Egu Sisia Dekenai Bisikesi Idia Henia

“Witnes taudia be taunimanima idia kara namo henia sibona lasi, to egu sisia rua idia kara namo henia danu. Dina ta, troli haroro ia karaia hahine ladana Elaine ese sisia dekenai bisikesi ia henia. Unai murinai, nega ibounai troli badinai ai raka lao neganai, sisia rua idia ura unai Witnes taudia dekenai bisikesi ania totona idia lao.

“Hua haida idia hanaia vadaeni. Sisia be edia bisikesi idia moalelaia, bona lau be Witnes taudia ida herevahereva karana lau moalelaia. To lau ura lasi idia ida lau herevahereva momo. Egu mauri lagani be 70  ia hanaia vadaeni, bona Witnes taudia ese idia abia dae gaudia lau diba lasi. Lau be tomadiho momo dekenai lau moale lasi dainai, lau ura lau sibona ese Baibel do lau stadilaia.

“Unai nega ai, Witnes taudia ma haida lau itaia siti ena kahana ma haida dekenai troli haroro idia karaia. Idia danu be nega ibounai kara namodia idia hahedinaraia bona Baibel amo egu henanadai idia haerelaia, unai dainai idia lau ura henia bada.

“Dina ta, Elaine ia henanadai, ‘Oi abia dae animal be Dirava ena harihari gaudia, a?’ Lau haere, ‘Oibe, unai lau abia dae!’ Bena Elaine ese Isaia 11:6-9 ia duahia. Unai nega amo, lau ura Baibel amo diba ma haida lau abia, to lau ura lasi edia pablikeisen lau duahia.

“Murina dinadia amo, Elaine bona ena adavana Brent ida mai anina bada gaudia herevalaia karana lau moalelaia. Lau idia hamaoroa Mataio ia lao Kara bukana do lau duahia, unai amo Keriso ita tohotohoa dalana do lau lalopararalaia. Bona edia hereva lau badinaia. Daudau lasi murinai, Brent bona Elaine ese lau idia stadi henia. Unai be lagani 2016 ai.

“Hanaihanai Baibel stadilaia karana bona Kingdom Hall dekenai hebou lao karana lau moalelaia. Baibel ena hereva lau dibaia noho dainai lau moale bada. Lagani ta murinai, bapatiso lau abia. Hari egu mauri lagani be 79, bona lau moale badina tomadiho momokani lau davaria. Iehova ese lau ia durua ena ruma bese badana lalonai lau noho karana be hahenamo badana.”