Ta Ta Dekenai Iseda Lalokau Ita Hagoadaia Dalana

1-2. (a) Dahaka dainai aposetolo Paulo ia gwau lalokau be kara “hereadaena”? (b) Edena henanadai toi do ita herevalaia?

APOSETOLO PAULO be abidadama, helaro, bona lalokau ia herevalaia neganai, dokonai ia gwau unai kara toi amo, “hereadaena be lalokau.” (1 Kor. 13:13) Dahaka dainai Paulo be unai bamona ia hereva? Paradaiso ai, Dirava ese nega matamata totona ia gwauhamatalaia gaudia do ita abidadama henia be anina lasi, badina unai gaudia ibounai be do idia guguru. To Iehova bona taunimanima do ita lalokau henidia noho. Oibe, iseda lalokau idia totona be do ia bada ia lao ela bona hanaihanai.

² Lalokau do ita hahedinaraia noho dainai, mani inai henanadai toi ita laloa. Ginigunana be, dahaka dainai ta ta do ita lalokau henia? Iharuana be, edena dala ai ta ta dekenai lalokau do ita hahedinaraia? Ihatoina be, edena dala ai ta ta dekenai iseda lalokau ita hagoadaia noho diba?

DAHAKA DAINAI TA TA ITA LALOKAU HENIA BE NAMO?

3. Dahaka dainai ta ta ita lalokau henia be mai anina bada?

³ Dahaka dainai ta ta ita lalokau henia be mai anina bada? Badina be momo, to lalokau ita hahedinaraia karana ese ia hamomokania ita be Keristani taudia korikoridia. Iesu ese ena aposetolo taudia ia hamaorodia: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:35) Danu, ta ta lalokau henia karana ese ita ia hatamonaia. Paulo ia gwau, lalokau be “taunimanima ia hatamonaia gauna hereadaena.” (Kol. 3:14) To, ta ta ita lalokau henia ena badina badana ta ia noho. Aposetolo Ioane ese ena tadikaka ia tore henidia, ia gwau: “Dirava ia lalokau henia tauna ese ena tadikaka ia lalokau henia danu be namo.” (1 Ioa. 4:21) Ta ta ita lalokau henia neganai, ita hahedinaraia Dirava ita lalokau henia.

4-5. Edena dala ai, tadikaka taihu ita lalokau henia karana be Dirava ita lalokau henia karana ida idia gaukara hebou? Haheitalai gwauraia.

⁴ Edena dala ai, tadikaka taihu ita lalokau henia karana be Dirava ita lalokau henia karana ida idia gaukara hebou? Unai ita haheitalaia totona, mani iseda kudouna bona iseda tauanina ena kahana haida idia gaukara hebou dalana ita laloa. Doketa ese iseda imana ai ia noho varovaro ta (pulse) ia sekea bema ia marere goada eiava lasi, unai dala amo do ia diba iseda kudouna be ia gaukara namonamo eiava lasi. Edena dala ai lalokau karana dekenai unai hakaua herevana ita badinaia diba?

⁵ Doketa ese iseda pulse ia sekea neganai, iseda kudouna ena goada do ia diba, unai hegeregerena, iseda tadikaka taihu ita lalokau henia dalana amo do ita diba bema iseda lalokau Dirava totona be ia goada eiava lasi. Bema ita itaia iseda lalokau tadikaka taihu totona be guna bamona ia goada lasi, unai ese ia hahedinaraia iseda lalokau Dirava totona be ia manoka ia lao noho. Bema hanaihanai iseda tadikaka taihu dekenai lalokau ita hahedinaraia, do ita diba iseda lalokau Dirava totona be ia goada.

6. Bema iseda lalokau tadikaka taihu totona be ia manoka ia lao, dahaka dainai unai be hekwakwanai badana? (1 Ioane 4:​7-9, 11)

⁶ Bema iseda lalokau tadikaka taihu totona be ia manoka ia lao, unai be hekwakwanai badana. Dahaka dainai? Badina unai ese ia hahedinaraia, iseda hetura karana Dirava ida be ia goada lasi. Aposetolo Ioane ese unai ia hahedinaraia, ia gwau: “Bema ta ese ena tadikaka, ia itaia diba tauna unai, ia lalokau henia lasi, vadaeni ia itaia lasi Diravana ia lalokau henia diba lasi.” (1 Ioa. 4:20) Unai amo dahaka ita dibaia? Iehova be ita dekenai do ia moale lasi, bema “ta ta ita lalokau henia” lasi.—1 Ioane 4:​7-9, 11 duahia.

EDENA DALA AI TA TA DEKENAI LALOKAU DO ITA HAHEDINARAIA?

7-8. Edena dala idauidau ai ta ta ita lalokau henia diba?

⁷ Baibel ai, do ita “lalokau heheni” ena oda herevana ita kamonai loulou. (Ioa. 15:​12, 17; Roma 13:8; 1 Tes. 4:9; 1 Pet. 1:22; 1 Ioa. 4:11) To lalokau be iseda kudouna amo ia mai hemamina, bona ta ese ia itaia diba lasi. Unai dainai, edena dala ai, ta ta ita lalokau henia karana ita hahedinaraia diba? Iseda hereva bona kara amo.

⁸ Dala idauidau ai iseda tadikaka taihu dekenai lalokau ita hahedinaraia diba. Dala haida be inai: “Umui ta ta dekenai hereva momokani umui gwauraia.” (Sek. 8:16) “Umui ta ta huanai maino do ia noho.” (Mar. 9:50) “Umui ta ta dekenai hemataurai hahedinaraia karana do umui gunalaia.” (Roma 12:10) “Umui ese ta ta do umui abia dae.” (Roma 15:7) Ta ta do umui “gwauatao.” (Kol. 3:13) “Ta ta umui durua noho emui metau umui huaia totona.” (Gal. 6:2) “Do umui hagoadaia heheni noho.” (1 Tes. 4:18) Ta ta do umui durua noho. (1 Tes. 5:11) “Ta ta totona do umui guriguri.”—Iam. 5:16.

9. Dahaka dainai ma haida ita hagoadaia karana amo ita hahedinaraia idia ita lalokau henia? (Laulau itaia danu.)

⁹ Paragraf 8 ai ita herevalaia lalokau karana ta mani ita herevalaia. Paulo ena hereva “do umui hagoadaia heheni noho” mani ita itaia. Dahaka dainai ma haida ita hagoadaia karana amo ita hahedinaraia idia ita lalokau henia? Buka ta ia gwau, Paulo ese ia gaukaralaia Grik herevana idia hahanaia “hagoadaia” ena anina be, “ta be hahetoho badana ia davaria neganai, ta be ia badinai ia gini, do ia hagoadaia totona.” Unai dainai, hekwakwanai ia davaria tadikaka ta ita hagoadaia neganai, ia ita durua, ia toreisi bona mauri ena dala dekenai ia raka noho totona. Iseda tadikaka o taihu ita hagoadaia negadia ai, ia dekenai ita hahedinaraia ia ita lalokau henia.—2 Kor. 7:​6, 7, 13.

10. Dahaka dainai, ma haida hagoadaia karana dekenai hebogahisi be mai anina bada?

¹⁰ Dahaka dainai, ma haida hagoadaia karana dekenai hebogahisi be mai anina bada. Hebogahisi tauna be ia ura hisihisi ia davaria tauna ia hagoadaia bona ia durua. Ta ita hebogahisi henia neganai, unai ese ita ia durua ia ita hagoadaia totona. Paulo ia hahedinaraia, Iehova be taunimanima ia hebogahisi henia dainai ia ura idia ia hagoadaia. Paulo ia gwau, Iehova be “hebogahisi Tamana bona lalogoada ibounai ia henia Diravana.” (2 Kor. 1:3) Paulo ese inai hereva “hebogahisi” ia gaukaralaia, ma haida laloa bada karana ia herevalaia totona. Unai dainai, Baibel ese Dirava ia gwauraia hebogahisi Tamana, badina ia ese taunimanima ia laloa bada. Bona ita ia laloa bada dainai, iseda “hisihisi ibounai lalonai,” ia ese ita ia hagoadaia. (2 Kor. 1:4) Ranu mase tauna ese sinavai amo ranu namona ia inua bona goada ia abia hegeregerena, Iehova ese lalohisihisi tauna dekenai goada matamata ia henia. Edena dala ai, Iehova ita tohotohoa bona ma haida ita hebogahisi henidia bona hagoadaia diba? Unai ita karaia dalana ta be iseda kudouna ai ma haida ita hebogahisi henia bona idia hagoadaia karadia do ita habadaia. Unai karadia haida be dahaka?

11. Kolose 3:12 bona 1 Petero 3:8 hegeregerena, edena bamona karadia do ita habadaia, unai amo ta ta do ita hagoadaia noho?

¹¹ Dahaka ese iseda lalokau karana do ia hagoadaia, unai amo dina ta ta ai ‘do ita hagoadaia heheni noho’? Namona be ma haida laloa bada karana, tadikaka lalokau henia karana, bona hariharibada karana do ita habadaia. (Kolose 3:12; 1 Petero 3:8 duahia.) Edena dala ai unai kara ese ita do idia durua? Ma haida hebogahisi henia karana bona unai bamona kara namodia be iseda kara ai ita halaodia neganai, do ita ura hisihisi idia davaria taudia ita hagoadaia. Iesu ena hereva bamona, ia gwau: “Kudouna ai idia honu gaudia be uduna ese ia gwauraia. Tau namona ese ia haboua gau namodia amo gau namodia ia mailaia.” (Mat. 12:​34, 35) Nega aukadia ai iseda tadikaka taihu ita hagoadaia karana, be iseda lalokau ita hahedinaraia dalana badana.

EDENA DALA AI TA TA LALOKAU HENIA KARANA ITA HAGOADAIA DIBA?

12. (a) Dahaka dainai ita naria namonamo? (b) Dahaka henanadai do ita herevalaia?

¹² Ita ura ita ibounai “ita lalokau heheni noho.” (1 Ioa. 4:7) To, namona be ita laloatao, Iesu ia gwau: “Taunimanima momo edia lalokau be do ia keru.” (Mat. 24:12) Iesu ia gwau lasi iena hahediba taudia momo be ta ta huanai lalokau do idia hahedinaraia lasi. To namona be ita naria namonamo, ita ura lasi inai tanobada taudia ita tohotohoa bona ma haida dekenai lalokau ita hahedinaraia lasi. Unai dainai, mani inai mai anina bada henanadai ita laloa: Edena dala ai do ita diba iseda lalokau tadikaka taihu totona be ia goada eiava lasi?

13. Edena dala ai, iseda lalokau ena goada do ita diba?

¹³ Iseda lalokau ena goada ita diba totona, dala ta be mauri ai idia vara gaudia dekenai do ita karaia gaudia ita lalohadailaia. (2 Kor. 8:8) Aposetolo Petero ese ita karaia diba gauna ta ia gwauraia, ia gwau: “Gau badana be, ta ta do umui lalokau henia bada, badina lalokau ese kara dika momo ia gwauatao.” (1 Pet. 4:8) Unai dainai, ma haida be kerere idia karaia eiava ita idia hahisia neganai, unai be nega namona do ita diba idia ita lalokau henia eiava lasi.

14. Petero Ginigunana 4:8 hegeregerena, edena bamona lalokau ita hahedinaraia be namo? Haheitalai gwauraia.

¹⁴ Mani Petero ena hereva ita laloa. Siri 8 ena kahana ginigunana ai ia hahedinaraia, namona be “ta ta ita lalokau henia bada.” Petero ese inai hereva “bada” ia gaukaralaia anina be “habadaia lao.” Siri ena kahana iharuana ai ta ta do ita lalokau henia bada neganai, do ita karaia gauna ia herevalaia. Unai be iseda tadikaka taihu edia dika do ita gwauatao. Reana inai bamona ita laloa diba: Iseda lalokau be eda imana rua amo ita dogoatao dabua ta bamona, bona ita veria lao ela bona kahana ibounai eiava “kara dika momo ia koua.” Inai hereva koua anina be kara dika gwauatao karana. Dabua ese miro ia koua hegeregerena, lalokau ese ta ena manoka gaudia bona ena kerere maragidia ia koua diba.

15. Bema iseda tadikaka taihu ita lalokau henia bada, dahaka ita karaia diba? (Kolose 3:13)

¹⁵ Namona be iseda lalokau ia goada, unai amo iseda tadikaka taihu edia kerere idauidau ita gwauatao diba, ena be unai ita karaia be mai ena hekwarahi. (Kolose 3:13 duahia.) Ma haida edia kerere ita gwauatao neganai, ita hahedinaraia iseda lalokau be ia goada bona ita ura Iehova ita hamoalea. Dahaka gau ma ta ese ita do ia durua, haida edia kerere ita laloa lasi bona ita lalohisihisi lasi totona?

16-17. Dahaka gau ma ta ese ita do ia durua, ma haida edia kerere maragidia ita laloaboio totona? (Laulau itaia danu.)

¹⁶ Namona be emu tadikaka taihu edia kara namodia sibona oi laloa. Mani inai haheitalai ita laloa. Oi be emu tadikaka taihu ida umui moale hebou bona dokonai, oi ese grup piksa ta oi abia. Oi be piksa ma rua oi abia badina dika ginigunana be ia namo lasi. Hari oi be piksa toi oi abia. To piksa ta lalonai oi itaia tadikaka ta be ia kiri lasi. Unai piksa dekenai dahaka do oi karaia? Do oi kokia badina oi dekenai piksa rua idia noho, unuseniai ibounai, bona unai tadikaka danu be idia kiri.

¹⁷ Unai piksa namodia ita itaia neganai dahaka ita laloatao be namo? Reana iseda tadikaka taihu ida ita moalelaia nega namodia ita laloatao. To reana unai moale negana ta ai, tadikaka eiava taihu ta ena hereva eiava kara ese oi ia hahisia. Unai gauna dekenai dahaka do oi karaia? Oi laloaboio be namo, unai piksa ta oi kokia bamona. (Aon. 19:11; Efe. 4:32) Oi ese unai tadikaka eiava taihu ena kerere maragina oi laloaboio diba, badina ia danu oi moalelaia nega namodia do oi laloatao. Oibe, ita ura unai bamona kara namodia sibona ita laloa bada bona laloatao.

DAHAKA DAINAI HARI LALOKAU BE MAI ANINA BADA

18. Inai atikol ai lalokau karana dekenai edena point badadia ita herevalaia?

¹⁸ Dahaka dainai, ta ta dekenai eda lalokau ita hagoadaia noho be namo? Paragraf gunadia ai ita herevalaia bamona, eda tadikaka taihu ita lalokau henia neganai, ita hahedinaraia Iehova ita lalokau henia. Edena dala ai eda tadikaka taihu do ita lalokau henia? Dala ta be idia ita hagoadaia. Hebogahisi karana dainai, ta ta ‘do ita hagoadaia heheni noho.’ Edena dala ai ta ta lalokau henia karana ita hagoadaia diba? Namona be ma haida edia dika ita gwauatao, ena be unai be mai ena hekwarahi.

19. Dahaka dainai, hari inai negai lalokau ita hahedinaraia noho be mai anina bada?

¹⁹ Dahaka dainai, hari inai negai lalokau ita hahedinaraia noho be mai anina bada? Mani Petero ena haere ita itaia: “Gau ibounai edia dokona be ia mai kahirakahira. . . . Unai dainai, . . . ta ta do umui lalokau henia bada.” (1 Pet. 4:​7, 8) Inai nega oromana dokona ia kahirakahira lalonai, dahaka do ia vara? Iesu be ena murinai idia raka taudia ia herevalaia neganai, ia gwau: “Egu ladana dainai bese ibounai ese umui do idia inai henia.” (Mat. 24:9) Unai ita haheaukalaia totona, namona be mai lalotamona ida ita noho. Bema eda tadikaka taihu ita lalokau henia, Satana ese ita do ia hapararaia diba lasi, badina lalokau be ita ia “hatamonaia gauna hereadaena.”—Kol. 3:14; Fili. 2:​1, 2.