Hahetoho Ai Haheaukalaia Karana Ese Iehova Dekenai Emai Abidadama Ia Hagoadaia

Ada Dello Stritto ese ia sivarailaia

Harihari sibona dina ena siri be egu noutbuk ai lau torea ore. Egu mauri lagani be 36, to hora rua lalonai unai hereva kwadogidia lau torea. Dahaka dainai? Egu sinana ese unai ena badina do ia sivarailaia.​​—⁠Joel

LAU bona egu adavana be lagani 1968 ai bapatiso ai abia bona Iehova ena Witnes taudia ai ai lao. Emai natuna memero, David bona Marc idia vara murinai, mero ihatoina, Joel ia vara. Joel be lagani 1973 ai, Belgium ena taoni, Binche ena hospital ai ia vara, Brussels ena saut kahana amo unai taoni ena daudau be kilomita 60 bamona. Ia vara neganai, ena metau be kilogram 1.7 sibona. Lau be hospital lau rakatania, to Joel be hospital dekenai ia noho, unai amo ia do idia naria ela bona ena tauanina ia goada.

Wiki haida murinai ai itaia emai natuna ena tauanina be ia goada lasi dainai lau bona egu adavana, Luigi ese ia be maragidia edia doketa ta dekenai ai abia lao. Doketa ese Joel ena tauanina ia sekea murinai, ia gwau: “Lau sori bada. Toana be Joel ena tauanina ai idia noho gorere be ena kakana, David bona Marc dekenai idia noho lasi.” Lau bona Luigi ai laloa momo. Unai nega ai lau laloparara Joel be gorere badana ta ia abia. Bena doketa ese egu adavana ia hakaua siri bona ia hamaoroa: “Emu natuna be trisomy 21 gorerena ia abia,” unai gorere ena ladana ma ta be Down syndrome.a

Doketa ena hereva dainai ai lalohisihisi bona doketa ma ta ena heduru ai tahua. Unai doketa ese Joel ena tauanina be hora ta lalonai ia sekea namonamo bona hereva ta ia gwauraia lasi. Unai dainai lau bona Luigi ai laloa doketa amo haere ai abia totona do ai naria daudau. To gabeai doketa be ai ia itaia bena ia gwau, “Emui natuna ese ena mauri ibounai lalonai emui heduru do ia abia be namo.” Bena ma ia gwau, “To do ia moale badina umui ese ia umui lalokau henia!” Doketa ena hereva dainai lau laloa momo, bona Joel lau rosia bena ruma dekenai ai lao. Unai neganai Joel be wiki eit sibona ia mauri vadaeni.

Keristani Heboudia Bona Haroro ese Ai Idia Hagoadaia

Doketa ese Joel idia sekea namonamo lou neganai, idia davaria iena kudouna ia bada bona ena turia idia dika. Unai dainai ena kudouna ese iena baragi ia gigidia, bona ia be gorere ma haida ia abia haraga diba. Joel ia vara bena hua foa murinai, ia be nimonia ia abia bona hospital dekenai ai abia lao, unuseniai ia be sibona daiutu ta ai ia noho. Ia dekenai idia vara gaudia idauidau ai itaia dainai ai lalohisihisi bada. Ai ura dikadika ia ai rosia bona naria, to wiki ten lalonai doketa ese ai idia hamaoroa ia do ai dogoatao lasi. Lau bona Luigi be ia ai itaia sibona, emai imana ai dogoatao, bona ai guriguri.

Unai nega aukana lalonai, lau bona egu adavana be hanaihanai emai natudia memero, David bona Marc ida kongrigeisen heboudia dekenai ai lao. Unai neganai David ena mauri lagani be 6 bona Marc ena mauri lagani be 3. Kingdom Hall dekenai ai lao neganai, ai mamia Iehova ese ena imana amo ai ia dogoatao bamona. Unuseniai emai tadikaka taihu ida ai noho, bona ai mamia emai lalohekwarahi gaudia be Iehova dekenai ai atoa, unai ese lalomaino ia henia. (Sal. 55:22) Joel idia naria nesi hahinedia danu idia itaia Keristani heboudia ai lao henia karana ese ai ia durua lalohadai maorona ai abia totona.

Danu, unai nega ai Iehova lau guriguri henia lau dekenai goada do ia henia haroro gaukara lau karaia totona. Lau ura lasi ruma dekenai lau noho bona lau tai sibona, to lau ura ma haida dekenai Dirava ena gwauhamata​​—⁠gorere lasi tanobadana do ia mailaia​—⁠ena badina lau herevalaia karana ese lau ia hagoadaia. Haroro gaukara lau karaia negadia ibounai lalonai, lau mamia Iehova ese egu guriguri ia haerelaia.

“Inai be Hoa Gauna!”

Joel be hospital amo ruma dekenai ai abia lao dinana dekenai ai ibounai be ai moale bada! To murina dinana ai, ai lalohisihisi bada badina Joel ena gorere be ia bada, bona hospital dekenai ai abia lao haraga. Doketa ese ena tauanina idia sekea murinai, ai idia hamaoroa: “Joel be hua siks sibona do ia mauri.” Hua rua idia ore murinai, toana be doketa edia hereva ia momokani badina Joel ena gorere be ia bada ia lao. Doketa ta be ai ia hamaoroa: “Lau sori bada. Joel ai durua totona gau ma ta ai karaia diba lasi.” Bena ma ia gwau: “To Iehova sibona be hegeregere Joel ia durua totona.”

Lau be Joel idia naria daiutuna dekenai lau giroa lou. Ena be lau lalometau bona egu tauanina ia hesiku bada, to egu lalona lau hadaia Joel ena daiutu do lau rakatania lasi totona. Taihu haida be nega idia haria bona lau idia durua Joel ai naria totona, unai amo Luigi be David bona Marc do ia naria diba. Wiki ta ia ore murinai, Joel be kudou gorere (heart attack) ia abia. Nesi taudia be karaharaga Joel ena daiutu dekenai idia heau vareai to gau ta idia karaia diba lasi ia idia durua totona. Miniti haida murinai, nesi ta be metairametaira ia gwau, “Ia mase vadaeni. . . . ” Unai lau kamonai neganai lau tai bada herea bona daiutu amo lau raka-lasi. Lau ura Iehova lau guriguri henia, to Ia dekenai egu lalohisihisi gauna lau gwauraia be auka. Miniti 15 bamona murinai, nesi ta be lau dekenai ia boiboi ia gwau, “Joel be ia namo!” Egu imana ia abia bona ia gwau, “Oi mai, hari ia oi itaia diba.” Joel ena daiutu dekenai lau giroa lou neganai, lau itaia ia hahodi noho! Iena sivarai be karaharaga ma haida ese idia kamonai danu. Nesi bona doketa taudia idia mai ia idia itaia totona, bona momo idia gwau, “Inai be hoa gauna!”

Ena Mauri Lagani be Foa Neganai Gau Namona ta Ia Vara

Joel be mero maragina neganai, ai laloatao nega momo maragidia edia doketa be ai ia hamaoroa, “Joel ese ena mauri ibounai lalonai emui heduru do ia abia be namo.” Iehova be mai ena lalokau ida ai ia naria, bona Joel ia vara negana amo unai ai mamia dainai, ai ura Joel dekenai unai ai hahedinaraia. Dala idauidau ai Joel dekenai unai ai hahedinaraia badina ena mauri dinadia ibounai lalonai emai heduru ia ura.

Joel ena mauri lagani ginigunadia seven lalonai, ai be unai lagani ta ta lalonai iena gorere dainai ai hekwarahi bada. October bona March huanai Joel be gorere idauidau ia davaria dainai hospital dekenai ai abia lao loulou. To danu, lau hekwarahi nega lau atoa emai natudia David bona Marc lau naria totona. Idia danu be Joel idia durua bona unai ese anina namona ia havaraia. Hegeregere, doketa haida ese ai idia hamaoroa Joel be do ia raka diba lasi. To nega ta Joel ena mauri lagani be foa neganai, emai natuna mero Marc ia gwau, “Joel, sinana vairanai oi hahedinaraia oi raka diba!” Joel lau itaia ia raka matamaia neganai, lau hoa! Lau bona egu ruma bese be ai moale bada bona Iehova ai tanikiu henia. Nega haida, bema ai itaia Joel be gau haida ia karaia namonamo, herevana unai be gau maragina, to hanaihanai ia dekenai hanamoa hereva ai gwauraia.

Ia Maragi Negana amo Iehova Ena Dala Ai Hadibaia Dainai Anina Namona Ia Vara

Nega momo Joel be Kingdom Hall dekenai hebou totona ai abia lao. Joel be gorere ma haida ia abia lasi totona, ai ese beibi idia udaia gauna ta (stroller) lalonai ia ai udaia bona plastik bamona gauna ta amo ai koua. Ena be unai plastik bamona gauna amo ia ai koua, to kongrigeisen taudia ia itaia dainai ia moale.

Tadikaka bona taihu edia lalokau bona heduru karana amo ai be heduru bada ai abia. Tadikaka ta be nega momo Isaia 59:1 ai idia noho herevadia ia gwauraia, unai siri ia gwau: “Kamonai, Lohiabada ena imana ia kwadogi, a? Ia kwadogi dainai umui ia hamauria diba lasi, a? Lasi momokani, bona iena taiana be ia kudima lasi danu.” Unai siri ena hereva ese ai idia hagoadaia Iehova ai abidadama henia totona.

Joel ia tubu daekau neganai, ai be ai ura ia ai durua ena mauri lalonai Iehova hesiai henia karana ia laloa bada totona. Unai dainai nega ibounai ia dekenai Iehova ai herevalaia, unai amo ia ai durua ena lalokau karana ena guba Tamana dekenai do ia habadaia totona. Iehova ai noia ai do ia durua Joel ai hadibaia namonamo totona, unai amo anina namona do ia vara.

Joel ena mauri lagani be 13 ia lao 15 bamona neganai, ai itaia ia ura dikadika Baibel ena hereva momokani be ia hedavari henia taudia dekenai ia herevalaia. Iena mauri lagani be 14 neganai opereisen badana ta ia abia, to ia namo ia lao noho lalonai lau ia nanadaia, “Sinagu bema namo lau ia ivaia doketa dekenai Mauri Hanaihanai bukana ta lau henia, a?” Lagani haida murinai, Joel be opereisen ma haida ia abia. Unai neganai ai laloa do ia mase. Joel be opereisen ia do abia lasi neganai, ia ida ai hegaegaelaia revareva ta be ena doketa dekenai ia henia. Unai revareva be Joel ena lalohadai rara gaukaralaia karana dekenai ia herevalaia. Doketa ese Joel ia nanadaia, “Inai revareva ai idia noho herevadia dekenai oi lalotamona, a?” Joel ia haere, “Oibe.” Ai moale badina ai itaia emai natuna ese ena Havaraia Tauna ia abidadama henia bona ia ura Ia do ia hamoalea. Hospital ai idia gaukara taudia danu ese ai idia durua, bona unai ai moalelaia bada.

Joel Ena Hetura Karana Iehova ida Ia Goada Ia Lao

Joel ena mauri lagani be 17 neganai, Iehova dekenai ena mauri ia gwauhamatalaia bona bapatiso ia abia. Unai dina do ai laloaboio lasi! Ai moale badina ai itaia iena hetura karana Iehova ida be ia goada ia lao. Unai nega amo Joel ena lalokau Iehova dekenai be ia goada bona hereva momokani ia ura henia bada. Joel be ia hedavari henia taudia ibounai dekenai ia gwau, “Egu mauri lalonai hereva momokani be mai anina bada!”

Joel ena mauri lagani be 16 ia lao 19 bamona neganai, ia be duahiduahi bona toretore ia diba. Joel ia hekwarahi bada unai ia karaia totona. Unai dainai ia be ena noutbuk ai hereva matamatana ta ia torea neganai, ia moale bada. Unai nega amo ema bona hari, dina ta ta ai ia be Dina Iboudiai Buka Helaga Tahua buklet amo dina ena siri ia itaia. Unai murinai, ia ese dina ena siri be ena noutbuk lalonai ia torea. Hari ena noutbuk lalonai dina ena siri momo idia noho!

Hebou dinadia ai, Joel be hebou gabuna dekenai ai abia lao haraga badina ia ura Kingdom Hall lalonai idia vareai taudia ia hedavari henia. Hebou lalonai ia be haere ia henia bona haheitalai haida ia karaia diba, bona unai ia moalelaia. Danu hebou ai maikrofon ia abia loaloa bona gaukara ma haida ia karaia. Wiki ta ta ai, bema ena tauanina ia goada, ai ia bamoa haroro totona. Lagani 2007 ai kongrigeisen idia hadibaia Joel be hesiai tauna ena maduna ia abia. Unai negai ai moale bada bona ai tai. Unai be hahenamo badana ta Iehova amo!

Ai Mamia Iehova ese Ai Ia Durua

Lagani 1999 ai hahetoho ma ta ai davaria. Aiemai motuka be motuka ma ta ese ia bampaia bona Luigi be bero badana ta ia abia. Iena aena ta idia utua oho, bona ena doruna turiana dekenai opereisen haida ia abia. To unai nega ai, Iehova ai abidadama henia dainai, ai mamia Ia ese ena hesiai taudia dekenai goada ia henia. (Fili. 4:​13) Ena be Luigi ena tauanina kahana haida idia namo lasi, to unai ese emai lalona ia hametaua lasi. Ia be moni gaukara ia karaia diba lasi dainai, ia dekenai nega bada ia noho Joel ia naria totona. Unai ese lau ia durua nega lau atoa sibona egu stadi, hebou bona haroro gaukara lau karaia totona. Danu, Luigi dekenai nega bada ia noho ena maduna idauidau ruma bese bona kongrigeisen lalonai ia huaia namonamo totona. Hari Luigi be emai kongrigeisen ena elda orea ena kodineita.

Ena be emai mauri lalonai gau idauidau idia vara, to nega bada ai atoa ai gaukara hebou totona. Idia hanaia laganidia lalonai ai itaia namona be lalohadai maorona ai abia bona ai karaia diba lasi gaudia dainai ai laloa momo lasi. Ai lalohisihisi negadiai, guriguri karana amo emai hemami be Iehova dekenai ai gwauraia. To madi, emai natudia David bona Marc idia bada bona ruma idia rakatania neganai, edia hesiai gaukara Iehova dekenai idia hadokoa. Ai ura bada idia ese Iehova idia hesiai henia lou.​​—⁠Luka 15:​17-​24.

Unai laganidia lalonai, ai mamia Iehova be ai ia durua, bona hahetoho idauidau ai davaria neganai, Ia dekenai ai tabekau diba. Ai dekenai Isaia 41:13 ena hereva be mai anina bada: “Lau be Lohiabada, emui Dirava. Lau ese umui lau hagoadaia noho, lau gwau, ‘Do umui gari lasi, lau ese umui do lau durua.’ ” Ai diba Iehova ese ai ia durua, bona unai ese ai ia hagoadaia bada. Oibe, ai gwau diba hahetoho ai haheaukalaia karana ese emai abidadama emai guba Tamana Iehova dekenai ia hagoadaia.

[Footnote]

[Pictures on page 16, 17]

Joel bona ena sinana, Ada

[Picture on page 18]

Ada, Joel, bona Luigi

[Picture on page 19]

Joel ia ura dikadika Kingdom Hall ai tadikaka taihu ia hedavari henidia