2 | “Toretore Helagadia ese Ita Dekenai Goada Ia Henia”

BAIBEL IA GWAU: “Guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.”—ROMA 15:4.

Unai Ena Anina

Lalohadai kereredia ita abia neganai, Baibel ena hagoadaia herevadia ese ita ia durua diba. Baibel ena hereva ese ita dekenai helaro ia henia, ita abia hemami dikadia be gau gunadia ai do idia lao.

Heduru Dalana

Nega haida ita ibounai ese lalohisihisi ita mamia, to dina ta ta ai lalometau bona laloa momo gorerena idia abia taudia be hisihisi bada hemamina idia abia. Edena dala ai Baibel ese ia durudia diba?

Lalohadai kereredia kokia totona, Baibel ena hereva ese lalohadai namodia ia henia diba. (Filipi 4:8) Unai ese ita ia hagoadaia bona iseda lalona ia hanamoa, unai amo ita ia durua iseda hemami ita biagua.—Salamo 94:18, 19.
Baibel ese ita ia durua diba, ita be anina lasi lalohadaina ita hadokoa totona.—Luka 12:6, 7.
Baibel siri momo amo ita diba ita be sibona ita noho lasi bona Dirava, iseda Havaraia Tauna ese iseda hemami ia lalopararalaia namonamo.—Salamo 34:18; 1 Ioane 3:19, 20.
Baibel ia gwauhamata, Dirava ese ita dekenai lalohisihisi idia havaraia lalohadai idauidau do ia haorea. (Isaia 65:17; Apokalupo 21:4) Ita dekenai hemami dikadia idia vara neganai, unai gwauhamata ese ita dekenai goada ia henia ita haheauka totona.

Baibel ese Lau Ia Durua Noho Jessica

Lalometau Gorerena Dainai Idia Vara Gaudia

“Egu mauri lagani be 25 neganai, lalohadai idauidau ese lau dekenai laloa momo ia havaraia bona lalometau gorerena lau abia. Mauri ai idia vara memori dikadia lau laloa karana ese lau ia hahisia. Doketa taudia ese lau idia durua lau laloparara, egu lalometau gorerena be guna egu mauri ai idia vara memori dikadia ese idia havaraia. Medikeisen maorona lau abia, to danu egu gorere lau lalopararalaia totona therapy lau abia be namo, unai amo egu laloa dalana lau hamaoromaoroa diba.”

Baibel ese Lau Ia Durua Dalana

“Lau daradoko neganai, lau dekenai panic attack, lalohekwarahi momo ia vara, bona lau mahuta diba lasi. Nega momo hanuaboi ai, egu lalohekwarahi ia bada herea. Salamo 94:19 ia gwau bamona, unai bamona negadiai Dirava ese ita ia hagoadaia bona iseda lalona ia hanamoa diba. Unai dainai, egu Baibel bona nouti buka ai idia noho hagoadaia Baibel siridia be egu bedi badinai lau atoa. Lau mahuta diba lasi neganai, Baibel siri ma haida lau duahia bona Dirava ena lalohadai ese lau ia hagoadaia.”

“Baibel ese ita ia hagoadaia unai lalohadai idauidau be Dirava amo ita dibaia gaudia ese ia haidaua diba. Guna lau laloa, lau be anina lasi, bona ta ese ia lalokau henia lasi. To lau dibaia gauna be, unai lalohadai be Baibel ena hereva ida ia hegeregere lasi, badina Dirava be lalokau bona hebogahisi Tamana, ita ta ta ia laloa bada. Metairametaira egu laloa dalana lau biagua matamaia, bona lau laloa gaudia ese lau ia biagua lasi. Dirava ese lau ia laloa dalana lau dibaia. Unai be gau badana, badina lau ia durua sibona dekenai lau abia lalohadai kereredia lau dadaraia.

“Vaira negana lau laloa, unai nega ai memori dikadia bona lau ia hadikaia lalohadai kereredia be do idia boio. Lau diba lalometau gorere be do ia ore. Unai ese lau ia durua hari lau haheauka bona vaira nega namona lau naria, unai gorere be do ia ore momokani.”