3 | Baibel ai Idia Noho Haheitalai amo Heduru Abia

BAIBEL IA GWAU . . . Abidadama tatau bona hahine be mai ena “hemami ita hegeregerena.”—IAMESI 5:17.

Unai Ena Anina

Baibel ai abidadama tatau bona hahine ese idia mamia gaudia ena ekspiriens momo herea idia noho. Unai taudia edia sivarai ita duahia neganai, do ita itaia idia mamia gaudia be iseda hegeregerena.

Heduru Dalana

Ita ura diba bema haida ese ita mamia gaudia idia lalopararalaia. Unai be momokani, bema laloa momo gorerena ita abia. Baibel ita duahia neganai, do ita itaia haida ese idia mamia bona laloa gaudia be iseda hegeregerena. Unai dainai, ita sibona ese lalometau ita mamia lasi, to haida danu be unai hemami idia haheaukalaia noho.

Inai lalohadai oi abia danu, a? “Lau hesiku vadaeni!” Baibel ese unai bamona hemami idia abia taudia ia herevalaia hegeregere; Mose, Elia bona Davida.—Numera 11:14; 1 King Taudia 19:4; Salamo 55:4.
Baibel ai hahine ta ladana Hana be ia “lalohisihisi bada herea” badina natudia ia havaraia diba lasi. Bona Penina ese ia hahisia bada.—1 Samuela 1:6, 10.
Baibel ai ia noho tauna, Iobu ena hemami reana oi lalopararalaia diba. Ia be abidadama tauna, to lalometau bada ia mamia, ia gwau: “Egu mauri lau ura henia lasi momokani. Lau ura lasi lau mauri noho.”—Iobu 7:16.

Baibel ai idia noho taudia edia sivarai dibaia karana amo lalohadai kereredia ita dadaraia diba, bona goada ita abia iseda hisihisi idauidau ita haheaukalaia totona.

Baibel ese Lau Ia Durua Noho Kevin

Bipolar Disorder Dainai Idia Vara Gaudia

“Egu mauri lagani be kahirakahira 50 neganai, bipolar disorder gorerena lau abia. Nega haida lau mamia egu mauri ai idia vara hekwakwanai idauidau lau hanaia diba. To nega ma haida ai, lau mamia lau mauri noho be anina lasi.”

Baibel ese Lau Ia Durua Dalana

“Baibel ai aposetolo Petero ena sivarai lau laloa. Misteik ia karaia dainai ia mamia ia be anina lasi. To Petero ese unai lalohadai ia dadaraia totona, ia idia laloa bada tura namodia edia heduru ia tahua. Bipolar disorder gorerena ese lau dekenai lalohadai kereredia ia henia, lau mamia lau be goevadae lasi bona anina lasi. Petero bamona, egu tura namodia kahirakahira lau noho, idia ese lau idia durua lau hesiku lasi totona.

“Danu, Baibel ai King Davida ena sivarai ese lau ia hagoadaia bada. Nega momo ia dekenai idia vara hekwakwanai dainai ia lalometau bona ena kerere gunadia dainai ia lalohisihisi. Ia hegeregerena lau mamia, badina nega haida lau karaia o gwauraia gaudia dainai lau lalohisihisi. Salamo 51 ai Davida ena hereva ese lau ia hagoadaia. Siri 3 ai Davida ia gwau: ‘Egu kerere be lau diba namonamo, bona egu kara dika be hanaihanai egu vairanai ia noho.’ Unai hereva ese lau mamia lalometau idia hahedinaraia, sibona dekenai lalohadai maorona lau abia be auka. Bona siri 10 ai Davida ia gwau: ‘Dirava e, egu kudouna oi hagoevaia, bona oi lau badinaia noho totona egu lalona oi hamatamataia.’ Egu hemami ia namo totona, Dirava dekenai unai bamona noinoi herevadia lau gwauraia. Siri 17 ese lau ia hagoadaia. Ia gwau: ‘Dirava e, helalo-kerehai bona manau kudouna oi dadaraia lasi.’ Unai Baibel siri amo lau diba Dirava be lau ia lalokau henia.

“Baibel ena haheitalai namodia bona Dirava ese hari lau dekenai ia henia gaudia lau laloa karana ese egu helaro vaira negana totona ia hagoadaia. Lau diba Baibel ena gwauhamata be do ia vara momokani bona unai ese lau ia durua lau haheauka noho totona.”