Sina E, Eunike Ena Haheitalai amo Diba Abia

1-2. (a) Eunike be daika, bona dahaka dainai ia auka ena natuna ia hadibaia totona? (b) Rau 1 ai ia noho laulau dekenai oi haere.

ENA BE Baibel ese Timoteo ena bapatiso ia herevalaia lasi, to ena bapatiso dinana ai iena sinana, Eunike, ena hemami mani ita laloa. (Aon. 23:25) Timoteo be ranu lalonai ia gini neganai, ena sinana ia moale bada. Timoteo ena tubuna hahine, Loi, ese Eunike ia rosia neganai, ia kiri. Timoteo be ranu lalonai ia diho noho lalonai, Eunike be mai moale ida ena kemena ia dogoatao. Timoteo be mai moale ida ranu amo ia daekau neganai, ena sinana ia tai matamaia. Eunike ia hekwarahi ena natuna ia hadibaia Iehova bona ena Natuna, Iesu Keriso, ia lalokau henia totona. Ia be ena natuna ia hadibaia noho lalonai, dahaka hekwakawanai ia haheaukalaia?

² Timoteo ena tamana bona sinana edia tomadiho be idauidau. Iena tamana be Grik tauna, bona iena sinana bona tubuna hahine be Iuda amo. (Kara 16:1) Timoteo be mero matamata neganai, Eunike bona Loi be Keristani taudia ai idia lao, to iena tamana be lasi. Timoteo be edena tomadiho do ia abia hidi? Reana iena mauri lagani ia bada vadaeni, ia sibona ese abia hidi ia karaia totona. Ia be ena tamana ena tomadiho do ia abia hidi, a? Ia maragi neganai ia dibaia Iuda tomadiho dalana do ia badinaia, a? Eiava Iesu Keriso ena hahediba tauna ta ai do ia lao?

3. Aonega Herevadia 1:8, 9 hegeregerena, sina ese natudia idia durua karana be Iehova ese edena bamona ia laloa?

³ Eunike bamona, hari Keristani sina ese edia famili idia lalokau henia. Idia ura edia natudia idia durua Iehova idia tura henia namonamo totona. Bona iseda Dirava ese edia hekwarahi ia laloa bada. (Aonega Herevadia 1:8, 9 duahia.) Iehova ese sina momo ia durua, natudia idia hadibaia hereva momokani idia abia dae totona.

4. Sina momo be dahaka hekwakwanai idia davaria?

⁴ Nega haida, sina idia laloa edia natudia be Timoteo hegeregerena Iehova do idia hesiai henia eiava lasi. Tama sina idia diba Satani ena tanobada dekenai natudia be hahetoho momo idia davaria. (1 Pet. 5:8) Danu, sina momo idia hekwarahi edia natudia idia naria totona, badina edia adavana ia noho lasi eiava Iehova ia tomadiho henia lasi. Hegeregere, taihu ta ladana Christineb ia gwau: “Egu adavana be tama namona bona emai famili ia lalokau henia, to ia ura lasi natudia be Iehova ena Witnes taudia ai idia lao. Idia hanaia laganidia lalonai, nega momo lau taitai badina lau laloa egu natudia be Iehova do idia tomadiho henia eiava lasi.”

5. Inai atikol ai dahaka do ita herevalaia?

⁵ Bema oi be Keristani sina ta, Eunike hegeregerena emu natudia oi durua diba Iehova idia lalokau bona hesiai henia totona. Inai atikol ai, Eunike ena haheitalai oi tohotohoa bona emu hereva bona kara amo natudia oi hadibaia dalana do ita herevalaia. Danu, Iehova ese oi do ia durua dalana do ita itaia.

EMU HEREVA AMO NATUDIA OI HADIBAIA

6. Timoteo Iharuana 3:14, 15 hegeregerena, edena dala ai Timoteo be Keristani tauna ai ia lao?

⁶ Timoteo ia maragi neganai, ena sinana ia gaukara goada “Toretore Helagadia” ia hadibaia totona, unai be Iuda taudia ese idia lalopararalaia dalana ai. Oibe, Eunike be Iesu Keriso ia diba lasi dainai, ena diba be bada lasi. To, Timoteo be Toretore Helagadia amo ia dibaia gaudia ese ia durua diba Keristani tauna ai ia lao totona. To unai bamona do ia karaia, a? Timoteo be abia hidi ia karaia diba Keristani tauna ai ia lao totona. Iena sinana ena hekwarahi dainai, ita diba Timoteo ese Iesu ena sivarai ia ‘abia dae momokani.’ (2 Timoteo 3:14, 15 duahia.) Eunike be ena natuna ia durua Iehova ia dibaia dainai, ia moale bada! Eunike ena ladana ena anina be, “kwalimu.” Bona ena ladana hegeregerena ia kwalimu, badina nega aukadia ai Timoteo ia durua Iehova ia lalokau henia bona hesiai henia totona.

7. Timoteo ia bapatiso murinai, edena dala ai Eunike ese ia durua ia goada noho totona?

⁷ Timoteo be ena tahua gauna badana ia hagugurua, bapatiso ia abia. To ena sinana ia laloa momo, hegeregere, iena natuna ena mauri be edena bamona do ia gaukaralaia? Ia be hebamo dikadia do ia abia hidi, a? Sikuli totona Atena dekenai do ia lao bona unuseniai hahediba hereva koikoidia do ia abia dae, a? Ia ese ena nega, goada, bona matamata negana do ia gaukaralaia kohu momo ia tahua totona, a? Eunike be Timoteo totona abia hidi ia karaia diba lasi, to ia durua abia hidi maorodia ia karaia totona. Edena dala ai? Eunike ia gaukara goada noho, ena natuna ia durua Iehova ia lalokau henia bada bona Iena Natuna totona tanikiu karana ia hahedinaraia. Ruma bese haida dekenai tama o sina sibona be Iehova ia tomadiho henia, bona natudia ia durua Iehova idia lalokau henia totona be auka. To danu Keristani tama sina dekenai ia auka natudia idia durua Ia idia hesiai henia totona. Eunike ena haheitalai amo, tama sina be dahaka idia diba?

8. Edena dala ai sina ese ena adavana ia durua, unai amo edia natudia idia hagoadaia Iehova idia tura henia totona?

⁸ Emu natudia ida Baibel oi stadilaia. Taihu e, bema emu adavana be Witnes tauna, Iehova ia ura ia oi durua emui natudia umui hagoadaia Ia idia tura henia totona. Dala ta be, emu adavana oi durua Ruma Bese Tomadiho umui karaia hanaihanai totona. Bona unai ena namo oi herevalaia, bona unai negadia umui moalelaia totona do oi karaia gaudia oi laloa. Reana emu adavana oi durua Baibel stadi projek ta umui hegaegaelaia totona. Danu, bema natudia haida be idia bada vadaeni, bona sibona edia stadi dekenai Mauri Moalelaia Hanaihanai! bukana idia stadilaia diba, reana emu adavana ida oi gaukara hebou idia umui durua totona.

9. Bema sina ta ena adavana be Witnes lasi, edeseniai heduru ia tahua diba?

⁹ Sina haida be natudia ida Baibel idia stadilaia, badina reana idia be adavana lasi eiava edia tau be Witnes lasi. Bema emu ruma bese be unai bamona, oi laloa momo lasi. Iehova ese oi do ia durua. Iena orea ese ia halasia tulu idauidau oi gaukaralaia emu natudia ida oi stadi totona. Bona tama sina ma haida ese unai tulu idauidau idia gaukaralaia dalana oi henanadailaia, unai amo oi idia durua diba.c (Aon. 11:14) Danu, Iehova ena heduru totona oi guriguri, unai amo henanadai maorodia oi gaukaralaia emu natudia edia lalohadai bona hemami oi diba totona. (Aon. 20:5) Auka lasi henanadai oi henia, hegeregere, ‘Sikuli dekenai dahaka hekwakwanai oi davaria?’ Unai ese herevahereva karana ia hamatamaia diba.

10. Edena dala ma haida ai emu natudia oi durua, Iehova idia dibaia totona?

¹⁰ Dala idauidau ai emu natudia dekenai Iehova oi herevalaia. Iehova bona oi totona ia karaia gau namodia momo oi herevalaia. (Deu. 6:6, 7; Isa. 63:7) Unai be mai anina bada, bema emu natudia ida stadi oi karaia hanaihanai lasi. Matamanai ita herevalaia taihu, Christine, ia gwau: “Dala ia kehoa negadia ai, Iehova lau herevalaia. Hegeregere, ai raka eiava vanagi dekenai ai guia neganai, natudia dekenai Iehova ena havaraia gaudia lau herevalaia bona gau ma haida lau herevalaia danu, unai ese idia ia durua Iehova idia tura henia totona. Egu natudia idia tubu daekau neganai, idia lau hagoadaia Baibel idia stadilaia totona.” Danu, emu natudia dekenai Iehova ena orea bona emu tadikaka bona taihu edia namo oi herevalaia. Elda taudia oi gwauraia dika lasi. Idia oi herevalaia dalana ese emu natudia do ia durua, hekwakwanai negadiai idia amo heduru do idia tahua.

11. Iamesi 3:18 hegeregerena, dahaka dainai ruma dekenai maino ita havaraia be mai anina bada?

¹¹ Maino oi havaraia. Hanaihanai oi hahedinaraia emu adavana bona natudia oi lalokau henia. Hemataurai dalanai emu adavana ena kara namodia oi herevalaia, bona emu natudia oi hadibaia unai bamona idia karaia totona. Unai bamona oi karaia neganai, ia auka lasi emu natudia ese Iehova idia dibaia totona. (Iamesi 3:18 duahia.) Romania ai spesel painia tadikaka, Jozsef, ena haheitalai mani oi laloa. Ia tubu daekau noho lalonai, ena tamana ena kara auka dainai, ia bona ena tadina rua, ena kakana bona sinana dekenai ia auka Iehova idia tomadiho henia totona. Jozsef ia gwau: “Egu sinana ia hekwarahi ruma dekenai maino ia karaia totona. Ena be egu tamana ia dagedage, to egu sinana ese kara namodia ia hahedinaraia noho. Emai sinana ia itaia, ai ese emai tamana ai matauraia lasi bona kamonai henia lasi neganai, ai dekenai Efeso 6:1-3 ia herevalaia. Bena tamana ena kara namodia ia herevalaia bona ai ia durua ia ai laloa bada ena badina ai lalopararalaia totona. Unai ese emai famili lalonai maino ia havaraia.”

EMU KARA AMO NATUDIA OI HADIBAIA

12. Timoteo Iharuana 1:5 hegeregerena, edena dala ai Eunike ena haheitalai ese Timoteo ia durua?

¹² Timoteo Iharuana 1:5 duahia. Eunike be Timoteo dekenai haheitalai namona ia hahedinaraia. Reana Timoteo ia hadibaia abidadama korikorina be kara amo ia hahedinaraia. (Iam. 2:26) Timoteo ia itaia ena sinana be ena kara amo ia hahedinaraia Iehova ia lalokau henia bada, bona Ia hesiai henia karana ia moalelaia. Edena dala ai Eunike ena haheitalai ese Timoteo ia durua? Aposetolo Paulo ia gwau Timoteo ena abidadama be goada, ena sinana bamona. Oibe, Timoteo be ena sinana ena haheitalai ia itaia bona unai ese ia durua ia tohotohoa totona. Unai hegeregerena, ena be sina momo be ‘hereva ta idia gwauraia lasi,’ to edia kara amo edia famili idia durua Iehova idia tomadiho henia totona. (1 Pet. 3:1, 2) Unai bamona oi karaia diba. Edena dala ai?

13. Dahaka dainai sina ese Iehova ida ena hetura karana ia atoa guna be gau badana?

¹³ Iehova ida emu hetura karana oi atoa guna. (Deu. 6:5, 6) Sina ma haida bamona, oi ese gau momo oi dadaraia. Hegeregere, tauanina dalanai emu natudia oi durua totona, emu nega bona moni oi gaukaralaia, oi mahuta namonamo lasi, bona gau ma haida oi karaia danu. To namo lasi unai gaudia dekenai oi bisi dainai, nega be lasi Iehova ida emu hetura karana oi hagoadaia totona. Hanaihanai nega oi atoa, oi guriguri, sibona emu stadi oi karaia, bona hebou totona oi hegaegae. Unai bamona oi karaia neganai, Iehova kahirakahira do oi noho bona emu famili bona ma haida dekenai haheitalai namona do oi hahedinaraia.

14-15. Leanne, Maria, bona João edia haheitalai amo dahaka oi dibaia?

¹⁴ Mani matamata taudia haida ita laloa. Sinadia edia haheitalai idia itaia karana ese idia ia durua Iehova idia lalokau bona abidadama henia totona. Taihu Christine ena natuna Leanne ia gwau: “Emai tamana be ruma dekenai ia noho neganai, Baibel ai stadilaia diba lasi. To emai sinana be hanaihanai hebou dekenai ia lao. Ena be Baibel ai gau momo ai diba lasi, to iena haheitalai ese ai ia durua emai abidadama ai hagoadaia totona. Ena be hebou dekenai ai lao diba lasi, to ai abia dae Iehova ena Witnes taudia be hereva momokani idia hadibaia.”

¹⁵ Nega momo taihu Maria ena tamana ese idia ia koua hebou dekenai idia lao lasi totona. Ia gwau: “Egu sinana be gari lasi hahinena ta. Lau maragi neganai, ma haida dekenai lau gari dainai lau ura lasi gau haida lau karaia. To egu sinana ena gari lasi karana bona hanaihanai Iehova ia atoa guna karana ese lau ia durua taunimanima lau gari henia lasi totona.” Tadikaka João be ena tamana ese idia ia koua ruma dekenai Iehova eiava Baibel idia herevalaia lasi totona. Ia gwau: “Egu sinana be gau momo ia karaia tamana ia hamoalea totona, to Iehova ia lalokau henia bada, unai ese lau ia hagoadaia momokani.”

16. Edena dala ai sina ena haheitalai ese ma haida ia durua diba?

¹⁶ Sina e, namona be umui laloatao emui haheitalai ese ma haida ia durua. Edena dala ai? Eunike ena haheitalai ese aposetolo Paulo ia durua dalana ita laloa. Ia gwau Timoteo ena abidadama momokanina be guna ‘Eunike ese ia hahedinaraia.’ (2 Tim. 1:5) Edena negai Paulo ese Eunike ena abidadama karana ia itaia? Paulo ena misinari laolao ginigunana ai, Lusitera dekenai Loi bona Eunike ia hedavari henia, bona reana unuseniai idia ia durua Keristani taudia ai idia lao totona. (Kara 14:4-18) Mani oi laloa: Lagani 15 murinai, Paulo ese Timoteo ia tore henia neganai, Eunike ena abidadama karana ia laloatao noho bona iena haheitalai ia gaukaralaia ma haida ese idia tohotohoa totona! Unai ese ia hahedinaraia, Eunike ena haheitalai ese aposetolo tauna bona unai negai idia noho Keristani taudia momo ia hagoadaia bada. Bema oi be adavana lasi eiava emu adavana be Witnes lasi bona emu natudia oi naria, namona be oi diba emu haheitalai namona ese ma haida ia hagoadaia.

17. Ena be oi gaukara goada emu natuna oi durua, to ia ura lasi Iehova ia hesiai henia, dahaka do oi karaia?

¹⁷ Ena be oi gaukara goada emu natuna oi durua, to ia ura lasi Iehova ia hesiai henia, dahaka do oi karaia? Namona be oi laloatao, natuna be nega daudau lalonai do oi hadibaia. Laulau ai ita itaia bamona uhe oi hadoa neganai, reana nega haida oi laloa ena huahua do ia havaraia eiava lasi. Ena be unai oi diba lasi, to uhe ia tubu namonamo totona, hanaihanai ranu do oi henia. (Mar. 4:26-29) Unai hegeregerena, nega haida sina do ia laloa iena natudia ese Iehova idia lalokau henia totona idia ia durua namonamo eiava lasi. Oi ese natudia do oi hamaoroa lasi abia hidi idia karaia totona. To bema oi hekwarahi noho bona idia oi hadibaia, idia dekenai dala oi kehoa Dirava ena turana ai idia lao totona.​—Aon. 22:6.

IEHOVA ENA HEDURU DEKENAI OI TABEKAU

18. Edena dala ai Iehova ese emu natudia ia durua iena turana ai idia lao totona?

¹⁸ Baibel negadia amo, Iehova ese matamata taudia momo herea ia durua iena turana ai idia lao totona. (Sal. 22:9, 10) Ia ese emu natudia do ia durua danu, bema idia ura Ia idia tura henia. (1 Kor. 3:6, 7) Ena be emu natudia be mai kudouna ibounai ida Iehova idia hesiai henia lasi, to ia ese idia do ia lalokau henia noho. (Sal. 11:4) Natudia be Iehova idia hamoalea totona gau haida idia karaia neganai, ia ese idia do ia durua iena turana ai idia lao totona. (Kara 13:48; 2 Siv. 16:9) Emu natudia be heduru idia ura neganai, Iehova ese oi do ia durua nega maorona ai hereva maorodia oi gwauraia totona. (Aon. 15:23) Eiava ia ese kongrigeisen ai tadikaka o taihu ta do ia gaukaralaia emu natudia idia durua totona. Ena be taunimanima badadia ai idia lao, to Iehova ese idia ia durua diba guna oi hadibaia gaudia idia laloa lou totona. (Ioa. 14:26) Emu hereva bona kara amo natudia oi hadibaia noho neganai, Iehova ese oi do ia hanamoa.

19. Dahaka dainai oi abia dae Iehova ena lalonamo oi abia diba?

¹⁹ Ena be emu natudia ese abia hidi maorodia idia karaia o lasi, to Iehova oi lalokau henia dainai, oi ia lalokau henia. Bema oi be adavana lasi tama o sina ta, Iehova ia gwauhamata ia be emu natudia edia Tamana ai do ia lao bona oi do ia gimaia. (Sal. 68:5) Emu natudia ese abia hidi maorona idia karaia eiava lasi be oi ese do oi gwauraia lasi. To bema Iehova ena heduru dekenai oi tabekau noho bona oi gaukara goada, iena lalonamo do oi abia.