STADI ATIKOL 26
ANE 123 Tiokratik Dalana Badinaia
Oi Manau Ena be Gau Haida Oi Diba Lasi
“Siahu Ibounai Diravana ena siahu ita lalopararalaia diba lasi, iena siahu be bada herea.”—IOBU 37:23.
STADI ENA BADINA
Mai manau ida ita abia dae ita be gau haida ita diba lasi neganai, iseda daradara gaudia dekenai do ita laloa momo lasi. Bona Iehova dekenai ita tabekau karana ese ita do ia durua hekwakwanai ita haheaukalaia totona.
1. Ita be dahaka ita karaia diba, bona dahaka dainai?
IEHOVA ese ita ia karaia dalana be namo herea. Hegeregere, ita be gau momo ita lalohadailaia diba, gau matamata ita dibaia, bona ita dibaia gaudia ita badinaia dalana ita diba. Dahaka dainai Iehova ese ita be unai bamona ia karaia? Badina Dirava ia ura ia do ita dibaia bona mai laloa maoromaoro ida ia ita hesiai henia.—Aon. 2:1-5; Roma 12:1.
2. (a) Ita sibona totona dahaka ita lalopararalaia be namo? (Iobu 37:23, 24) (Laulau itaia danu.) (b) Bema mai manau ida ita abia dae ita be gau momo ita do diba lasi, edena dala ai unai ese ita ia durua?
2 Iehova ese ita ia havaraia dalana amo gau momo ita dibaia diba, to gau momo ita do diba lasi. (Iobu 37:23, 24 duahia.) Mani Iobu ena haheitalai ita laloa. Iehova ese Iobu dekenai henanadai momo ia henia, unai amo Iobu ia durua ia laloparara totona, ia be gau momo ia do diba lasi. Unai herevahereva karana amo Iobu ia laloparara, namona be ia manau bona ena lalohadai ia hamaoromaoroa. (Iobu 42:3-6) Bema mai manau ida ita abia dae ita be gau momo ita do diba lasi, unai ese ita do ia durua Iehova dekenai ita tabekau totona. Bona ita abia dae ita diba lasi gaudia be Iehova sibona ese ita dekenai do ia hadibaia, unai amo abia hidi namodia ita karaia diba.—Aon. 2:6.
Iobu hegeregerena, gau haida ita diba lasi be mai ena namo (Paragraf 2 itaia)
3. Inai atikol ai dahaka do ita herevalaia?
3 Inai atikol ai, ita diba lasi gaudia haida bona unai ese do ia havaraia hekwakwanai haida do ita laloa. Danu do ita diba dahaka dainai gau haida ita diba lasi be mai ena namo. Unai gaudia ita herevalaia karana ese gau ibounai ia diba Diravana Iehova dekenai iseda abidadama ia hagoadaia, badina ia be ita ia hadibaia dahaka gaudia ita diba be namo.—Iobu 37:16.
ITA DIBA LASI DOKONA BE EDENA NEGA AI DO IA MAI
4. Mataio 24:36 hegeregerena, ita be dahaka ita diba lasi?
4 Mataio 24:36 duahia. Ita diba lasi edena nega ai inai tanobada ena oromana dikana do ia ore. Iesu be tanobada dekenai ia noho neganai, ia danu be unai dina bona hora ia diba lasi.a Ia ese gabeai ena aposetolo taudia ia hamaoroa Iehova sibona be idia vara gaudia edia nega ia gwauraia. (Kara 1:6, 7) Iehova ese inai tanobada oromana ena dokona ia makaia vadaeni, to ita diba lasi edena nega ai unai do ia vara.
5. Tanobada ena dokona ena deit ita diba lasi dainai, dahaka hemami ita abia diba?
5 Iesu ena hereva hegeregerena, ita danu ita diba lasi inai tanobada oromana ena dokona be edena nega ai do ia vara. Inai tanobada oromana ena dokona ia ore totona, do ita naria noho ena daudau ita diba lasi. Unai dainai bema ita be Iehova ena dina totona nega daudau ita naria vadaeni, do ita hesiku eiava lalomanoka. Eiava iseda famili o ma haida ese ita idia hevasehalaia neganai, do ia auka ita haheauka totona. (2 Pet. 3:3, 4) Reana do ita laloa, bema tanobada ena dokona ena deit ita diba, do ita haheauka bona ma haida edia hevaseha karana do ita haheaukalaia diba.
6. Dahaka dainai tanobada dokona ena deit ita diba lasi be mai ena namo?
6 Momokani, Iehova be tanobada ena dokona ena deit ia gwauraia lasi dainai, ia ura ita hahedinaraia ia ita hesiai henia ena badina be ia ita lalokau henia bona abidadama henia. Namo lasi tanobada oromana ena dokona ita laloa dainai Iehova ita hesiai henia, to ita ura ia ita hesiai henia ela bona hanaihanai. Danu “Iehova ena dina” ena mai negana sibona ita laloa lasi, to namona be unai dina ai do idia vara gau namodia ita laloa. Unai ese ita do ia durua Iehova kahirakahira ita lao, ia ita abidadama henia bona gau ibounai ita karaia ia ita hamoalea totona.—2 Pet. 3:11, 12.
7. Dahaka gaudia ita diba?
7 Namona be ita diba vadaeni gaudia ita laloa bada. Hegeregere, ita diba dina gabedia be lagani 1914 ai ia matamaia. Iehova ese Baibel ai peroveta herevadia ia gwauraia, unai ese idia hamomokania lagani 1914 ai, dina gabedia ia matamaia. Bona unai lagani murinai do idia vara gaudia ia gwauraia danu. Unai dainai ita diba “Iehova ena dina badana be ia kahirakahira.” (Sef. 1:14) Danu ita diba Iehova ia ura taunimanima momo dekenai “Basileia ena sivarai namona” ita harorolaia. (Mat. 24:14) Ita ese unai sivarai namona be tano 240 bamona ai bona gado 1,000 mai kahana ai ita harorolaia. Ita haroro goadagoada totona nega dokona ena “dina bona hora” ita diba be badina lasi.
IEHOVA IA KARAIA GAUDIA ITA DIBA LASI
8. “Dirava momokanina . . . ena gaukara” ena anina be dahaka? (Hadibaia Tauna 11:5)
8 Iehova be ena ura ia hagugurua totona, ia ese gau haida ia karaia eiava gau haida ia koua lasi idia vara totona. Danu Baibel ia gwau “Dirava momokanina . . . ena gaukara” haida do ita diba lasi. (Hadibaia Tauna 11:5 duahia.) Unai hereva ena anina be dahaka? Mani inai oi laloa: Saiens taudia be sinana ena bogana lalonai beibi ia tubu dalana idia do diba namonamo lasi. Unai hegeregerena, Iehova ese gau haida ia koua lasi idia vara totona eiava edena dala ai ita do ia durua be do ita diba namonamo lasi.—Sal. 37:5.
9. Iehova ese do ia karaia gaudia ita diba lasi dainai, dahaka lalohadai do ita abia?
9 Bema ita diba lasi Iehova ese edena dala ai ita do ia durua, reana do ita daradara abia hidi ta ita karaia totona. Reana iseda haroro gaukara ita habadaia totona do ia auka gau haida ita haidaua. Hegeregere, bema ita ura kohu momo lasi maurina ita noholaia eiava pablisa momo lasi gabuna dekenai ita lao. Eiava bema iseda hesiai gaukara lalonai tahua gauna ta ita hagugurua lasi, eiava bema haroro gaukara ita karaia goadagoada to anina namona ita itaia lasi, eiava bema tiokratik gaukaradia karaia totona gau momo ese ita ia koua, reana do ita laloa bema Dirava ese ita ia lalonamo henia.
10. Iehova ese do ia karaia gaudia ita diba lasi dainai, edena dala ai unai ese ita ia durua?
10 Iehova ese do ia karaia gaudia ita diba lasi dainai, unai ese ita ia durua kara namodia, hegeregere manau ita hahedinaraia totona. Ita laloparara Iehova ena dala bona ena laloa dalana ese iseda ia hereaia. (Isa. 55:8, 9) Danu ita abia dae momokani Iehova ese gau ibounai be dala maorona ai do ia karaia. Bema iseda haroro gaukara ai, eiava tiokratik gaukaradia ai anina namona ita davaria, Iehova ita hanamoa be namo. (Sal. 127:1; 1 Kor. 3:7) Bema gau haida be iseda ura dalana ai idia vara lasi, namona be ita laloatao Iehova be idia vara gaudia ibounai ia itaia. (Isa. 26:12) Unai dainai ita karaia diba gaudia ita karaia, bona ita abia dae Iehova ese hanaihanai ita do ia durua. Ena be Iehova ese guna ia karaia hoa karadia be hari do ia karaia lasi, to ita diba momokani ia ese ita do ia hakaua noho.—Kara 16:6-10.
11. Dahaka mai anina bada gaudia ita diba?
11 Ita diba Iehova be hanaihanai lalokau ia hahedinaraia, ia kara maoromaoro bona ia be aonega Diravana. Danu ita diba ia bona ia idia tomadiho henia taudia totona ita karaia gaudia ia laloa bada. Bona ita diba Iehova be hanaihanai ia idia badinaia taudia dekenai davana namona do ia henia.—Heb. 11:6.
KERUKERU DO IA VARA GAUNA ITA DIBA LASI
12. Iamesi 4:13, 14 hegeregerena, ita be dahaka ita diba lasi?
12 Iamesi 4:13, 14 duahia. Ita diba lasi kerukeru ita dekenai dahaka do ia vara. Inai tanobada oromana dikana ai “dika be nega idauidau ai idia vara kava.” (Had. 9:11) Unai dainai, ita diba lasi bema ita karaia palani be do idia guguru eiava bema do ita mauri noho iseda palani ena guguru ita itaia totona.
13. Vaira nega ai do idia vara gaudia ita diba lasi dainai, ita dekenai dahaka ia vara diba?
13 Vaira nega ai do idia vara gaudia ita diba lasi dainai, reana do ia auka ita haheauka totona. Edena dala ai? Bema unai gaudia dainai ita laloa momo, unai ese iseda moale do ia hadikaia. Hegeregere, idia vara kava dika haida dainai do ita lalohisihisi bona ita badu. Bona bema gau haida be iseda ura hegeregerena idia vara lasi, do ita lalometau bona ita lalomanoka diba.—Aon. 13:12.
14. Ita moale noho totona, dahaka ita karaia be namo? (Laulau itaia danu.)
14 Ena be iseda mauri ai dahaka do ia vara, to iseda guba Tamana ita lalokau henia dainai ia do ita hesiai henia noho. Namo lasi ita laloa, Iehova ese nega ibounai dika amo ita do ia gimaia, bona namo lasi ita laloa ia ese iseda mauri ai do idia vara gaudia ia palanilaia vadaeni. Iehova ia diba do ita moale ena be vaira nega ai ita dekenai do idia vara gaudia ita diba lasi. To, ita moale totona Iehova ena heduru ita tahua bona ia ita badinaia. (Ier. 10:23) Bema abia hidi ita karaia totona ena heduru ita tahua, unai be hegeregere ita gwau: “Bema Iehova ia ura, ita be do ita mauri bona inai eiava unai do ita karaia.”—Iam. 4:15.
Iehova ena hakaua dalana ita tahua bona ia ita badinaia neganai, Iehova ese ita do ia durua bona hanamoa (Paragraf 14-15 itaia)b
15. Vaira nega totona dahaka ita diba?
15 Ita diba lasi dina ta ta ai dahaka do ia vara, to ita diba gauna be Iehova ia gwauhamata ita dekenai mauri hanaihanai do ia henia—herevana guba dekenai eiava tanobada dekenai. Danu ita diba Iehova be ia koikoi diba lasi bona ena gwauhamata ia hagugurua totona gau ta ese ia do ia koua lasi. (Tito 1:2) Ia sibona ese “do idia vara gaudia be matamana ai [ia] gwauraia,” bona idia do vara lasi gaudia be gunaguna ia gwauraia vadaeni, Baibel negadia ai ia perovetalaia gaudia ibounai be idia vara momokani bona unai dainai ita diba momokani vaira nega totona ia gwauraia gaudia danu do idia vara momokani. (Isa. 46:10) Ita abia dae gau ta ese Iehova do ia koua lasi ita dekenai ena lalokau ia hahedinaraia totona. (Roma 8:35-39) Ia ese ita dekenai aonega do ia henia, ita do ia durua, bona goada do ia henia hahetoho idauidau ita haheaukalaia totona. Unai dainai ita abia dae momokani Iehova ese ita do ia hagoadaia bona hanamoa.—Ier. 17:7, 8.
IEHOVA ESE ITA IA DIBA NAMONAMO DALANA ITA DIBA LASI
16. Iehova be edena dala ai ita ia diba namonamo, bona unai oi diba dainai emu hemami be edena bamona? (Salamo 139:1-6)
16 Salamo 139:1-6 duahia. Iehova ese ita ia havaraia dainai ita ia diba namonamo, ia be ita abia lalohadai bona hemami ena badina ia diba. Danu ita gwauraia herevadia bona iseda lalona ai idia noho gaudia ia diba, danu ita karaia gaudia ibounai bona ita karaia ena badina ia diba. King Davida ia gwau, Iehova be hanaihanai ia noho hegaegae ita ia durua totona. Ita moale bada badina siahu ibounai Lohiabadana, guba bona tanobada ia havaraia Diravana be ita ia laloa bada! Davida ia gwau: “Oi ese lau oi diba namonamo, emu diba ese egu diba ia hereaia.”—Sal. 139:6.
17. Iehova be ita ia diba namonamo, dahaka dainai unai ita abia dae be auka?
17 Reana iseda famili edia mauri dalana, iseda kastom, eiava guna ita abia dae gaudia dainai, do ia auka Iehova be lalokau Tamana bamona ita laloa totona. Eiava do ita laloa guna ita karaia kerere badadia dainai, Iehova do ia ura lasi ita ia dibaia bona ia be ita amo ia daudau. Guna Davida danu be unai bamona hemami ia abia. (Sal. 38:18, 21) Eiava bema tau ta ia ura ena mauri dalana ia haidaua bona Dirava ena kara maoromaoro taravatudia ia badinaia, reana do ia laloa, ‘Bema Dirava be lau ia diba namonamo, dahaka dainai ia ura lau manadalaia mauri do lau dadaraia bona ia lau badinaia?’
18. Ita abia dae Iehova be ita ia diba namonamo dainai, unai ese edena dala ai ita ia durua? (Laulau itaia danu.)
18 Namona be ita abia dae Iehova be ita ia diba namonamo bona ita karaia diba gau namodia ia itaia, ena be ita sibona be unai bamona ita laloa lasi. Iehova be ita karaia kerere ia itaia, to ita abia hemami bona unai ita karaia ena badina ia lalopararalaia, bona ita ia lalokau henia. (Roma 7:15) Bema ita laloparara Iehova be hanaihanai ita karaia diba gaudia ia itaia, unai ese ita ia hagoadaia diba, mai abidadama ida Ia do ita hesiai henia bona ita moale diba.
Iehova ese tanobada matamata ia gwauhamatalaia karana ese iseda abidadama ia hagoadaia. Unai amo ita ia durua ita davaria hekwakwanai ita haheaukalaia totona (Paragraf 18-19 itaia)c
19. Iehova totona dahaka ita diba?
19 Ita diba Iehova be lalokau. Bona unai ita abia dae momokani. (1 Ioa. 4:8) Danu Iehova be ena kara maoromaoro taravatudia amo ena lalokau ita dekenai ia hahedinaraia bona ia be nega ibounai iseda namo ia laloa. Ita diba Iehova ia ura mauri hanaihanai do ita abia. Iesu ena mauri davana amo unai ia hahedinaraia. Ena be ita be goevadae lasi taudia, to Iehova ena ura hegeregerena ia ita hesiai henia diba. (Roma 7:24, 25) Bona ita diba “Dirava be iseda kudouna ia hereaia bona gau ibounai ia diba.” (1 Ioa. 3:19, 20) Iehova ese ita karaia gaudia ibounai ia itaia, bona ia diba iena ura ita karaia neganai do ita kwalimu.
20. Dahaka ese ita do ia durua ita diba lasi gaudia dainai ita laloa momo lasi totona?
20 Iehova ia diba edena gaudia ita diba be namo, bona ita ia hadibaia. Unai dainai ita diba lasi gaudia totona ita laloa momo lasi. To mai anina bada gaudia ita laloa be namo. Unai bamona ita karaia neganai, ita hahedinaraia “gau ibounai ia diba Diravana” Iehova, ita abidadama henia momokani. (Iobu 36:4) Ena be hari inai negai gau haida ita lalopararalaia lasi, to ita diba Iehova be hanaihanai gau matamatadia do ia hadibaia. Bona ita moale badina iseda Dirava hereadaena do ita dibaia noho ela bona hanaihanai.—Had. 3:11.
ANE 104 Dirava Ena Lauma Helaga
a Iesu ese tuari do ia gunalaia Satani bona inai tanobada dikana tuari henia totona, unai dainai ita gwau diba Iesu be Aramagedono tuarina ena deit ia diba vadaeni bona ia be do ia “kwalimu.”—Apok. 6:2, 19:11-16.
b LAULAU: Tama ta bona ena natuna mero be edia ‘go bag’ idia hegaegaelaia, unai amo edia ruma bese be dika negadia totona idia hegaegae.
c LAULAU: Hekwakwanai ia davaria tadikaka ta be tanobada matamata ai do ia abia moalena ia laloa.