Lalokau Tauna ta be Iehova Ia Rakatania Neganai

1. Ta ena lalokau tauna be kongrigeisen amo idia atoa siri neganai, iena hemami be edena bamona?

EMU LALOKAU tauna ta be kongrigeisen amo idia atoa siri, a? Reana emu kudouna ia makohi momokani! Taihu Hilda ia gwau: “Lagani ibounai 41 ai headava murinai egu lalokau adavana ia mase, bona lau laloa unai be lalohisihisi bada negana.b To egu natuna mero ese kongrigeisen, ena adavana, bona ena natudia ia rakatania neganai, unai lalohisihisi be dika momokani.”

2-3. Salamo 78:40, 41 hegeregerena, Iehova ena hesiai taudia ese ia idia rakatania neganai, iena hemami be edena bamona?

² Iehova ena aneru natudia be ia idia dadaraia neganai, ia lalohisihisi bada! (Iuda 6) Bona iena lalokau taudia, Israela besena unai, be nega momo ia idia gwau-edeede henia neganai, ia lalohisihisi bada. (Salamo 78:40, 41 duahia.) Namona be oi diba, emu lalokau tauna ta ese Iehova ia rakatania neganai, iseda lalokau guba Tamana ia lalohisihisi bada danu. Emu lalohisihisi ia lalopararalaia bona mai hebogahisi ida oi do ia durua bona hagoadaia.

³ Inai atikol ai, Iehova ese ita ia durua unai lalohisihisi ita hanaia dalana do ita herevalaia. Danu, kongrigeisen ai unai hekwakwanai idia davaria taudia ita durua daladia do ita herevalaia. To, mani ita dadaraia be namo lalohadai kererena ta ita herevalaia guna.

SIBONA OI BLEIM LASI

4. Natu ta be Iehova ia rakatania neganai, tama sina edia hemami be edena bamona?

⁴ Natuna mero o kekeni be Iehova ia rakatania neganai, nega momo tama sina idia laloa idia be edia natuna idia durua namonamo lasi Iehova ia tomadiho henia noho totona. Tadikaka Luke ena natuna be orea amo idia atoa siri murinai, ia gwau: “Lau be sibona lau bleim. Nihi dikadia lau abia. Nega haida lau taitai bona egu kudouna ia hisihisi.” Unai bamona hekwakwanai ia davaria taihu ta, Elizabeth, be mai lalohisihisi ida ia gwau: “Reana lau be sina namona lasi. Lau laloa egu natuna mero dekenai hereva momokani lau hadibaia namonamo lasi.”

5. Ta be Iehova ia rakatania neganai, unai be daika ena kerere?

⁵ Namona be ita laloatao, Iehova ese ita ta ta dekenai ura kwalimu ia henia. Unai ena anina be abia hidi ita karaia diba, Dirava do ita hesiai henia eiava lasi. Ena be matamata taudia haida edia tama sina be haheitalai namona lasi, to idia ese abia hidi idia karaia Iehova idia badinaia noho totona. Tama sina haida be idia hekwarahi bada natudia idia durua Iehova idia lalokau henia totona, to idia bada neganai Iehova idia rakatania. Oibe, ita ta ta be abia hidi do ita karaia, Iehova ita hesiai henia eiava lasi. (Ios. 24:15) Unai dainai umui lalohisihisi tama sina e, emui natudia ese Iehova idia rakatania neganai, sibona umui bleim lasi!

6. Tama o sina be Dirava ia rakatania neganai, natudia edia hemami be edena bamona?

⁶ Nega haida tama o sina be hereva momokani ia rakatania bona iena ruma bese ia rakatania danu. (Sal. 27:10) Unai ia vara neganai, natudia idia lalohisihisi bada badina unai tama o sina idia matauraia bona lalokau henia bada. Esther ena tamana be orea amo idia atoa siri neganai, ia gwau: “Nega momo lau taitai, badina lau laloparara ia be hereva momokani amo ia hure oho sibona lasi. To abia hidi ia karaia Iehova ia rakatania totona. Egu tamana lau lalokau henia dainai idia atoa siri neganai, nega momo iena mauri totona lau lalohekwarahi bona lau gorere.”

7. Tama o sina be orea amo idia atoa siri neganai, natudia dekenai Iehova ena hemami be edena bamona?

⁷ Matamata taudia e, bema emui tama o sina be orea amo idia atoa siri, umui ai laloa bada! Namona be umui diba Iehova ese emui hisihisi ia itaia. Ia ese umui ia lalokau henia bona ia umui badinaia dainai ia moale bada, bona ai, emui tadikaka taihu, ai moale danu. Bona laloatao, emui tama o sina ese ia karaia abia hidi be emui kerere lasi. Guna ita hereva bamona, Iehova be ita ta ta dekenai ura kwalimu ia henia. Bona ena mauri ia gwauhamatalaia bona ia bapatiso tauna be “sibona ena maduna do ia huaia.”​—Gal. 6:5.

8. Ruma bese taudia be idia atoa siri tauna ia giroa mai totona idia naria noho lalonai, dahaka idia karaia be namo? (Maua itaia danu: “Iehova Dekenai Oi Giroa Lou.”)

⁸ Emu lalokau tauna ta be Iehova ia rakatania neganai, oi ura bada dina ta Dirava dekenai do ia giroa lou. To oi naria noho lalonai dahaka do oi karaia? Namona be emu hetura karana Iehova ida oi hagoadaia noho. Unai bamona oi karaia neganai, emu ruma bese taudia bona idia atoa siri tauna dekenai oi be haheitalai namona. Danu, heduru oi abia emu lalohisihisi oi haheaukalaia totona. Mani unai heduru gaudia haida ita herevalaia.

EMU ABIDADAMA OI HAGOADAIA DALADIA

9. Edena dala haida ai Iehova ese oi ia hagoadaia diba? (Maua itaia danu: “Hahegoada Siridia, Bema Emu Lalokau Tauna ese Iehova Ia Rakatania.”)

⁹ Emu abidadama idia hagoadaia gaudia oi karaia noho. Gau badana be oi bona emu ruma bese taudia edia abidadama oi hagoadaia noho. Edena dala ai? Hanaihanai Baibel oi duahia, oi laloa dobu bona Keristani heboudia oi lao karana amo Iehova ese oi do ia hagoadaia. Joanna ena tamana bona kakana be hereva momokani idia rakatania neganai, ia gwau: “Baibel ese ia sivarailaia taudia hegeregere, Abigaila, Eseta, Iobu, Iosepa, bona Iesu edia sivarai lau duahia neganai, lalomaino lau abia.” Edia haheitalai namodia ese lau ia hagoadaia bona lau ia durua lalohadai namodia lau abia totona. Iseda JW Broadcasting^® anedia ese lau idia hagoadaia danu.”

10. Edena dala ai Salamo 32:6-8 ese ita ia durua iseda lalohisihisi ita haheaukalaia totona?

¹⁰ Iehova dekenai emu lalohekwarahi gaudia ibounai oi herevalaia. Oi lalohisihisi neganai, guriguri karana oi hadokoa lasi. Iseda lalokau Diravana do oi noia oi do ia durua iena lalohadai oi abia totona bona ‘oi dekenai aonega do ia henia bona emu raka dalana be oi do ia hadibaia.’ (Salamo 32:6-8 duahia.) Reana, oi lalohisihisi dainai Iehova dekenai emu hemami korikorina oi gwauraia diba lasi. To ia ese emu lalohisihisi ia lalopararalaia. Iehova ese oi ia lalokau henia bada bona oi ia hagoadaia ia dekenai emu lalona ai idia noho gaudia ibounai do oi gwauraia.​—Eso. 34:6; Sal. 62:7, 8.

11. Heberu 12:11 hegeregerena, dahaka dainai Iehova ena matahakani dalana ita abia dae be namo? (Maua itaia danu: “Atoa Siri Karana​—Iehova Ena Matahakani mai Lalokauna.”)

¹¹ Elda taudia ese idia karaia disisen dekenai ita lalotamona. Orea amo atoa siri karana be Iehova ese mai lalokau ida ta ia matahakani henia karana. Unai ese kerere tauna bona kongrigeisen taudia ibounai ia durua danu. (Heberu 12:11 duahia.) Kongrigeisen lalonai reana haida do idia gwau elda taudia be disisen maorona idia karaia lasi. To, laloatao unai bamona taudia idia ura lasi kerere tauna idia gwauraia dika. Ita be sivarai ibounai ita diba lasi. Aonega karana be unai hahemaoro idia karaia elda taudia do ita abidadama henia. Badina idia gaukara goada Baibel ena hakaua herevadia idia badinaia bona unai hahemaoro gaukara be ‘Iehova totona idia karaia.’​—2 Siv. 19:6.

12. Haida ese Iehova ena matahakani dalana idia badinaia dainai, dahaka namo ia vara?

¹² Elda taudia ese emu lalokau tauna be orea amo idia atoa siri ena disisen oi abia dae neganai, oi ese ia oi durua Iehova dekenai ia giroa lou totona. Matamanai ita gwauraia taihu Elizabeth, ia gwau: “Emai natuna mero bamoa karana ai hadokoa neganai, unai be ia auka momokani. To Iehova dekenai ia giroa lou murinai ia gwau ia idia atoa siri karana be maoro. Bona ia gwau unai amo gau momo ia dibaia. Oibe, lau laloparara Iehova ena matahakani karana be mai ena namo.” Bona ena adavana, Mark, ia gwau: “Emai natuna mero ese lau ia hamaoroa ai be ia ai bamoa lasi dainai ia giroa lou. Lau moale badina Iehova ese ai ia durua iena hakaua daladia ai badinaia totona.”

13. Dahaka ese oi ia durua diba emu lalohisihisi oi haheaukalaia totona?

¹³ Emu hemami idia lalopararalaia turadia oi hereva henia. Namona be lo tadikaka taihu oi bamoa momo, bona oi do idia durua oi goada noho totona. (Aon. 12:25; 17:17) Matamanai ita herevalaia taihu Joana, ia gwau: “Lau mamia lau be sibona lau noho. To tura korikoridia lau hereva henia neganai, idia ese lau idia durua lau moale noho totona.” To, bema kongrigeisen ai haida edia hereva amo emu hemami idia hadikaia, dahaka do oi karaia?

14. Dahaka dainai ‘ta ta iseda kara do ita haheaukalaia noho bona ita gwauatao heheni’?

¹⁴ Namona be tadikaka taihu dekenai oi haheauka. Namo lasi ita laloa, ibounai be hereva maorodia sibona do idia gwauraia. (Iam. 3:2) Ita ibounai be goevadae lasi dainai, bema haida idia diba lasi dahaka do idia hereva, eiava idia laloa namonamo lasi bona idia gwauraia hereva ese oi ia hahisia, edia kara dekenai oi hoa lasi. Mani Aposetolo Paulo ena sisiba herevana ita laloatao, ia gwau: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni.” (Kol. 3:13) Ena natuna mero idia atoa siri taihu ta ia gwau: “Tadikaka idia ura lau idia hagoadaia to edia hereva dalana amo lau idia hahisia, to Iehova ese lau ia durua edia dika lau gwauatao totona.” Tadikaka taihu be dahaka idia karaia diba idia goada noho ruma bese taudia idia durua totona?

KONGRIGEISEN TAUDIA EDIA HEDURU DALANA

15. Vanegai sibona edia lalokau tauna idia atoa siri ruma bese taudia be edena bamona ita durua diba?

¹⁵ Idia goada noho ruma bese taudia ita kara namo henidia. Taihu Miriam ena tadina be orea amo idia atoa siri neganai, hebou lao totona ia gari. Ia gwau: “Haida be dahaka do idia hereva lau laloa momo. To, tadikaka taihu momo be idia hebogahisi bona egu tadina idia gwauraia dika lasi. Edia kara dainai lau mamia lau be sibona lau noho lasi.” Taihu ma ta ia gwau: “Emai natuna mero idia atoa siri murinai, tura namodia haida idia mai ai idia hagoadaia totona. Haida idia gwau idia diba lasi dahaka do idia hereva. Haida be lau ida idia tai bona haida be hagoadaia revareva idia siaia. Edia kara ese lau ia durua bada!”

16. Edena dala ai idia atoa siri tauna ena ruma bese taudia ita durua noho diba?

¹⁶ Idia atoa siri tauna ena ruma bese taudia ita durua noho be namo. Idia dekenai lalokau bona hahegoada karadia do ita habadaia. (Heb. 10:24, 25) Nega haida, idia atoa siri tauna ena ruma bese taudia idia itaia, tadikaka taihu ese idia hereva henidia lasi, hegeregere idia danu be idia atoa siri bamona. Ita ura lasi unai bamona do idia mamia! Matamata taudia haida edia tama sina be hereva momokani idia rakatania, unai bamona matamata taudia ita hanamoa bona hagoadaia be namo. Maria ena adavana be orea amo idia atoa siri bona ruma bese ia rakatania. Ia gwau: “Egu turadia haida be egu ruma dekenai idia mai bona aniani idia nadua, bona lau idia durua egu natudia ida ruma bese tomadiho ai karaia totona. Egu hisihisi idia mamia bona lau ida idia tai. Bona haida be sivarai koikoidia idia gwauraia loaloa neganai, idia be lau totona idia hereva. Idia ese lau idia hagoadaia bada!”​—Roma 12:13, 15.

17. Edena dala ai elda taudia ese lalohisihisi taudia idia durua diba?

¹⁷ Elda taudia e, namona be dala idauidau umui gaukaralaia idia atoa siri tauna ena ruma bese taudia umui hagoadaia totona. Unai bamona taudia umui durua bona hagoadaia be maduna badana. (1 Tes. 5:14) Idia umui hagoadaia totona, hebou vairanai bona murinai do umui hereva henidia. Idia umui vadivadi henia bona idia ida umui guriguri. Idia ida umui haroro hebou, eiava nega haida emui ruma bese tomadiho dekenai idia umui boiria. Namona be elda taudia ese lalohisihisi taudia idia lalokau bona hebogahisi henidia, bona idia naridia.​—1 Tes. 2:7, 8.

IEHOVA OI ABIDADAMA HENIA NOHO

18. Petero Iharuana 3:9 hegeregerena, Dirava ia ura kerere tauna be dahaka do ia karaia?

¹⁸ Iehova “ia ura lasi tau ta ia mase, to ia ura taunimanima ibounai be do idia helalo-kerehai.” (2 Petero 3:9 duahia.) Ena be ta ese kara dika badana ia karaia, to Dirava dekenai iena mauri be mai anina bada. Laloatao, Iehova ese dava bada gauna, unai be ena Natuna ia bouboulaia kara dika taudia edia mauri hoia lou totona. Iehova be mai hebogahisi ida unai bamona taudia ia boiria ia dekenai idia giroa lou totona. Iena ura be unai do idia karaia, Iesu ese ia herevalaia boio natuna ena parabole hegeregerena. (Luka 15:11-32) Hereva momokani idia rakatania taudia momo be gabeai edia lalokau guba Tamana dekenai idia giroa lou. Bona tadikaka taihu ese mai moale ida idia welkam henidia. Guna ita herevalaia taihu Elizabeth ena natuna ia giroa lou neganai, ia moale bada herea. Ia gwau: “Lau moale, badina tadikaka taihu ese ai idia hagoadaia do ai laloa noho emai natuna be do ia giroa lou.”

19. Dahaka dainai Iehova ita abidadama henia diba?

¹⁹ Hanaihanai Iehova ita abidadama henia diba. Iena hakaua dalana ese ita do ia hahisia lasi. Iehova be hariharibada bona hebogahisi Tamana, bona ia idia lalokau bona tomadiho henia taudia ia laloa bada. Namona be oi diba, emu lalohisihisi negana ai Iehova ese oi do ia rakatania lasi. (Heb. 13:5, 6) Guna ita herevalaia tadikaka Mark, ia gwau, “Iehova be ai ia rakatania lasi. Hekwakwanai ai davaria negadia ai, Iehova be ai kahirakahira ia noho.” Iehova be oi dekenai “taunimanima edia siahu ia hereaia gauna” do ia henia noho. (2 Kor. 4:7) Oibe, emu lalokau tauna ta be Iehova ia rakatania neganai, namona be oi abidadama bona oi laloa noho ia be do ia giroa lou.