“Iah Ena Lahi Hururuhururu” Habodoa Lasi

1. Baibel ese lalokau korikorina be edena bamona ia herevalaia?

LALOKAU be “lahi ena hururuhururu bamona, Iah ena lahi hururuhururu. Abata ranudia ese lalokau do ia habodoa diba lasi, sinavai ese idia huria oho diba lasi.”b (Sol. 8:6, 7) Unai ese lalokau korikorina ia hahedinaraia namo herea! Unai hereva ese tau bona hahine ia hagoadaia: Emui lalokau ta ta dekenai be do ia ore lasi.

2. Headava tau bona hahine ese dahaka idia karaia be namo edia lalokau ia keru lasi totona?

² Headava tau bona hahine edia lalokau ia goada noho totona idia hekwarahi be namo. Mani inai haheitalai ita laloa, lahi do ia araia noho bema ta ese lahi au ia atoa kau. To, bema ta ese lahi au ia atoa kau lasi, lahi do ia bodo. Unai hegeregerena, tau bona hahine edia lalokau ia goada diba bema edia hetura karana idia hagoadaia. Nega haida moni ena hekwakwanai, gorere eiava natudia naria ena metau dainai, headava tau bona hahine edia lalokau ia keru diba. Bema oi be headava tau o hahine, edena dala ai “Iah ena lahi hururuhururu” be emu headava lalonai do ia araia noho? Inai atikol lalonai, emu hetura karana ia goada bona emu headava maurina oi moalelaia totona, dala toi do ita herevalaia.c

EMU HETURA KARANA IEHOVA IDA OI HAGOADAIA NOHO

3. Edena dala ai Iehova tura henia karana ese headava taudia ia durua edia lalokau idia haogadaia totona? (Hadibaia Tauna 4:12) (Laulau itaia danu.)

³ “Iah ena lahi hururuhururu” ia goada totona, namona be tau bona hahine idia gaukara goada edia hetura karana Iehova ida idia hagoadaia. Edena dala ai unai ese edia headava do ia hagoadaia? Headava taudia be edia hetura karana, edia guba Tamana ida idia laloa bada, bona mai ura ida iena sisiba idia badinaia neganai, edia lalokau ia hadikaia diba hekwakwanai idauidau do idia hanaia. (Hadibaia Tauna 4:12 duahia.) Danu, edia hetura karana Iehova ida ia goada taudia ese Iehova ena kara namodia idia hahedinaraia hegeregere, hebogahisi, haheauka bona dika gwauatao karana. (Efe. 4:32–5:1) Bema headava taudia ese unai kara namodia idia hahedinaraia, edia lalokau do ia goada. Lagani 25 mai kahana ia headava taihu ta ladana Lena, ia gwau: “Iehova ia tura henia namonamo tauna oi lalokau henia bona oi matauraia be auka lasi.”

4. Dahaka dainai Iehova ese Iosepa bona Maria ia abia hidi gwauhamata Mesiana ena tama sina ai idia lao totona?

⁴ Mani Baibel ena haheitalai ta ita laloa. Iehova ia ura gwauhamata Mesiana ena tama sina ia abia hidi neganai, ia ese Davida ena bese amo Iosepa bona Maria ia abia hidi. Dahaka dainai? Idia ruoasi be Iehova idia tura henia namonamo, bona Iehova ia diba edia headava maurina lalonai Ia do idia atoa guna. Headava taudia e, Iosepa bona Maria amo dahaka umui dibaia?

5. Tatau e, Iosepa amo dahaka umui dibaia?

⁵ Iosepa be mai ura ida Iehova ena hakaua dalana ia badinaia, unai amo adavana namona ai ia lao. Nega toi bamona, Dirava amo hakaua herevadia ia abia ena famili ia naria totona. Karaharaga unai hakaua herevadia ia badinaia ena be ia auka. (Mat. 1:20, 24; 2:13-15, 19-21) Iosepa be Dirava ena hakaua dalana ia badinaia dainai Maria ia gimaia, durua bona naria. Mani inai oi laloa, Iosepa ena kara dainai Maria ese ia lalokau henia bona matauraia bada! Tatau e, Iosepa umui tohotohoa Baibel ena hakaua herevadia umui tahua emui famili umui naria totona.d Unai hakaua herevadia oi badinaia bona senisi haida oi karaia neganai, oi hahedinaraia emu hahine oi lalokau henia bona emu headava do ia goada. Vanuatu ai, lagani 20 mai kahana ia headava taihu ta, ia gwau: “Egu adavana be Iehova ena hakaua dalana ia tahua bona ia badinaia neganai, ia lau matauraia bada. Lau ia naria namonamo bona ia karaia abia hidi lau abia dae.”

6. Hahine taudia e, Maria amo dahaka umui dibaia?

⁶ Maria be Iehova ia tura henia namonamo bona sibona ena abidadama ia hagoadaia, to Iosepa ia karaia gaudia dainai lasi. Baibel ia diba namonamo. Danu, nega ia atoa ia laloa dobu totona. (Luka 2:19, 51) Maria be Iehova ia tura henia namonamo dainai, hahine namona ai ia lao. Hari, hahine taudia momo idia ura Maria ena kara namo idia tohotohoa. Hegeregere, taihu ta ladana Emiko ia gwau: “Lau singul neganai, sibona egu tomadiho karadia lau karaia. To, lau headava murinai, egu tau ese ai totona ia guriguri bona emai ruma bese tomadiho ia hakaua, bona lau laloparara ai totona unai gaudia do ia karaia. Unai dainai sibona egu hetura karana Iehova ida lau hagoadaia be namo. Nega lau atoa egu Dirava dekenai lau guriguri, Baibel lau duahia bona iena lalohadai lau laloa dobu.” (Gal. 6:5) Hahine taudia e, emui hetura karana Iehova ida umui hagoadaia neganai, emui adavana ese umui do idia hanamoa bona lalokau henia.​—Aon. 31:30.

7. Headava taudia ese Iosepa bona Maria edia tomadiho hebou karana amo dahaka idia dibaia?

⁷ Iosepa bona Maria idia gaukara hebou edia hetura karana Iehova ida idia hagoadaia totona. Idia laloprarara Iehova idia tomadiho hebou be mai anina bada. (Luka 2:22-24, 41; 4:16) Ena be mai edia natudia momo bona tomadiho totona idia lao be mai ena hekwarahi, to idia lao. Hari headava taudia dekenai unai be haheitalai namona! Iosepa bona Maria bamona bema oi be mai emu natudia, reana nega haida hebou lao totona oi hekwarahi, eiava do ia auka emu ruma bese tomadiho karaia totona. Danu, do ia auka emu adavana ida umui stadi o guriguri hebou totona. To laloatao, Iehova umui tomadiho henia hebou neganai, ia kahirakahira do umui lao bona emu hetura karana danu do ia goada. Unai dainai tomadiho karana umui laloa bada be namo.

8. Dahaka do oi karaia bema headava lalonai hekwakwanai idia vara?

⁸ Dahaka oi karaia diba bema emu headava lalonai hekwakwanai idia vara? Reana do umui ura lasi ruma bese tomadihona umui karaia. Bema unai ia vara, reana topik kwadogina bona umui moalelaia gauna ta, eiava umui lalotamona gauna umui herevalaia diba. Unai ese umui do ia durua ta ta umui lalokau henia bona Iehova umui tomadiho henia hebou totona.

NEGA UMUI ATOA UMUI HEBAMO TOTONA

9. Dahaka dainai namona be tau bona hahine be nega idia atoa idia hebamo totona?

⁹ Headava taudia e, nega umui atoa umui hebamo totona, unai amo emui lalokau do ia goada. Unai umui karaia neganai, ta ta emui hemami bona lalohadai do umui laloa bada. (Gen. 2:24) Lagani 15 mai kahana Lilia bona Ruslan idia headava murinai, idia davaria gauna mani ita laloa. Lilia ia gwau: “Ai laloparara ai be nega lasi ai hebamo totona. Moni gaukara, ruma gaukara bona gabeai natudia dainai, ai bisi bada. Ai davaria bema nega ai atoa lasi ai hebamo totona, reana ta ta amo ai parara diba.”

10. Edena dala ai hedava taudia ese Efeso 5:15, 16 ena hakaua herevana idia badinaia diba?

¹⁰ Headava taudia ese dahaka idia karaia diba idia hebamo totona? Namona be nega idia atoa ta ta ida idia hebamo totona. (Efeso 5:15, 16 duahia.) Nigeria ai tadikaka ta ladana Uzondu ia gwau: “Egu gaukara lau sediual neganai, nega lau makaia egu adavana ida lau hebamo totona, bona unai nega be mai anina bada.” (Fili. 1:10) Moldova ai sekit naria tauna ena adavana ladana, Anastasia ese ena nega ia gaukaralaia dalana mani ita laloa. Ia gwau: “Egu adavana be ena gaukara dekenai ia bisi neganai, lau ura karaia gaudia lau karaia. Unai amo gabeai ta ta ai bamoa diba.” To bema emu gaukara be momo dainai nega be lasi umui hebamo totona be edena bamona?

11. Akwila bona Prisikila be dahaka gaukara idia karaia hebou?

¹¹ Headava taudia be Akwila bona Prisikila edia haheitalai amo gau haida do idia dibaia. Keristani taudia ginigunadia be unai headava tau bona hahine idia lalokau henia. (Roma 16:3, 4) Ena be Baibel ese edia headava ena sivarai momo ia gwauraia lasi, to idia gaukara, haroro bona ma haida idia durua hebou karana ia gwauraia. (Kara 18:2, 3, 24-26) Baibel be Akwila bona Prisikila ia herevalaia neganai, hanaihanai edia ladana ia gwauraia hebou.   

12. Tau bona hahine be dahaka idia karaia diba idia hebamo totona? (Laulau itaia danu.)

¹² Edena dala ai headava taudia ese Akwila bona Prisikila idia tohotohoa diba? Oi bona emu adavana do umui karaia hebou gaudia mani oi laloa. Emu adavana ida gaukara haida umui karaia hebou, to oi sibona lasi. Hegeregere, Akwila bona Prisikila idia haroro hebou. Hanaihanai palani umui karaia unai bamona umui karaia totona, a? Akwila bona Prisikila idia gaukara hebou danu. Reana oi bona emu adavana emu gaukara be idauidau, to ruma ai umui gaukara hebou diba, a? (Had. 4:9) Bema gaukara ta umui karaia hebou, do oi mamia umui be tim ta bamona bona unai be nega namona umui herevahereva totona. Robert bona Linda be lagani 50 mai kahana idia headava. Robert ia gwau: “Momokani, nega be lasi moale karana ta ai karaia hebou totona. To, mereki lau huridia bona egu adavana ese ia hakaukaua, eiava murimuri ai ava lau kokidia bona ia mai lau ia durua neganai, lau moale bada. Ai gaukara hebou karana ese emai hetura karana ia hagoadaia bona emai lalokau ia habadaia.”

13. Tau bona hahine idia lalotamona totona, dahaka idia karaia be namo?

¹³ Laloatao, ena be tau bona hahine idia noho hebou, to nega haida do idia lalotamona lasi. Brazil ai hahine ta ia gwau: “Lau laloparara gau momo dekenai ai bisi dainai, nega haida ai laloa ruma tamona lalonai ai noho dainai unai be hegeregere bona ta ta do ai bamoa lasi. Lau dibaia gauna be ai noho hebou sibona be hegeregere lasi, to namona be egu adavana ena ura gaudia lau karaia danu.” Mani Bruno bona ena adavana, Tays edia hebamo karana ita laloa. Bruno ia gwau: “Ai ruaosi ai laga-ani hebou neganai, emai fone ai atoa siri bona unai nega ai moalelaia hebou.”   

14. Bema headava taudia be ta ta bamoa karana idia moalelaia lasi, dahaka idia karaia diba?

¹⁴ To, bema oi bona emu adavana emui hebamo karana umui moalelaia lasi be edena bamona? Reana emui ura gaudia be idauidau eiava ta ta umui habadua. Dahaka do oi karaia? Matamanai ita herevalaia lahi ena haheitalai mani ita laloa. Lahi oi karaia matamaia neganai, karaharaga do ia hururu lasi. To metairametaira lahi au oi atoa kau neganai, do ia hururu badabada. Unai hegeregerena, namona be dina ta ta ai nega sisina lalonai ta ta umui bamoa diba. Namona be umui moalelaia gauna umui karaia hebou, bona ta ia habadua gauna umui karaia lasi. (Iam. 3:18) Kara maragina amo umui hamatamaia neganai, emui lalokau do umui hagoadaia lou diba.

TA TA MATAURAIA

15. Headava taudia edia lalokau ia goada noho totona, dahaka dainai hemataurai karana be mai anina bada?

¹⁵ Headava lalonai hemataurai be mai anina bada. Ia be oksijen bamona lahi ia durua ia araia goadagoada totona. Bema oksijen be lasi, lahi do ia bodo. Unai hegeregerena, bema hemataurai be lasi, headava taudia edia lalokau do ia keru. To, idia hekwarahi ta ta dekenai hemataurai idia hahedinaraia headava tau bona hahine edia lalokau be do ia goada noho. To laloatao, namo lasi oi laloa emu adavana dekenai hemataurai oi hahedinaraia, to namona be emu adavana ia mamia ia oi matauraia. Penny bona Aret be lagani 25 mai kahana idia headava. Penny ia gwau: “Ta ta ai matauraia dainai, emai ruma ai hanaihanai ai moale. Ai mamia ta ta dekenai emai hemami ai gwauraia badina ai diba ta ta ena lalohadai ai laloa bada.” Unai dainai, dahaka gauna do oi karaia emu adavana oi durua unai amo ia mamia ia oi matauraia? Aberahamo bona Sara edia haheitalai mani oi laloa.

16. Tatau be Aberahamo ena haheitalai amo dahaka idia dibaia? (1 Petero 3:7) (Laulau itaia danu.)

¹⁶ Aberahamo be Sara ia matauraia. Ia ese Sara ena lalohadai ia laloa bada bona ena hemami ia matauraia. Nega ta Sara ia lalohisihisi bona ena hemami be Aberahamo dekenai ia gwauraia, bona ia gwau ia vara gauna be Aberahamo ena kerere. Aberahamo ia badu bona ia gwau henia, a? Lasi. Aberahamo ia diba ia karaia disisen be Sara ese do ia durua bona badinaia. Aberahamo ese Sara ia kamonai henia bona unai hekwakwanai ia hamaoromaoroa. (Gen. 16:5, 6) Dahaka ita dibaia? Tatau e, umui be mai emui maoro emui famili totona disisen umui karaia. (1 Kor. 11:3) To disisen oi do karaia lasi neganai, lalokau karana be emu adavana ena lalohadai oi kamonai guna, bema oi karaia disisen ese ena lalona do ia hahisia eiava lasi. (1 Kor. 13:4, 5) Nega haida emu adavana do ia lalohekwarahi bona ia ura ena hemami do ia gwauraia. Ena hemami oi matauraia totona iena hereva oi kamonai namonamo, a? (1 Petero 3:7 duahia.) Lagani 30 bamona Angela bona Dmitry idia headava. Angela be ena adavana ese ia matauraia karana ia herevalaia, ia gwau: “Lau lalohisihisi eiava lau ura herevahereva neganai, Dmitry ia noho hegaegae lau ia kamonai henia totona. Danu, ena be mai badu ida egu hemami lau gwauraia, to ia haheauka.”

17. Hahine taudia ese Sara ena haheitalai amo dahaka idia dibaia? (1 Petero 3:5, 6)

¹⁷ Sara ese Aberahamo ia matauraia bona ena disisen ia durua. (Gen. 12:5) Nega ta, Aberahamo ese vadivadi taudia dekenai heabidae karana ia hahedinaraia. Sara ia hamaoroa ia karaia gaukara do ia hadokoa bona aniani do ia hegaegaelaia. (Gen. 18:6) Karaharaga Sara ese Aberahamo ena disisen ia badinaia. Hahine taudia e, Sara umui tohotohoa bona emui tatau edia disisen umui durua. Unai umui karaia neganai, emui headava do ia goada. (1 Petero 3:5, 6 duahia.) Paragraf 16 ai ita herevalaia tadikaka Dmitry, ena adavana ese ia matauraia karana ia herevalaia. Ia gwau: “Angela ese egu disisen ia durua karana lau moalelaia ena be nega haida ia lalotamona lasi. Bona ena be egu disisen ese namo ia havaraia lasi, to lau ia gwauraia dika lasi.” Ia auka lasi oi ia matauraia tauna oi lalokau henia totona, ani?

18. Headava taudia be edia lalokau idia hagoadaia neganai, dahaka namo ia havaraia?

¹⁸ Hari, Satani ia ura Keristani headava taudia edia lalokau karana ia hadikaia. Ia diba bema headava tau bona hahine be ta ta idia lalokau henia lasi, Iehova do idia rakatania matamaia. To, lalokau korikorina be ia ore diba lasi! Unai dainai namona be emui headava lalonai, umui hahedinaraia lalokauna be Solomona ena Ane lalonai ia herevalaia lalokauna bamona. Unai dainai emui lalona umui hadaia emui headava lalonai Iehova umui atoa guna, ta ta totona nega umui atoa bona ta ta emui hemami bona ura umui matauraia. Unai umui karaia neganai, emui headava lalonai lalokau korikorina ena Badina Iehova, do umui hanamoa bona lahi ena haheitalai bamona emui lalokau be do ia hururuhururu hanaihanai.