Maoro Bona Kerere: Dahaka ese Taunimanima Ia Hakaua Abia Hidi Idia Karaia Totona?

Taunimanima momo idia diba kara haida be kerere, hegeregere ala-ala, reipi, bona natuna hadikaia karana. Bona idia diba kara haida be maoro, hegeregere maka tamona ai taunimanima kara henia, kara namodia, bona hebogahisi karana. To mauri ai momo be gau ma haida, hegeregere mahuta hebou karadia, kara momokani, eiava natudia naria karana dekenai maoro bona kerere idia diba lasi. Idia laloa edia abia hidi ibounai be maoro sibona. Nega momo taunimanima be sibona edia lalohadai eiava ma haida edia lalohadai hegeregerena disisen idia karaia. Unai be maoro, a?

ISEDA LALOHADAI

Nega momo iseda lalohadai eiava lalomamina ese ita ia hakaua maoro bona kerere dekenai abia hidi ita karaia totona. (Roma 2:​14, 15) Natudia danu be idia maragi neganai, ta ese idia ia kara namo henia eiava lasi idia mamia diba bona idia kerere neganai, idia mamia diba idia kerere. Ita tubu daekau lalonai, iseda lalomamina be iseda famili, turadia, tisa taudia, komiuniti taudia, tomadiho, bona kastom ese ia hakaua. Abia hidi ita karaia neganai, iseda lalomamina ese ita ia hadibaia bema unai gaudia be ita abia dae gaudia ida ia hegeregere eiava lasi.

Iseda lalohadai maoro bona kerere dekenai ese ita ia hagoadaia diba ma haida dekenai hebogahisi, tanikiu karana, bona maka tamona ai idia ita kara henia totona. Danu unai ese ita ia koua diba ma haida hahisia karadia eiava ita dekenai hemarai ia havaraia karadia ita karaia lasi totona.

Iseda lalohadai be nega ibounai ita trast henia diba, a? Garrick be ia mero neganai, ia badinaia mauri dalana ia herevalaia, ia gwau, “Sibona egu ura dalana lau badinaia diba.” To, ia davaria sibona ena ura ia badinaia dainai namo ta ia davaria lasi. Ia badinaia mauri dalana dikana totona ia gwau, “matabodaga karadia lau karaia, drag lau ania, lau kekero, bona dagedage karadia momo lau karaia.”

MA HAIDA EDIA LALOHADAI

Ma danu, nega momo ma haida edia lalohadai dainai abia hidi haida ita karaia. Unai amo edia ekspiriens bona aonega amo namo ita davaria diba. Iseda famili, turadia, bona komiuniti taudia edia lalohadai dahaka be maoro ita badinaia neganai, ita idia matauraia.

Ma haida edia lalohadai be nega ibounai ita trast henia diba, a? Kekeni matamata ta Priscila be ena turadia idia karaia karadia ia badinaia bona mahuta hebou karadia lalonai ia vareai. To ia davaria haida edia lalohadai ia badinaia karana ese ia dekenai moale ia havaraia lasi. Ia gwau: “Taunimanima ibounai ese idia karaia karadia lau badinaia, to lau moale lasi. Unai ese lau ia hakaua dika idia havaraia diba karadia lau karaia.”

ABIA HIDI KARAIA DALA NAMONA IA NOHO, A?

Maoro bona kerere dekenai abia hidi ita karaia neganai, iseda lalohadai bona ma haida edia lalohadai ese ita idia durua. To unai sibona ese namo ia havaraia lasi. Nega haida ita sibona eiava ma haida ita hahisia diba, badina ita karaia abia hidi ese gabeai do ia havaraia dika ita laloa lasi. (Aonega Herevadia 14:12) Bona namo lasi ita laloa iseda lalohadai eiava ma haida edia lalohadai be hanaihanai namo ia havaraia bona ita haidaua diba lasi. Badina kara haida be guna idia laloa ia kerere be hari momo ese idia abia dae, danu guna idia laloa ia maoro karana be hari idia laloa ia kerere.

Dala namona ta ia noho maoro bona kerere ena disisen ita karaia totona, a? Taravatu maorona ta ia noho hari inai negai ita badinaia totona, a? Bona gabeai unai ese ita dekenai namo ia havaraia diba, a?

Ita moale diba, badina taunimanima ibounai totona hakaua hereva maorodia idia noho. Rau 6 ena atikol ese hakaua hereva namona ita abia diba gabuna do ia herevalaia.