Edukeisen Bona Moni ese Vaira Nega Namona Ia Henia, A?

Momo idia laloa edukeisen badana bona kohu momo maurina ese edia vaira nega do ia hanamoa. Idia abia dae, bema ta be iunivesiti dekenai ia lao, unai ese kampani, famili, bona komiuniti do ia durua bada. Danu, idia laloa edukeisen namona dainai moni gaukara namona do idia davaria bona moni momo idia haboua taudia be do idia moale.

MOMO ESE IDIA KARAIA DISISEN

China tauna ta ladana, Shan Chen, ena hereva mani oi laloa. Ia gwau, “Lau laloa iunivesiti digri do lau abia be namo, unai amo ogogami maurina do lau noholaia lasi bona pei bada moni gaukara ese moale bona mauri namona do ia henia.”

Momo be mauri namona idia abia totona, idia ura tano ma haida edia iunivesiti badadia dekenai idia lao. Unai kara be ia bada, to COVID-19 gorerena dainai tano ma ta lao totona ia auka. Lagani 10 gunanai, orea ta be ena tahua karana amo ia davaria, Asia amo stiuden momo herea be tano ma ta ena iunivesiti dekenai idia lao.

Nega momo tama sina idia gaukara goada, unai amo edia natudia be tano ma ta ai iunivesiti idia lao diba. Taiwan tauna ta ladana, Cheshen, ia gwau: “Egu tama sina be kohu momo taudia lasi, to ai natudia 4 be United States ena sikuli badana ta dekenai idia siaia lao.” Iena famili be unai sikuli ena davana karaia totona, abitorehai momo idia karaia.

EDUKEISEN ESE EMU VAIRA NEGA IA HANAMOA, A?

Matamata hahine rua be iunivesiti ai stadi totona idia raka lao noho. — Edukeisen badana bona kohu momo maurina idia tahua taudia momo idia lalohisihisi

Dala haida ai edukeisen be mai ena heduru, to nega momo stiuden idia ura karaia gaudia be edukeisen ese ia hagugurua lasi. Hegeregere, sikuli davana karaia totona idia gaukara goada bona moni momo idia abitorehai murinai, momo be idia ura henia moni gaukarana idia davaria lasi. Singapore ena buka ta Business Times dekenai Rachel Mui ia gwau: “Iunivesiti amo idia gradueit taudia momo herea be moni gaukara idia davaria diba lasi.” Taiwan ai ia noho tauna ta ladana, Jienji, be edukeisen badana ia lao, ia gwau, “Momo be idia ura henia gaukarana totona digri idia abia, to idia ura henia gaukarana idia davaria lasi.”

Momo be idia ura henia moni gaukarana idia karaia, to idia itaia idia ura henia mauri dalana idia davaria lasi. Thailand tauna ta ladana, Niran be Europe ena iunivesiti amo ia giroa lou murinai, moni gaukara ta ia davaria. Ia gwau, “Lau karaia digri ese lau ia durua pei bada moni gaukarana ta lau abia totona. To, pei badana abia totona lau gaukara goada bona hora momo lau gaukara be namo. Dokonai, kampani ese gaukara taudia momo ia hadokoa, bona lau danu. Lau laloparara moni gaukara ese mauri namona ia henia diba lasi.”

Ena be taunimanima be mai edia moni momo bona idia laloa idia noho namonamo, to famili lalonai problem momo idia davaria, idia gorere, bona moni dainai idia lalohekwarahi. Japan tauna ta ladana, Katsutoshi, ia gwau, “Egu moni be momo herea, to lau moale lasi badina ma haida be lau dekenai idia jeles bona lau idia kara namo henia lasi.” Vietnam ai ia noho hahine ta, Lama, ia gwau, “Momo idia ura moni momo idia haboua badina idia laloa unai ese edia mauri do ia hanamoa, to nega momo idia lalohekwarahi, idia gorere, bona lalometau.”

DAHAKA DAINAI EDUKEISEN BONA MONI ESE NOHO NAMO IA HAVARAIA LASI

Momokani, taunimanima be edukeisen namona bona moni idia ura, unai amo idia bona edia famili idia naria diba. To, unai gaudia ese noho namo ia havaraia lasi. Dahaka dainai? Toretore Helagadia ena hereva mani ita itaia.

NEGA IBOUNAI EDUKEISEN BADANA ESE NAMO IA HAVARAIA LASI.

“Heau haraga taudia be hanaihanai heau helulu dekenai idia kwalimu lasi, . . . diba bada taudia be hanaihanai idia taga lasi, bona diba momo taudia be hanaihanai idia kwalimu lasi, badina idia ibounai dekenai dika be nega idauidau ai idia vara kava.” —⁠HADIBAIA TAUNA 9:11.

Sikuli badana idia lao taudia momo idia kwalimu lasi, badina idia vara gaudia haida idia koua diba lasi. Ena be ta be edukeisen namona ia abia, to bema ena tano ai moni o politikol problem idia vara, o bema momo ese idia lalodika henia, reana unai ese ia koua diba ia ura karaia gaudia ia hagugurua totona.

KOHU DO IDIA NOHO DAUDAU LASI.

“Namo lasi kohu momo abia totona emu goada oi haorea. Unai oi karaia lasi, to laloparara oi hahedinaraia. Oi ura unai oi itaia neganai, do ia noho lasi, badina ia be apena do ia vara bona ugava bamona do ia roho lao.”—AONEGA HEREVADIA 23:4, 5.

Moni ese ita ia durua diba, to unai heduru ia noho daudau lasi. Hekwakwanai idia vara neganai, ta ena moni ibounai ia boio haraga diba. Disasta badadia, hegeregere tano mareremarere, lahi badadia, bona saiklon dainai ta ena moni ia haboioa o ena noho gabuna ia hadikaia diba.

NEGA MOMO MONI DAINAI PROBLEM IDIA VARA.

“Taga tauna be ena kohu momo dainai do ia mahuta lasi.”—HADIBAIA TAUNA 5:12.

Hong Kong ai ia noho tauna ta, Franklin, dekenai unai ia vara. Ia be edukeisen badana ia abia bona moni gaukara namona ia karaia. Bena idia abia hidi bosi ai ia lao totona. Ia gwau, “Lalohekwarahi karana ese egu helt ia hadikaia matamaia. Bona lau laloa momo dainai lau mahuta namonamo lasi.” Dokonai ia gaukara diba lasi. Unai ia laloa lou neganai, ia gwau, “Lau be sibona dekenai lau henanadai dahaka dainai moni gaukara lau karaia noho. Bena mauri ena badina lau lalohadailaia matamaia.”

“Namo lasi kohu momo abia totona emu goada oi haorea.”—AONEGA HEREVADIA 23:4

Franklin bamona, momo idia gwau mauri ai mai anina bada gaudia idia karaia diba, unai ese edukeisen badana bona kohu momo maurina ia hereaia. Unai dainai edia vaira nega ia namo totona kohu momo idia tahua lasi, to idia gaukara goada tau o hahine namona ai idia lao bona ma haida idia kara namo henia. To unai ese vaira nega namona ia havaraia, a? Atikol ma ta ai unai do ia haerelaia.