel lalonai, nega haida laulau herevana ta ena anina be ia idau bema dala idauna ai idia gaukaralaia. Hegeregere, Apokalupo 5:5 ese Iesu ia gwauraia “Iuda iduhuna ena Laiona,” to 1 Petero 5:8 ese Diabolo ia gwauraia “ia boiboi bada laiona.” Ita herevalaia vadaeni badina foa ese idia hahedinaraia Ioela ena peroveta herevana ena anina ma ta ita tahua be namo. Unai be dahaka?

EDIA ANINA BE DAHAKA?

11. Edena dala ai Ioela 1:6 bona 2:1, 8, 11 ese ita ia durua kwadi oreana ita dibaia totona?

¹¹ Ioela ena peroveta herevana ia herevalaia badina siri ma haida ita itaia namonamo neganai, Ioela be do ia vara tuari ta ia herevalaia noho. (Ioe. 1:6; 2:1, 8, 11) Iehova ia gwau, iena “tuari orea” (Babulonia ena tuari taudia) do ia gaukaralaia, idia gwau-edeede Israela taudia ia panisia totona. (Ioe. 2:25) Unai tuari oreana idia gwauraia “mirigini” eiava not kahana amo ia mai be maoro, badina Babulonia taudia be not kahana amo Israela hanuana do idia tuari henia. (Ioe. 2:20) Unai tuari oreana be idia gaukara hebou namonamo kwadi oreana ta bamona. Ioela ia gwau: “Ta ese ma ta ena dala ia koua lasi. . . . Hanua ena latanai idia roho lao noho. Hanua ena magu idia heau hanaia noho. Ruma ena haba dekenai idia daekau lao, bona uindo dekenai idia vareai, henaoa taudia edia kara bamona.” (Ioe. 2:8, 9) Mani oi piksaia. Tuari taudia be gabu ibounai idia koua. Komu gabuna ta be lasi. Ta be Babulonia ena tuari taudia amo ia heau mauri diba lasi!

12. Edena dala ai Ioela ese ia herevalaia kwadi oreana ena peroveta herevana ia guguru?

¹² Kwadi oreana bamona, lagani 607 B.C.E. ai, Babulonia (eiava, Kaledea taudia) ese Ierusalema idia tuari henia. Baibel ia gwau: “Babulonia ena king . . . ese Iuda ena eregabe taudia be tuari kaia dekena amo idia alaia mase . . . . Babulonia ena king ese tau ta ia bogahisihisi henia lasi, to uhau taudia, buruka taudia, tau bona hahine, gorere taudia o mai goadadia taudia, ibounai be Dirava ese Nebukanesa ena siahu henunai ia atodia. Nebukanesa ena taudia ese Dirava ena Dubu Helaga idia gabua, bona Ierusalema ena magu idia hamakohia. Ierusalema ena ruma badadia ibounai danu idia gabua ore, bona kohu namodia ibounai idia hadikaia ore.” (2 Siv. 36:17, 19) Babulonia taudia ese unai tano idia hadikaia orea murinai, taunimanima idia gwau: “Ia be anina lasi tanona, taunimanima ta, o ubua gauna ta ia noho lasi, badina Babulonia taudia ese idia abia vadaeni.”​—Ier. 32:43.

13. Ieremia 16:16, 18 ena anina oi herevalaia.

¹³ Ioela ese ena peroveta herevana ia gwauraia bona lagani 200 bamona murinai, Iehova ese Ieremia ia gaukaralaia unai tuari totona gau ma haida do ia herevalaia. Ia gwau unai tuari taudia ese kara dika idia karaia Israela taudia do idia tahua bona guia. “[Iehova] ma ia gwau, ‘To hari lau ese haoda taudia momo do lau siaia, idia ese inai Israela taudia do idia alaia. Unai murinai, labana taudia momo do lau boiria, bona idia ese ororo badadia bona maragidia ibounai, bona nadi edia huanai, nadi matudia lalonai, inai taudia do idia tahudia, kohua lalonai danu. Edia kerere bona edia kara dika edia davana do lau habadaia, nega rua do lau henia.’” Davara ena dobu gabudia eiava uda badadia ese Babulonia tuari taudia amo idia helalo-kerehai lasi Israela taudia ia hunia diba lasi.​—Ier. 16:16, 18

SIVARAI NAMONA

14. Edena negai Ioela 2:28, 29 ena hereva ia guguru?

¹⁴ Ioela be sivarai namona ta ia gwauraia. Tano be do ia namo lou. (Ioe. 2:23-26) Bena vaira negai, taunimanima momo ese hereva momokani ena diba maorona do idia abia. Iehova ia gwau, “Lau ese egu Lauma, be taunimanima ibounai dekenai do lau bubua diho. Bona emui natuna tau bona natuna hahine ese, egu peroveta hereva do idia gwauraia hedinarai . . . Unai neganai danu egu Lauma, be hesiai taudia bona hesiai hahinedia danu, edia latanai do lau bubua diho.” (Ioe. 2:28, 29) Israela taudia be Babulonia amo idia giroa lou edia tano neganai, Dirava ese maoromaoro ena lauma helaga ia bubua diho lasi. To, lagani handred momo murinai, Pentekoste 33 C.E. ai unai ia vara. Edena dala ai unai ita diba?

15. Kara 2:16, 17 ena hereva bamona, Petero ese Ioela 2:28 ai, edena hereva ia gaukaralaia, bona unai ese dahaka ia hahedinaraia?

¹⁵ Dirava ena lauma helaga ena heduru amo, aposetolo Petero ese Ioela 2:28, 29 ena hereva be Pentekoste dinana ai ia vara gauna ta ida ia hahegeregerea. Daba 9 o’klok bamona ai, hoa dalanai Dirava ese ena lauma helaga ia bubua diho bona idia abia taudia be “Dirava ena kara badadia idia herevalaia.” (Kara 2:11) Lauma helaga ena heduru amo, Petero be Ioela ena peroveta herevana ia gwauraia lou neganai, hereva idauna ta ia gaukaralaia. Ia gaukaralaia herevana oi itaia, a? (Kara 2:16, 17 duahia.) Petero be Ioela ena hereva ia gwauraia lou neganai, inai hereva “unai murinai,” amo ena hereva ia matamaia lasi. To Petero ia gwau: “Dina gabedia ai”​—unai siri ena hereva ma haida ese idia hahedinaraia, ena anina be Ierusalema bona dubu helaga idia do hadikaia lasi negana ai​—Dirava ena lauma helaga be “taunimanima idauidau latanai” do ia bubua diho. Unai ese ia hahedinaraia nega sisina ia hanaia murinai, Ioela ena peroveta herevana ia guguru.

16. Keristani taudia edia negai Dirava ena lauma helaga ese edena dala ai haroro gaukara ia durua, bona hari inai negai be edena bamona?

¹⁶ Keristani taudia edia negai Dirava ese ena lauma helaga ia bubua diho, bona unai nega amo haroro gaukara be ia bada ia lao. Lagani 61 C.E. bamona ai, Paulo ese Kolose taudia dekenai ena revareva ia torea neganai, ia gwau sivarai namona be “tanobada hegegemadai idia harorolaia.” (Kol. 1:23) Iehova ena lauma helaga ena heduru dainai hari inai negai haroro gaukara be ia bada ia lao noho​—“tanobada ibounai dekenai”!​—Kara 13:47; maua ladana “Lau ese Egu Lauma Helaga . . . Do Lau Bubua” itaia.

DAHAKA IA IDAU?

17. Edena dala ai iseda laloparara Ioela ena peroveta herevana kwadi oreana dekenai ia idau?

¹⁷ Dahaka ia idau? Hari Ioela 2:7-9 ena peroveta herevana dekenai laloparara maorona ita abia. Ia hahedinaraia, unai siri ese iseda haroro goadagoada karana ia herevalaia lasi, to lagani 607 B.C.E. ai, Babulonia tuari oreana ese Ierusalema ia tuari henia karana ia herevalaia.

18. Iehova ena taunimanima dekenai dahaka ia idau lasi?

¹⁸ Dahaka ia idau lasi? Iehova ena taunimanima be gabu ibounai dekenai dala idauidau ai sivarai namona idia harorolaia noho. (Mat. 24:14) Gavamani edia taravatu ta ese ita do ia koua diba lasi haroro gaukara ena hahegani ita badinaia totona. Bona, Iehova ena heduru amo, mai gari lasi ida ita gaukara goada noho Basileia ena sivarai namona ita harorolaia totona! Mai manau ida Iehova ena heduru ita tahua noho Baibel ena peroveta herevadia ita lalopararalaia totona, badina ita abia dae nega maorona ai ia ese “hereva momokani ibounai dekenai” ita do ia hakaua lao!​—Ioa. 16:13.