1 | Guriguri—“Emui Lalohekwarahi Ibounai be Ia Dekenai Umui Negea Lao”

BAIBEL IA GWAU: “Emui lalohekwarahi ibounai be [Dirava] dekenai umui negea lao, badina ia be umui ia laloa bada.”—1 PETERO 5:7.

Unai Ena Anina

Iehova Dirava ia ura iseda lalohadai bona kudouna idia hametaua gaudia be ia dekenai ita gwauraia. (Salamo 55:22) Herevana iseda problem be bada o maragi to guriguri amo ita herevalaia diba. Ita laloa bada gaudia be Iehova ese ia laloa bada danu. Ia guriguri henia karana be lalomaino abia dalana.—Filipi 4:6, 7.

Heduru Dalana

Laloa momo gorerena ita abia neganai, reana ita mamia ita be sibona ita noho. Haida be ita mamia noho gaudia idia lalopararalaia namonamo lasi. (Aonega Herevadia 14:10) To mai momokani ida Dirava dekenai iseda hemami ita gwauraia neganai, do ita itaia ita ia kamonai henia bona ita ia lalopararalaia. Iehova be ita ia itaia, iseda hisihisi bona hekwarahi ia diba, bona ia ura ita laloa gaudia ibounai be guriguri amo ia dekenai ita gwauraia.—2 Sivarai 6:29, 30.

Iehova guriguri henia karana amo ita diba ia be ita ia laloa bada. Iseda hemami be salamo torea tauna ena guriguri bamona, ia gwau: “Oi ese egu hisihisi oi itaia vadaeni, bona egu lalometau oi diba.” (Salamo 31:7) Iehova ese iseda hekwakwanai ia itaia karana ita dibaia neganai, unai ese ita ia hagoadaia nega aukadia ai ita haheauka totona. To unai sibona lasi. Ita dekenai idia vara noho hekwakwanai ia lalopararalaia goevagoeva dainai, Baibel amo ita ia durua bona hagoadaia.

Baibel ese Lau Ia Durua Noho Julian

Lalohekwarahi Momo Dainai Idia Vara Gaudia

“Lau lalohekwarahi momo bona obsessive-compulsive disorder (OCD) lau abia. Nega haida lau lalohekwarahi kava sibona. Nega sisina lalonai lau mamia lau namo, bena daudau lasi lau laloa momo matamaia. Haida ida lau noho negadiai, lau lalohekwarahi momo. Badina lau diba lasi edena bamona lau idia laloa.

“Egu laloa momo gorerena idia diba turadia ese lau idia durua bada. Bona nega haida edia hereva ese lau ia durua lasi. To lau moale badina idia hekwarahi lau idia durua totona.

“Nega haida lau lalohekwarahi momo bona OCD gorerena dainai, ia auka lau guriguri totona. Lau hekwarahi egu laloa dalana lau hamaoromaoroa, bona guriguri amo Iehova lau hereva henia totona. Nega tamona lalonai gau momo lau laloa, nega momo lau daradara. Egu lalohadai lau biagua diba lasi neganai, ia auka egu lalohadai bona hemami lau gwauraia totona.”

Baibel ese Lau Ia Durua Dalana

“Baibel stadilaia karana amo lau diba, Dirava ese guriguri ia abia dae totona, hereva latadia o namodia ita gwauraia be gau badana lasi. Nega haida guriguri amo egu hemami lau gwauraia hedinarai diba lasi neganai, lau gwau sibona: ‘Iehova e, mani lau oi durua.’ Bena unai nega ai, lau mamia Iehova be egu hemami ia lalopararalaia bona egu guriguri ia haerelaia. To, medikol heduru lau tahua danu. Mai moale ida lau gwau tanikiu badina unai dala rua amo heduru namona lau abia bona egu gorere ia namo sisina. Egu guba Tamana ena lalokau bona heduru lau mamia totona lau hekwarahi karana ese namo ia havaraia.”