Peroveta Herevadia Amo Diba Ita Abia

1. Dahaka ese ita do ia durua Baibel ena peroveta herevadia stadilaia karana ita moalelaia totona?

TADIKAKA matamata ta ladana Ben, ia gwau: “Baibel ena peroveta herevadia stadilaia karana lau moalelaia.” Iena hereva dekenai oi lalotamona, a? Eiava peroveta herevadia oi lalopararalaia be auka, a? Reana peroveta herevadia stadilaia karana oi moalelaia lasi. To, Iehova ese Baibel lalonai peroveta herevadia ia torea ena badina oi diba neganai, reana emu lalona do oi haidaua.

2. Inai atikol ai dahaka do ita herevalaia?

² Inai atikol ai, dahaka dainai Baibel ena peroveta herevadia ita stadilaia be namo bona ita stadilaia daladia do ita herevalaia. Bena Daniela bukana ena peroveta herevadia rua do ita stadilaia, bona edia anina ita lalopararalaia karana ese hari ita do idia durua dalana do ita itaia.

DAHAKA DAINAI PEROVETA HEREVADIA ITA STADILAIA BE NAMO?

3. Peroveta herevadia ita lalopararalaia totona dahaka ita karaia be namo?

³ Peroveta herevadia ita lalopararalaia totona, namona be heduru ita tahua. Mani inai haheitalai ita laloa. Mani oi laloa, oi be oi diba lasi gabuna ta dekenai oi loaloa, to oi ia bamoa turana ta be unai gabu ia diba namonamo. Umui loaloa gabuna ia diba bona dala ta ta idia lao gabudia ia diba. Reana oi moale bada badina emu turana be oi ia bamoa, ani? Unai hegeregerena, Iehova be hari ita noho negana bona iseda vaira negana ia diba namonamo. Unai dainai, Baibel ena peroveta herevadia ita lalopararalaia totona, mai manau ida Iehova ena heduru ita tahua be namo.​—Dan. 2:28; 2 Pet. 1:19, 20.

4. Dahaka dainai Iehova be Baibel lalonai peroveta herevadia ia torea? (Ieremia 29:11) (Laulau itaia danu.)

⁴ Tama sina namodia bamona, Iehova ia ura iena natudia be vaira nega ai mauri namona do idia noholaia. (Ieremia 29:11 duahia.) To Iehova be iseda tama sina amo ia idau, ia ese vaira negana ia perovetalaia bona ia gwauraia maoromaoro. Iehova ese Baibel lalonai peroveta herevadia ia torea, unai amo vaira nega ai do vara mai anina bada gaudia do ita diba. (Isa. 46:10) Peroveta herevadia be iseda guba Tamana amo idia mai harihari gaudia. To, edena bamona do oi hamomokania Baibel ese ia perovetalaia gaudia be do idia guguru?

5. Matamata taudia be Max ena haheitalai amo dahaka idia dibaia diba?

⁵ Sikuli ai, iseda matamata taudia be Baibel idia matauraia lasi taudia huanai idia noho. Edia hereva bona kara ese Witnes natudia dekenai daradara ia havaraia diba. Tadikaka ta ladana Max ena ekspiriens ita laloa. Ia gwau: “Lau sikuli neganai, lau daradara bema egu tama sina be lau dekenai tomadiho momokani idia hadibaia bona Baibel be momokani Dirava amo, eiava?” Ena tama sina be dahaka idia karaia? Ia gwau: “Ena be idia hereva momo lasi, to lau diba idia lalohekwarahi.” Idia ese Baibel amo Max ena henanadai momo idia haerelaia. Max be kara ta ia karaia danu. Ia gwau: “Baibel ena peroveta herevadia lau stadilaia bona lau dibaia gaudia be kongrigeisen matamata taudia haida ida lau herevalaia.” Dahaka ia vara? Max ia gwau: “Unai murinai, lau abia dae Baibel be Dirava amo ia mai!”

6. Bema oi daradara, dahaka oi karaia be namo bona dahaka dainai?

⁶ Bema Max bamona Baibel dekenai oi daradara, namo lasi oi hemarai. Namona be karaharaga gau ta oi karaia. Daradara be raraka (rust) bamona. Bema ita kokia lasi, metairametaira iseda kohu namona do ia hadikaia. Unai hegeregerena, emu abidadama amo “raraka” gauna oi kokia totona, sibona oi nanadaia, ‘Baibel ese nega vaira totona ia gwauraia herevadia lau abidadama henia, a?’ Bema oi daradara, namona be idia guguru vadaeni peroveta herevadia oi stadilaia. Edena dala ai unai oi karaia diba?

PEROVETA HEREVADIA STADILAIA DALANA

7. Peroveta herevadia stadilaia karana dekenai, Daniela be dahaka haheitalai ia hahedinaraia? (Daniela 12:10) (Laulau itaia danu.)

⁷ Daniela be peroveta herevadia stadilaia karana dekenai haheitalai namona ia hahedinaraia. Ia be badina maorona dainai peroveta herevadia ia stadilaia: Ia ura hereva momokani ia diba. Daniela be ia manau bona ia diba Iehova ese ia idia diba taudia bona iena taravatu goevadia idia badinaia taudia dekenai laloparara do ia henia. (Dan. 2:27, 28; Daniela 12:10 duahia.) Daniela ia hamomokania ia be manau tauna bona Iehova ena heduru dekenai ia tabekau. (Dan. 2:18) Danu, Daniela be Baibel ia stadilaia namonamo. Ia dekenai idia noho lokua toretoredia edia hereva ia tahua namonamo. (Ier. 25:11, 12; Dan. 9:2) Edena dala ai Daniela oi tohotohoa diba?

8. Dahaka dainai haida be peroveta herevadia idia stadilaia?

⁸ Peroveta herevadia oi stadilaia ena badina oi laloa. Peroveta herevadia oi stadilaia badina oi ura hereva momokani oi diba, a? Bema oibe, Iehova ese oi do ia durua. (Ioa. 4:23, 24; 14:16, 17) Dahaka dainai haida be dahaka dainai peroveta herevadia idia stadilaia? Badina idia ura Baibel ena hereva idia hakoikoia bona idia ura hamomokania ia be Dirava ena hereva lasi. Unai dala amo, idia sibona ese dahaka be maoro eiava dahaka be kerere idia abia hidi diba. To, badina maorona dainai Baibel ita stadilaia be gau badana. Ma danu, Baibel ena peroveta herevadia ita lalopararalaia totona, kara ta be mai anina bada.

9. Peroveta herevadia ita lalopararalaia totona, edena kara be mai anina bada. Herevalaia.

⁹ Oi manau. Iehova ia gwauhamata manau taudia do ia durua. (Iam. 4:6) Unai dainai peroveta herevadia ita lalopararalaia totona, iena heduru ita noia be namo. Danu do ita abia dae ia ese ena orea ia gaukaralaia nega maorona ai ita dekenai Dirava ena hereva ia halasia totona. (Luka 12:42) Iehova be gau ibounai ia karaia namonamo Diravana, unai dainai orea tamona ia gaukaralaia bona ita ia durua Baibel ena hereva momokani ita lalopararalaia totona.​—1 Kor. 14:33; Efe. 4:4-6.

10. Esther ena haheitalai amo dahaka ita dibaia?

¹⁰ Baibel oi stadilaia namonamo. Oi ura henia peroveta herevana ta oi abia hidi bona oi stadilaia guna. Taihu ta ladana Esther be unai ia karaia. Ia ura Mesia ia mai idia herevalaia peroveta herevadia ia diba. Ia gwau: “Egu mauri lagani be 15 neganai, tahua gaukara lau karaia badina lau ura hamomokania unai peroveta herevadia be Iesu ia do mai lasi neganai idia torea.” Mase Davara Lokua Toretoredia edia sivarai ia duahia karana ese ia durua. Ia gwau: “Idia herevalaia peroveta herevadia haida be Iesu ia vara lasi negana ai idia torea, unai dainai lau abia dae idia be Dirava amo.” Esther ia gwau: “Lau laloparara totona hereva haida lau duahia lou lou.” Bona unai ia karaia dainai ia moale. Peroveta herevadia haida ia stadilaia namonamo murinai, ia gwau: “Lau sibona lau itaia Baibel ena hereva be momokani!”

11. Ita sibona dekenai ita hamomokania Baibel ena hereva be momokani ese edena dala ai ita ia durua?

¹¹ Peroveta herevadia haida idia guguru ita itaia neganai, Iehova bona ena hakaua dalana do ita abidadama henia. Ma danu, herevana hekwakwanai ita davaria noho, peroveta herevadia ese ita idia durua vaira nega totona lalohadai maorona do ita abia. Daniela ese ia torea peroveta herevadia rua be hari idia guguru noho, mani ita itaia. Ita lalopararalaidia neganai ita do idia durua abia hidi maorodia ita karaia totona.

AENA BE AURI BONA RARO​—ENA ANINA OI DEKENAI

12. “Auri bona raro manoka” aena be dahaka ia laulaulaia? (Daniela 2:41-43)

¹² Daniela 2:41-43 duahia. Daniela be King Nebukanesa ena nihi ena anina ia gwauraia hedinarai neganai, king ese ia itaia kaivakuku ena aena be “auri bona raro manoka” amo idia karaia. Inai peroveta herevana be Daniela bona Apokalupo ena peroveta herevadia ma haida ida ita hahegeregerea neganai, ita gwau diba aena be idia gaukara hebou Anglo-America Basileia Badana ia laulaulaia. Ia be hari tanobada ia lohiaia noho. Unai basileia badana ia herevalaia neganai, Daniela ia gwau ia be “mai ena goada bona mai ena manoka.” Dahaka dainai ia manoka? Badina ena taunimanima, raro manokana ese ia laulaulaidia, be edia gwau-edeede karana dainai unai basileia be auri bamona ia goada lasi.b

13. Inai peroveta herevana ita lalopararalaia dainai, dahaka mai anina bada hereva momokani haida ita diba?

¹³ Daniela ese ia herevalaia kaivakuku ena aena amo mai anina bada hereva momokani haida ita dibaia. Gau ginigunana be Anglo-America Basileia Badana ese dala haida ai iena goada ia hahedinaraia. Hegeregere, Tanobada Tuarina Ginigunana bona Iharuana ai idia kwalimu. To, unai basileia badana be ia manoka bona do ia manoka ia lao noho, badina iena taunimanima idia heai heheni bona gavamani idia gwau-edeede henia. Iharuana be unai basileia badana be tanobada do ia lohiaia basileia ginigabena, bena Dirava ena Basileia ese tanobada taudia edia gavamani ibounai do ia hadikaia ore. Ena be nega haida basileia haida ese Anglo-America Basileia Badana idia tuari henia, to ena gabu do idia abia lasi. Unai ita diba badina Dirava ena Basileia amo ia mai “nadi ta” ese kaivakuku ena aena do ia hamakohia maragimaragi. Unai aena be Anglo-America Basileia Badana ia laulaulaia.​—Dan. 2:34, 35, 44, 45.

14. Edena dala ai auri bona raro amo idia karaia aena ena peroveta herevana ita lalopararalaia karana ese ita ia durua?

¹⁴ Oi abia dae Daniela ese ia herevalaia auri bona raro amo idia karaia aena ena peroveta herevana be momokani, a? Bema oibe, unai ese emu mauri oi noholaia dalana do ia haidaua. Kahirakahira do ia dika ore tanobadana ai moni bona kohu momo do oi haboua lasi. (Luka 12:16-21; 1 Ioa. 2:15-17) Unai peroveta herevana oi lalopararalaia dainai, oi ia durua emu haroro bona hahediba gaukarana do oi habadaia. (Mat. 6:33; 28:18-20) Inai peroveta herevana oi stadilaia murinai, sibona oi nanadaia: “Lau karaia abia hidi ese idia hahedinaraia lau abia dae momokani kahirakahira Dirava ena Basileia ese tanobada taudia edia gavamani ibounai do ia hadikaia ore, a?”

“NOT KAHANA ENA KING” BONA “SAUT KAHANA ENA KING”​—ENA ANINA OI DEKENAI

15. Iseda nega ai “not kahana ena king” bona “saut kahana ena king” be daidia? (Daniela 11:40)

¹⁵ Daniela 11:40 duahia. Daniela karoa 11 ese king rua, o gavamani rua ia herevalaia, idia be tanobada idia lohiaia totona idia tuari. Inai peroveta herevana be Baibel ena peroveta herevadia ma haida ida ita hahegeregerea neganai, ita gwau diba “not kahana ena king” be Russia bona ia idia durua besedia bona “saut kahana ena king” be Anglo-America Basileia Badana.c

16. “Not kahana ena king” ese Dirava ena taunimanima be edena bamona ia kara henidia?

¹⁶ Dirava ena taunimanima haida be “not kahana ena king” henunai idia noho bona ia ese ia dagedage henidia noho. Witnes taudia haida be edia abidadama dainai idia botadia bona dibura ruma ai idia atodia. To, “not kahana ena king” ena kara ese iseda tadikaka ia hagaria lasi, to edia abidadama ia hagoadaia. Edena dala ai? Iseda tadikaka idia diba Dirava ena taunimanima idia dagedage henia karana be Daniela ena peroveta herevana ia hagugurua.d (Dan. 11:41) Unai ita diba dainai, ita ia durua iseda helaro ita dogoatao auka bona Dirava do ita badinaia noho.

17. “Saut kahana ena king” ena lohia henunai Dirava ena taunimanima be dahaka hekwakwanai idia davaria?

¹⁷ Guna, “saut kahana ena king” ese Iehova ena taunimanima ia dagedage henidia bada. Hegeregere, Tanobada Tuarina Ginigunana bona Iharuana ai tadikaka momo be tuari lalonai idia vareai lasi dainai, idia momo be dibura ruma ai idia atodia bona Witnes natudia be sikuli amo idia kokidia. To, vanegai lagani lalodiai, unai king ena lohia henunai idia noho Iehova ena hesiai taudia be dala idauidau ai Dirava badinaia karana dekenai hahetoho idia davaria. Hegeregere, eleksen negadia ai, Keristani tauna ta be do ia ura politikol pati ta do ia abia isi bona ma ta ia dadaraia. Herevana ia vouti lasi, to iena lalona bona kudouna ai, do ia ura politikol pati ta be eleksen dekenai ia kwalimu. Namona be politikol karadia lalonai ita vareai lasi, iseda lalona bona kudouna ai kahana ta do ita sapot lasi!​—Ioa. 15:18, 19; 18:36.

18. “Not kahana ena king” bona “saut kahana ena king” edia tuari karana be edena bamona do ita laloa? (Laulau itaia danu.)

¹⁸ Baibel ena peroveta herevana idia abidadama henia lasi taudia idia itaia “saut kahana ena king” bona “not kahana ena king” be “ta ta edia doana do idia doria lao mai” neganai, idia lalohekwarahi bada. (Dan. 11:40, ftn.) Unai king rua be mai edia niuklia tuari kohudia momo, bona tanobada dekenai mauri gaudia ibounai idia hadikaia ore diba. To ita diba Iehova ese idia do ia rakatania lasi unai idia karaia totona. (Isa. 45:18) Unai dainai, “saut kahana ena king” bona “not kahana ena king” edia tuari dainai do ita lalohekwarahi lasi, to iseda abidadama ia hagoadaia be namo. Ia hamomokania inai nega oromana be kahirakahira do ia ore.

PEROVETA HEREVADIA ITA STADILAIA NOHO

19. Peroveta herevadia dekenai dahaka ita dibaia?

¹⁹ Baibel ena peroveta herevadia haida do idia guguru dalana be ita diba lasi. Peroveta tauna Daniela danu be ia torea gaudia ibounai edia anina ia lalopararalaia lasi. (Dan. 12:8, 9) To, peroveta herevana do ia guguru dalana ita diba lasi dainai, namo lasi ita laloa do ia vara lasi. Ita diba momokani, Iehova ese nega korikori ai do ita diba gaudia be ita dekenai do ia hahedinaraia.​—Amo. 3:7.

20. Kahirakahira edena peroveta herevadia do idia guguru, bona dahaka ita karaia noho be namo?

²⁰ “Maino bona noho namo!” ena boiboi do idia karaia. (1 Tes. 5:3) Bena tanobada ena gavamani ese tomadiho koikoi do idia tuari henia bona hadikaia ore. (Apok. 17:16, 17) Unai murinai, idia ese Dirava ena taunimanima do idia tuari henidia. (Ese. 38:18, 19) Dokonai, Aramagedono tuarina do ia vara. (Apok. 16:14, 16) Ita daradara lasi, unai gaudia be kahirakahira do idia vara. Unai ita naria noho lalonai, namona be iseda guba Tamana dekenai iseda tanikiu karana ita hahedinaraia, bona Baibel ena peroveta herevadia edia anina ita tahua noho bona ma haida ita durua unai idia karaia totona.